អាជ្ញាធរខេត្តត្បូងឃ្មុំមិនទាន់រកឃើញអ្នកវាយកម្ទេចបង្គោលរណបព្រំដែន
2015.08.02
បង្គោលរណបលេខ ១១០.៣ ចន្លោះបង្គោលព្រំដែនលេខ ១១០ និង ១១១ ដែលអាជ្ញាធរវៀតណាម និងមន្ត្រីសមត្ថកិច្ចព្រំដែនខ្មែរបោះនៅឃុំដា ស្រុកមេមត់ ខេត្តត្បូងឃ្មុំ កាលពីថ្ងៃទី២៤ ខែកក្កដា ឆ្នាំ២០១៥។
អាជ្ញាធរនៅស្រុកមេមត់ ខេត្តត្បូងឃ្មុំ នៅមិនទាន់កំណត់មុខសញ្ញាបាននៅឡើយទេ ជុំវិញការវាយបង្គោលព្រំដែនដែលជាប្រភេទបង្គោលរណបទើបនឹងបោះក្នុងពេលថ្មីៗនេះ។ យ៉ាងណា ពួកគេថានឹងបន្តស្រាវជ្រាវបន្ថែមទៀតជុំវិញបញ្ហានេះ។ ដោយឡែកមន្ត្រីគណបក្សប្រឆាំងយល់ថា រឿងនេះគឺនៅមានចំណុចគួរឲ្យសង្ស័យមួយចំនួន។
អធិការស្រុកមេមត់ លើកឡើងថា ករណីជនមិនស្គាល់មុខវាយបង្គោលរណបលេខ ១១០.៣ នៅចំណុចឃុំដា គឺសមត្ថកិច្ចនៅមិនទាន់អាចកំណត់មុខសញ្ញាបានយ៉ាងណានៅឡើយទេ។
អធិការនគរបាលស្រុកមេមត់ ដែលទើបនឹងប្ដូរមកថ្មី លោក ហុង គីមហឿន មានប្រសាសន៍ថា ករណីវាយបង្គោលព្រំដែនដែលជាប្រភេទបង្គោលធ្មេញរណារ ឬជាបង្គោលរណបនេះ អាជ្ញាធរមិនទាន់អាចសន្និដ្ឋានបានយ៉ាងណាឡើយមកទល់ពេលនេះ។ លោកបន្តថា ដោយករណីនេះជាដែនសមត្ថកិច្ចរបស់មន្ត្រីកិច្ចការព្រំដែន ដូចនេះខាងលោកគ្រាន់តែជាអ្នកស្រាវជ្រាវ ហើយផ្ញើរបាយការណ៍ជូនគណៈកម្មការព្រំដែនប៉ុណ្ណោះ៖ «នៅបង គឺអាងលើអាជ្ញាធរគណៈកម្មការព្រំដែន ខ្ញុំគ្រាន់តែបានរាយការណ៍ពីបញ្ហាដែលកើតឡើង»។
វិទ្យុអាស៊ីសេរី មិនអាចទាក់ទងមន្ត្រីប៉ុស្តិ៍ការពារព្រំដែននៅឃុំដា បានទេនៅថ្ងៃទី២ សីហា។
បង្គោលរណបលេខ ១១០.៣ ស្ថិតនៅចន្លោះបង្គោលព្រំដែនលេខ ១១០ និង ១១១ ដែលអាជ្ញាធរព្រំដែនកម្ពុជា និងវៀតណាម នាំគ្នាបោះកាលពីថ្ងៃទី២៤ កក្កដា។ ការបោះបង្គោលពេលនោះ គឺរងការរិះគន់ពីប្រជាពលរដ្ឋ និងសមាជិកក្រុមប្រឹក្សាស្រុកមកពីគណបក្សប្រឆាំង ថាធ្វើឡើងដោយលាក់លៀម ព្រមទាំងមិនមានតម្លាភាព។ បន្ថែមពីនេះ គឺធ្វើឡើងក្នុងពេលបញ្ហាព្រំដែននៃប្រទេសទាំងពីរកំពុងមានសភាពតានតឹងខ្លាំងទៀតផង។
ក្រោយបោះបង្គោលរណបនោះបានមួយថ្ងៃ គឺយប់ថ្ងៃទី២៥ កក្កដា បង្គោលស៊ីម៉ងត៍បួនជ្រុងដែលមានលេខសម្គាល់ ១១០.៣ បោះនៅក្បែរប៉ុស្តិ៍ព្រំដែនខ្មែរ គឺត្រូវបានជនមិនស្គាល់មុខវាយកម្ទេចដល់ដី ហើយរបាំងឈើ និងបន្លាដាក់ហ៊ុមព័ទ្ធជុំវិញ ក៏ត្រូវគេយកបោះចោលយ៉ាងស្អាតទៀតផង។
ទាក់ទងបញ្ហានេះ សមាជិកក្រុមប្រឹក្សាស្រុកមេមត់ មកពីគណបក្សសង្គ្រោះជាតិ លោក គង់ សំអាន ដែលចុះពិនិត្យផ្ទាល់ក្រោយកើតហេតុបានមួយថ្ងៃ មានប្រសាសន៍ថា គឺជារឿងគួរឲ្យសង្ស័យ ព្រោះប៉ុស្តិ៍ព្រំដែនខ្មែរចម្ងាយប្រមាណ ៥០ម៉ែត្រពីបង្គោលនោះ ហើយដាក់កម្លាំងយាមកាមទាំងយប់ទាំងថ្ងៃ ប៉ុន្តែបែរជាមិនបានដឹងហេតុការណ៍ដែលកើតឡើងទៅវិញ៖ «មិនសមហេតុផលអីទេ មិនដឹងថាអ្នកណាប្រឌិតរឿងហ្នឹង ឬធ្វើយ៉ាងម៉េចទេ សំខាន់សមត្ថកិច្ចដែលឈរជើងជិតហ្នឹង ថាប្រហែលជា ៥០ម៉ែត្រចុះ ហើយការវ៉ៃបង្គោលមិនបានដឹងឮអ៊ីចឹង យើងមិនដឹងថាត្រូវចោទទៅខាងណា?»។
លោកបន្តថា ដោយសារការបោះបង្គោលរណប គឺធ្វើឡើងដោយមិនមានតម្លាភាព ទើបធ្វើឲ្យពលរដ្ឋមួយចំនួនមិនពេញចិត្ត រហូតឈានដល់មានជនមិនស្គាល់មុខលួចវាយបង្គោលនោះចោល។ លោកស្នើឲ្យរាជរដ្ឋាភិបាល ឬគណៈកម្មការព្រំដែន គប្បីធ្វើសេចក្តីសម្រេចណាពាក់ព័ន្ធរឿងព្រំដែន គឺធ្វើឡើងឲ្យបានត្រឹមត្រូវ និងប្រកបដោយតម្លាភាព។ ម្យ៉ាង ត្រូវមានការចូលរួមពីអាជ្ញាធរមូលដ្ឋាន និងប្រជាពលរដ្ឋទូទៅ ដើម្បីជៀសវាងមានបញ្ហាណាមួយកើតឡើង។
ទាក់ទងបញ្ហាព្រំដែននេះដែរ កន្លងទៅ អ្នកវិភាគ និងមន្ត្រីគណបក្សប្រឆាំងបានលើកឡើងថា ក្នុងកាលៈទេសៈប្រទេសកម្ពុជា នៅមិនទាន់ឯកភាពគ្នាចំពោះរឿងផែនទី ខាងអាជ្ញាធរវៀតណាម មិនត្រូវបន្តបោះបង្គោលព្រំដែនណាមួយទៀតឡើយ។ លើសពីនេះទៀត សមត្ថកិច្ច និងរាជរដ្ឋាភិបាលខ្មែរ ក៏មិនត្រូវអនុញ្ញាតឲ្យមានការបោះបង្គោលព្រំដែនបន្តទៀតដែរ គឺត្រូវរង់ចាំយកផែនទីពីអង្គការសហប្រជាជាតិ និងបណ្ដាប្រទេសមហាអំណាច មកផ្ទៀងផ្ទាត់ជាមួយផែនទីដែលរាជរដ្ឋាភិបាលកម្ពុជា កំពុងប្រើប្រាស់បច្ចុប្បន្នជាមុនសិន។ ជាងនេះទៀត ពួកគេក៏បានជំរុញឲ្យរដ្ឋាភិបាលខ្មែរ គប្បីប្រើប្រាស់យន្តការអន្តរជាតិ ដើម្បីដោះស្រាយវិបត្តិព្រំដែនជាមួយប្រទេសវៀតណាម ទៀតផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
អត្ថបទពេញនិយម
នយោបាយ
- លោក ហ៊ុន សែន បដិសេធការចោទរបស់វៀតណាម ដែលថា ព្រែកជីកហ្វូណនសម្រាប់សម្រួលវត្តមានយោធាចិន
- លោក ហ៊ុន ម៉ាណែត ថ្លែងការពារគម្រោងព្រែកជីកហ្វូណនតេជោ ក្រោយពេលវៀតណាមរិះគន់
- លោក ហ៊ុន សែន ស្នើជួបមេដឹកនាំរដ្ឋប្រហារយោធាភូមាភ្លាមៗក្រោយឡើងតំណែងជាប្រធានព្រឹទ្ធសភា
- ពលរដ្ឋខ្មែរនៅក្រៅប្រទេសចង់ឃើញលោក ហ៊ុន ម៉ាណែត បង្រួបបង្រួមជាតិឡើងវិញក្នុងឱកាសចូលឆ្នាំខ្មែរ
- សមត្ថកិច្ចចាប់មន្ត្រីបក្សភ្លើងទៀនខេត្តកំពង់ចាមបីនាក់ទៀតរឿងក្លែងឯកសារ ខណៈមួយចំនួនរត់គេចខ្លួន