រដ្ឋាភិបាលអូស្ត្រាលី (Australia) កំពុងរៀបចំបែបបទឯកសារបញ្ជូនជនភៀសខ្លួនពីកោះណូរូ (Nauru) ១ពាន់នាក់ មកជ្រកកោននៅកម្ពុជា។
គេហទំព័រសារព័ត៌មានអូស្ត្រាលី អនឡាញ ឈ្មោះថា ញូវស៍ដុតខមដុតអូស (News.com.au) ផ្សាយថ្ងៃទី១៤ សីហា ថា កិច្ចព្រមព្រៀងបញ្ជូនជនភៀសខ្លួនមកកម្ពុជានេះ ភាគីទាំងពីរ អូស្ត្រាលីនិងកម្ពុជា ជិតឈានដល់កិច្ចព្រមព្រាងគ្នាជាចុងបញ្ចប់ហើយ។ តែមន្ត្រីរដ្ឋាភិបាលអូស្ត្រាលី បានបដិសេធនៅសប្ដាហ៍នេះ។
សារព័ត៌មានដដែលឲ្យដឹងថា គម្រោងរៀបចំបញ្ជូនជនភៀសខ្លួនរបស់រដ្ឋាភិបាលអូស្ត្រាលី មកកម្ពុជានេះ ធ្វើឡើងដោយអាថ៌កំបាំង និងមានការរិះគន់យ៉ាងខ្លាំងថា កម្ពុជាមិនមែនជាប្រទេសដែលគួរទទួលជនភៀសខ្លួនទាំងនោះទេ ព្រោះកម្ពុជាជាប្រទេសក្រីក្រ និងរំលោភសិទ្ធិមនុស្សយ៉ាងធ្ងន់ធ្ងរនៅឡើយ។
វិទ្យុអាស៊ីសេរីមិនអាចទាក់ទងមន្ត្រីនាំពាក្យក្រសួងការបរទេស លោក កុយ គួង បាននៅថ្ងៃទី១៤ សីហា សុំការបញ្ជាក់ព័ត៌មាននេះ។ តែកន្លងមកលោកធ្លាប់បញ្ជាក់ថា ភាគីកម្ពុជា មិនទាន់សម្រេចយល់ព្រមទទួលជនភៀសខ្លួនទាំងនោះ តាមសំណើរបស់ភាគីអូស្ត្រាលីនៅឡើយទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។