មហាសន្និបាតសភាតំបន់អាស៊ីលើកទី៨ ហៅកាត់ជាភាសាអង់គ្លេសថា អេ.ភី.អេ (APA) ដែលត្រូវបានរៀបចំឡើងនៅក្នុងរាជធានីភ្នំពេញ រយៈពេល ៤ថ្ងៃ បានបិទបញ្ចប់ទៅវិញហើយ កាលពីថ្ងៃទី១១ ខែធ្នូ ដោយបានចេញនូវសេចក្ដីថ្លែងការណ៍រួមមួយហៅថា សេចក្តីថ្លែងការណ៍ភ្នំពេញ។
ក្នុងសេចក្ដីថ្លែងការណ៍នោះ សមាជិកសភាមកពីប្រទេសចំនួន២២ ដែលបានចូលរួមមហាសន្និបាតសភាតំបន់អាស៊ី ប្តេជ្ញាគោរពទៅតាមសេចក្ដីសម្រេចសំខាន់ៗមួយចំនួន ក្នុងនោះរួមមាន ការលើកកម្ពស់សន្តិភាព ការផ្សះផ្សា និងការសន្ទនា តាមរយៈការជំរុញលទ្ធិប្រជា ធិបតេយ្យ នីតិរដ្ឋ និងតួនាទីរបស់រដ្ឋសភា ការបញ្ចប់អំពើហិង្សាដើម្បីដោះស្រាយជម្លោះក្នុងទំនាក់ទំនងអន្តរជាតិ ប្រឆាំងរាល់ទម្រង់នៃអំពើភេរវកម្ម ព្រមទាំងការអនុវត្តគោលដៅសហស្សវត្សប្រកបដោយនិរន្តរភាពរបស់អង្គការសហប្រជាជាតិជាដើម។
មហាសន្និបាតសភាតំបន់អាស៊ីលើកទី៨ ធ្វើឡើងក្រោមប្រធានបទ ការជំរុញសន្តិភាព ការផ្សះផ្សា និងការសន្ទនាក្នុងតំបន់អាស៊ី។ លោក ហេង សំរិន ប្រធានរដ្ឋសភាដែលបានចូលរួមថ្លែងបិទមហាសន្និបាតបញ្ជាក់ថា មូលហេតុដែលកម្ពុជា ជ្រើសយកប្រធានបទនេះ ដោយសារកម្ពុជា ធ្លាប់ឆ្លងកាត់សង្គ្រាមអស់ជិត ៣ទសវត្សរ៍ តែទីបំផុតសង្គ្រាមនៅកម្ពុជា បានផុតរលត់ទៅវិញ គឺកើតចេញពីការផ្សះផ្សា និងការសន្ទនា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។