សាកលវិទ្យាល័យខេមរៈ និងក្រុមយុវជនសតវត្សទី២១ នៅព្រឹកថ្ងៃទី១៣ ខែមិថុនា រៀបចំវេទិកាបណ្ឌិតសភាចំហមួយ នៅសាកលវិទ្យាល័យខេមរៈ ក្នុងសង្កាត់ភ្នំពេញថ្មី ដើម្បីពិភាក្សាអំពីរបត់នយោបាយថ្មីនៅក្នុងប្រទេសកម្ពុជា ជាពិសេស អំពីការធ្វើសម្បទាននយោបាយរបស់គណបក្សប្រជាជនកម្ពុជា នាពេលបច្ចុប្បន្ន។
កិច្ចពិភាក្សានេះ មានការចូលរួមផ្តល់យោបល់ដោយក្រុមអ្នកវិភាគឯករាជ្យ និងតំណាងគណបក្សសង្គ្រោះជាតិ ដោយឡែកគណបក្សប្រជាជនកម្ពុជា មិនមានតំណាងចូលរួមឡើយ។
វេទិកាបណ្ឌិតសភាចំហ ដែលចូលរួមដោយព្រះសង្ឃ និស្សិត និងពលរដ្ឋប្រមាណ ៣០០នាក់ ត្រូវបានរៀបចំឡើងដើម្បីផ្តល់ឱកាសឲ្យអ្នកនយោបាយ បង្ហាញប្រាប់ប្រជាពលរដ្ឋ ថាតើពួកគេដោះស្រាយយ៉ាងណាចំពោះនយោបាយដែលជាប់គាំងក្នុងពេលបច្ចុប្បន្ន? ក្រៅពីនេះ វេទិកានេះក៏ផ្តល់ឱកាសឲ្យអ្នកវិភាគនយោបាយ អ្នកវិភាគសង្គម បញ្ញវ័ន្ត និស្សិត ចូលរួមផ្តល់ជាមតិទៅឲ្យអ្នកនយោបាយ ដើម្បីជួយស្វែងរកមធ្យោបាយទម្លុះភាពទាល់ច្រក ដែលបានអូសបន្លាយជិតមួយឆ្នាំមកហើយនេះ។
វេទិកាពិភាក្សាដែលចូលរួមជាវាគ្មិនដោយអ្នកវិភាគឯករាជ្យ ដូចជា លោក កែម ឡី លោកបណ្ឌិត សុខ ទូច និងអ្នកនាំពាក្យគណបក្សសង្គ្រោះជាតិ លោក យ៉ែម បុញ្ញឫទ្ធិ បានពិភាក្សាលើប្រធានបទមួយចំនួន ដូចជា អំពីការដាក់បញ្ចូលគណៈកម្មាធិការជាតិរៀបចំការបោះឆ្នោត ជាស្ថាប័នធម្មនុញ្ញ អំពីយន្តការនៃការព្រមព្រៀងគ្នារវាងគណបក្សនយោបាយទាំង២ អំពីភាពវិជ្ជមាន និងភាពអវិជ្ជមាន នៃការមិនបោះឆ្នោតមុនអាណត្តិ អំពីការផ្តល់ប្រព័ន្ធផ្សព្វផ្សាយឲ្យគណបក្សប្រឆាំង និងអំពីផលប៉ះពាល់ផ្សេងៗ នៅពេលដែលអ្នកនយោបាយខ្មែរមិនត្រូវរ៉ូវគ្នា ជាដើម។
ទាក់ទងនឹងការរៀបចំវេទិកាពិភាក្សានេះ អ្នកនាំពាក្យគណបក្សសង្គ្រោះជាតិ លោក យ៉ែម បុញ្ញឫទ្ធិ មានប្រសាសន៍ថា លោកសប្បាយរីករាយ និងគាំទ្រចំពោះការរៀបចំឲ្យមានការពិភាក្សានេះឡើង ព្រោះវាផ្តល់ឱកាសឲ្យពលរដ្ឋ ពិសេសយុវជនបានដឹងអំពីការវិវឌ្ឍនយោបាយ និងបញ្ហាពិតជាក់ស្តែងដែលកំពុងកើតមាននៅក្នុងប្រទេស។
លោក យ៉ែម បុញ្ញឫទ្ធិ៖ «កម្មវិធីនេះល្អមែនទែន យើងសង្កេតឃើញថា សាកលវិទ្យាល័យខេមរៈ លោកតែងតែរៀបចំដើម្បីឲ្យមានការចូលរួមពីយុវជន សិស្ស និស្សិត របស់យើង ហើយសិស្សនិស្សិតចូលរួមមានផលប្រយោជន៍សំខាន់នោះ គាត់បានជ្រាបពីព័ត៌មាន គាត់អាចបានសួរ ដើម្បីឲ្យបានដឹងពីព័ត៌មានពិត នៃសង្គមរបស់យើង ហើយនៅប្រទេសណាក៏ដោយ សំខាន់ជាទីបំផុត គឺការចូលរួមរបស់សិស្ស និស្សិត ហ្នឹងតែម្តង»។
ទោះជាយ៉ាងណាក៏ដោយ អ្នកនាំពាក្យគណបក្សប្រឆាំងរូបនេះ សម្ដែងការសោកស្ដាយដែលតំណាងរាស្ត្រគណបក្សប្រជាជនកម្ពុជា មិនបានឆ្លៀតឱកាសចូលរួម ដើម្បីជជែកជាមួយព្រះសង្ឃ និស្សិត និងបញ្ញវ័ន្ត ដើម្បីដោះស្រាយបញ្ហារួមគ្នា។
សកលវិទ្យាធិការ និងជាអ្នកវិភាគនយោបាយឯករាជ្យ លោកបណ្ឌិត សុខ ទូច ដែលរៀបចំឲ្យមានវេទិកាពិភាក្សានេះឡើង កត់សម្គាល់ថា វេទិកាប្រភេទនេះមិនត្រឹមតែអាចរួមចំណែកផ្តល់គំនិតបន្ថែមឲ្យអ្នកនយោបាយនោះទេ តែថែមទាំងជួយផ្តល់ចំណេះដឹងឲ្យនិស្សិត ជាពិសេស គឺនិស្សិតដែលសិក្សាផ្នែកវិទ្យាសាស្ត្រនយោបាយ តែម្តង។ លោកអះអាងថា សាកលវិទ្យាល័យរបស់លោកនឹងបន្តរៀបចំវេទិកាបែបនេះក្នុងពេលខាងមុខទៀត ជាពិសេសនៅពេលដែលប្រទេសជាតិមានបញ្ហាតឹងតែងផ្នែកនយោបាយ ហើយដែលអ្នកនយោបាយមិនអាចរកដំណោះស្រាយបាន។
លោកបណ្ឌិត សុខ ទូច៖ «យើងឃើញថា ចូលរួមនេះទី១ គឺនិស្សិតគាត់បានចំណេះដឹង។ ទី២ គាត់អាចជំរុញនូវគំនិតល្អៗទៅគណបក្សនយោបាយ ជួនកាលគាត់ចេះតែយល់ថា គាត់គ្រប់ជ្រុងជ្រោយ ប៉ុន្តែយើងបានគំនិតបន្ថែម ដើម្បីបំពេញតម្រូវការរបស់អ្នកនយោបាយ ធម្មតាអ្នកនយោបាយរកដំណោះស្រាយមិនបាន កុំឲ្យថា អ្នកនយោបាយអន់។ អ៊ីចឹងខាងយើងអ្នកវិទ្យាសាស្ត្រធ្វើទៅ ហើយរុញគំនិតទៅអ្នកនយោបាយវិញ»។
វេទិកាបណ្ឌិតសភាចំហពេលនេះ ត្រូវបានរៀបចំឡើងបន្ទាប់ពីគណបក្សប្រជាជនកម្ពុជា និងគណបក្សសង្គ្រោះជាតិ បរាជ័យមិនអាចទម្លុះភាពជាប់គាំងនយោបាយបាន ក្រោយពីមន្ត្រីបច្ចេកទេសមកពីគណបក្សទាំង២ មិនអាចស្វែងរកការឯកភាពគ្នាលើចំណុចជ្រើសតាំងសមាសភាពគណៈកម្មាធិការជាតិរៀបចំការបោះឆ្នោត ដើម្បីដាក់ស្ថាប័ននេះទៅជាស្ថាប័នធម្មនុញ្ញ ក្នុងពេលពួកគេជួបចរចាគ្នាកាលពីព្រឹកថ្ងៃទី១២ ខែមិថុនា ដោយខាងគណបក្សសង្គ្រោះជាតិ ចង់ឲ្យបោះឆ្នោតអនុម័តក្នុងសភាដោយសំឡេង ២ភាគ៣ ប៉ុន្តែគណបក្សប្រជាជនកម្ពុជា ចង់រក្សាការអនុម័តដោយសំឡេងភាគច្រើនដាច់ខាត ដូចដែលមានចែងក្នុងរដ្ឋធម្មនុញ្ញដដែល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។