អង្គការសម្ព័ន្ធមិត្តខ្មែរ-អាមេរិកាំង អះអាងថា ការលើកឡើងរបស់លោក ហ៊ុន ម៉ាណែត ដែលថា មិនមកចូលរួមការហែក្បួនវប្បធម៌ខ្មែរក្នុងក្រុងឡុងប៊ិច (Long Beach) រដ្ឋកាលីហ្វ័រញ៉ា (California) ព្រោះខ្លាចសហគមន៍ខ្មែរនៅទីនោះមានការបែកបាក់គ្នា គឺមិនសមហេតុសមផល។
សេចក្ដីថ្លែងការណ៍របស់អង្គការសម្ព័ន្ធមិត្តខ្មែរ-អាមេរិកាំង កាលពីថ្ងៃអង្គារ ទី២៩ ខែមីនា បញ្ជាក់ថា ពួកគេជាសាក្សីផ្ទាល់ ដែលបានឃើញពលរដ្ឋខ្មែរក្នុងសហរដ្ឋអាមេរិក មិនត្រឹមតែនាំគ្នាប្រឆាំងនឹងរដ្ឋាភិបាលផ្ដាច់ការរបស់លោក ហ៊ុន ម៉ាណែត ប៉ុណ្ណោះទេ ប៉ុន្តែពួកគេក៏បានឃើញនូវសាមគ្គីភាព និងការរួបរួមគ្នាក្នុងចំណោមអ្នកផ្ដល់តម្លៃដល់យុត្តិធម៌ និងលទ្ធិប្រជាធិបតេយ្យនៅកម្ពុជា។
អង្គការនេះបានហៅការដឹកនាំរបស់លោក ហ៊ុន សែន ឪពុករបស់លោក ហ៊ុន ម៉ាណែត ថាជារបបដឹកនាំតាមបែបកុម្មុយនិស្ត គាបសង្កត់ទៅលើការនិយាយស្តី ដាក់ទណ្ឌកម្មលើអ្នកហ៊ានបញ្ចេញមតិ និងរឹតត្បិតសិទ្ធិសេរីភាពរបស់ពលរដ្ឋ។ ឧទាហរណ៍មានករណី លោក មាជ សុវណ្ណារ៉ា ពលរដ្ឋខ្មែរ-អាមេរិកាំង និងជាសកម្មជនបក្សប្រឆាំង កំពុងស្ថិតនៅក្នុងពន្ធនាគារដោយសារហេតុផលនយោបាយ។ បន្ថែមពីនេះ តំណាងរាស្ត្របក្សសង្គ្រោះជាតិ ២រូប ដែលទទួលរងនូវការវាយដំយ៉ាងសាហាវ រហូតមកដល់ពេលនេះពួកគេនៅមិនទាន់ទទួលបានយុត្តិធម៌នៅឡើយ។
ចំណែកអង្គការនិងសហគមន៍ខ្មែរ-អាមេរិកាំង ក្នុងរដ្ឋវ៉ាស៊ីនតុន (Washington) វិញ ក៏គ្រោងធ្វើបាតុកម្មប្រឆាំងវត្តមានលោក ហ៊ុន ម៉ាណែត នៅថ្ងៃទី១១ ខែមេសា ខាងមុខនេះដែរ។
អនុប្រធានសំឡេងខ្មែរដើម្បីប្រជាធិបតេយ្យនៅរដ្ឋវ៉ាស៊ីនតុន លោក ញឹក ដានីស មានប្រសាសន៍ថា ពលរដ្ឋខ្មែរនៅទីនេះ មិនស្វាគមន៍វត្តមានលោក ហ៊ុន ម៉ាណែត ទេ ដោយសារលោកជាមេអង្គភាពប្រឆាំងអំពើភេរវកម្មនៃក្រសួងការពារជាតិ ដែលបានរំលោភសិទ្ធិមនុស្សធ្ងន់ធ្ងរ និងបានឃុំខ្លួនសកម្មជនជាច្រើនដែលគ្មានទោសកំហុស៖ «គោលបំណងដែលពួកខ្ញុំធ្វើបាតុកម្មប្រឆាំង ហ៊ុន ម៉ាណែត ដោយសារតែ ហ៊ុន ម៉ាណែត ជាកូន ហ៊ុន សែន ជាជនផ្ដាច់ការ។ ហ៊ុន ម៉ាណែត នេះហើយ ជាជននៅពីក្រោយការសម្លាប់អ្នកធ្វើបាតុកម្មនៅផ្លូវវ៉េងស្រេង ដូចនេះពួកខ្ញុំដាច់ខាតធ្វើបាតុកម្មប្រឆាំង មិនឲ្យមកជាន់ទឹកដីសហរដ្ឋអាមេរិកនេះឡើយ។ មិនទុកចិត្តកុម្មុយនិស្តទេ ព្រោះមានជនមួយក្រុមតូច មានបំណងអញ្ជើញ ហ៊ុន ម៉ាណែត មកដែរ ដូច្នេះពួកខ្ញុំក៏ត្រៀមជាស្រេចឲ្យតែមកគឺធ្វើបាតុកម្មប្រឆាំង...»។
សេចក្ដីប្រកាសព័ត៌មានរបស់សហគមន៍ខ្មែរ-អាមេរិកាំង ក្នុងរដ្ឋវ៉ាស៊ីនតុន កាលពីថ្ងៃអង្គារ ទី២៩ មីនា គូសបញ្ជាក់ថា ធាតុពិតនៃវត្តមានរបស់លោក ហ៊ុន ម៉ាណែត គឺដើម្បីពង្រីកបណ្ដាញ និងឥទ្ធិពលបក្សកាន់អំណាចរបស់ឪពុកលោកប៉ុណ្ណោះ។
រីឯពលរដ្ឋខ្មែរ-អាមេរិកាំង នៅក្រុងឡូវែល (Lowell) រដ្ឋម៉ាស្សាឈូសេត (Massachusetts) ក៏ត្រៀមធ្វើបាតុកម្មប្រឆាំងលោក ហ៊ុន ម៉ាណែត ដែរ។ ពលរដ្ឋខ្មែរ-អាមេរិកាំង ម្នាក់នៅក្រុងឡូវែល លោក ខេក ខេមរា ប្រាប់វិទ្យុអាស៊ីសេរី តាមទូរស័ព្ទអំពីគោលបំណងសំខាន់នៃការធ្វើបាតុកម្មនេះ៖ «ធ្វើបាតុកម្មដើម្បីឲ្យគាត់និងឪពុកគាត់បានដឹងថា ខ្មែរយើងនៅអាមេរិក មិនចូលចិត្តការដឹកនាំរបស់ពួកគាត់នៅស្រុកខ្មែរ។ លោក ហ៊ុន ម៉ាណែត មកនេះ គឺដៃរបស់គាត់ប្រឡាក់ឈាមជាមួយឪពុក ឲ្យដើរចូលមកសាលាក្រុងរបស់យើងនេះដូចយកឈាមមកប៉ាតនៅកន្លែងមួយដ៏ស្អាតស្អំ»។
លោក ខេក ខេមរា ឱ្យដឹងថា ពលរដ្ឋខ្មែរ-អាមេរិកាំង ប្រមាណ ២០០ ទៅ ៣០០នាក់ បាននាំគ្នាទៅតវ៉ានៅសាលាក្រុងកាលពីល្ងាចថ្ងៃអង្គារ ដើម្បីទាមទារឲ្យចៅហ្វាយក្រុងឡូវែល លោក អេដវឺដ ខេនណឺឌី (Edward Kennedy) កុំទទួលកាដូជារូបសំណាកព្រះកេសព្រះបាទជ័យវរ្ម័នទី៧ ពីលោក ហ៊ុន ម៉ាណែត និងកុំឲ្យទទួលស្វាគមន៍លោក ហ៊ុន ម៉ាណែត ជាផ្លូវការ នៅថ្ងៃទី១៦ ខែមេសា ខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។