អង្គការខ្មែរ-អាមេរិកាំងដើម្បីសិទ្ធិមនុស្សនិងលទ្ធិប្រជាធិបតេយ្យ ហៅកាត់ជាភាសាអង់គ្លេសថា ខារ៉ាត (CAHRAD) គ្រោងរៀបចំវេទិកាតុមូលមួយដើម្បីពិភាក្សាពីស្ថានការណ៍នយោបាយនៅកម្ពុជា បន្ទាប់ពីគណបក្សសង្គ្រោះជាតិ និងគណបក្សប្រជាជនកម្ពុជា បានព្រមព្រៀងគ្នាកាលពីថ្ងៃទី២២ ខែកក្កដា កន្លងមកនេះ។
វេទិកានេះ គឺក្នុងគោលដៅចូលរួមក្នុងទិវាអន្តរជាតិដើម្បីលទ្ធិប្រជាធិបតេយ្យ (International Day of Democracy) ថ្ងៃច័ន្ទ ទី១៥ ខែកញ្ញា ខាងមុខ។
សមាជិកក្រុមប្រឹក្សាភិបាលនៃអង្គការខារ៉ាត លោក ព្រហ្ម សៅរ៍នរ៉ា មានប្រសាសន៍ប្រាប់វិទ្យុអាស៊ីសេរី តាមទូរស័ព្ទថា សហគមន៍ខ្មែរ-អាមេរិកាំង នៅសហរដ្ឋអាមេរិក មានទស្សនៈ និងយោបល់ខុសៗគ្នា បន្ទាប់ពីគណបក្សសង្គ្រោះជាតិ បានយល់ព្រមចូលប្រជុំសភាទទួលយកតំណែងអនុប្រធានសភា និងតួនាទីជាប្រធានគណៈកម្មការជំនាញរដ្ឋសភាចំនួន ៥រួចមក។
លោក ព្រហ្ម សៅរ៍នរ៉ា បន្តថា កិច្ចពិភាក្សាតុមូលនេះ គឺជាឱកាសសម្រាប់ពលរដ្ឋខ្មែរអាមេរិកាំង ចូលរួមបញ្ចេញទស្សនៈយោបល់របស់ខ្លួនដើម្បីអាចធ្វើការរួមគ្នាក្នុងគោលដៅតែមួយ ដើម្បីជំរុញឲ្យមានឯករាជភាពលទ្ធិប្រជាធិបតេយ្យ និងវឌ្ឍនភាពក្នុងប្រទេសកម្ពុជា៖ «យើងទាំងអស់គ្នាជាប្រជាពលរដ្ឋខ្មែរអាមេរិកាំង ដែលលើកតម្កើងទិវាអន្តរជាតិដើម្បីលទ្ធិប្រជាធិបតេយ្យ ដូច្នេះហើយយើងនឹងជួបជុំគ្នាដើម្បីបញ្ចេញមតិយោបល់អំពីគ្រឹះនៃប្រជាធិបតេយ្យ ហើយយើងនឹងជជែកពីបញ្ហាដែលគណបក្សទាំងពីរចូលរួបរួមគ្នា។ តើកិច្ចការអស់ហ្នឹងមានមតិខ្លះប្រតិកម្មរិះគន់យ៉ាងខ្លាំង និងខ្លះទៀតគាំទ្រ ដូច្នេះគេអាចបញ្ចេញគំនិតរបស់ខ្លួន...»។
កិច្ចពិភាក្សាតុមូលនេះរៀបចំធ្វើឡើងនៅថ្ងៃអាទិត្យ ទី១៤ ខែកញ្ញា ពីម៉ោង ១ ដល់ម៉ោង ៤រសៀល នៅក្រុងអានែនដែល (Annandale) រដ្ឋវឺជីនីញ៉ា (Virginia-VA) សហរដ្ឋអាមេរិក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។