លោកបណ្ឌិត ហ្គាហ្វា ពៀង មេត គឺជាសាស្ត្រាចារ្យច្បាប់បង្រៀនផ្នែកវិទ្យាសាស្ត្រនយោបាយនៃសាកលវិទ្យាល័យ ហ្គ័ម (Guam) ដែលបច្ចុប្បន្នលោកបានចូលនិវត្តន៍ និងកំពុងរស់នៅសហរដ្ឋអាមេរិក។ លោកគូសបញ្ជាក់ក្នុងអត្ថបទរបស់លោកថា លោកនាយករដ្ឋមន្ត្រី ហ៊ុន សែន នឹងមិនទៅណាទេក្នុងពេលឆាប់ៗនោះទេ ពោលគឺលោកនៅតែកាន់អំណាចយូរតទៅទៀត។ ប្រសិនបើក្រុមអ្នកប្រជាធិបតេយ្យទទួលស្គាល់ប្រការនេះកាន់តែឆាប់ គឺកាន់តែប្រសើរ ហើយនាំគ្នាងាកមកខិតខំប្រឹងប្រែងក្នុងការកសាងឯកភាព និងសាមគ្គីភាព តាមរយៈយុទ្ធសាស្ត្រអហិង្សាវិញ នោះជាការឈ្លាសវៃបំផុត។
ឆ្លើយតបនឹងការវិភាគផ្ដល់យោបល់នេះ មន្ត្រីនាំពាក្យគណបក្សសង្គ្រោះជាតិ លោក យឹម សុវណ្ណ ថ្លែងថា គណបក្សនេះបានអនុវត្តនូវចំណុចទាំងឡាយនោះរួចមកហើយ ដែលជាកត្តានាំឱ្យគណបក្សសង្គ្រោះជាតិ ទទួលបានជោគជ័យយ៉ាងធំធេងក្នុងការបោះឆ្នោតអាណត្តិទី៥នេះ។
លោក យឹម សុវណ្ណ៖ «តាងនាមគណបក្សសង្គ្រោះ យើងខ្ញុំសូមអរគុណចំពោះការប្រឹក្សាផ្ដល់យោបល់ដ៏ល្អ។ អ្វីដែលលោកនិយាយ គឺជាអ្វីដែលយើងខ្ញុំបានធ្វើ កំពុងធ្វើ ហើយនឹងធ្វើជាបន្តទៅទៀត ព្រោះពួកយើងខ្ញុំបានធ្វើរួចរាល់អស់ហើយក្នុងរយៈពេលជិត ២០ឆ្នាំហើយ។ យើងខ្ញុំមានកម្លាំងគ្រប់គ្រាន់សម្រាប់ដឹកនាំប្រទេស។ អ្វីដែលខ្វះខាត គឺខ្វះឆន្ទៈនយោបាយពីខាងភាគីគណបក្សកាន់អំណាចទេ។ យើងអាចនឹងដឹងបានថា យើងនឹងត្រូវធ្វើយ៉ាងដូចម្ដេច ដើម្បីឱ្យមានការឯកភាពជាតិ ដើម្បីរក្សាសាមគ្គីភាពផ្ទៃក្នុង ហើយនឹងឈានទៅរកការដឹកនាំប្រទេសនៅពេលខាងមុខ…»។
លោក យឹម សុវណ្ណ លើកឡើងជាថ្មីទៀតថា លទ្ធផលពិតបោះឆ្នោតអាណត្តិនេះ គឺគណបក្សសង្គ្រោះជាតិជាអ្នកឈ្នះ។
ប៉ុន្តែលោក កែម ឡី អ្នកវិភាគឯករាជ្យបានបង្ហាញការយល់ស្របទៅនឹងអត្ថបទរបស់លោកបណ្ឌិត ហ្គាហ្វា ពៀង មេត ដែលថា គណបក្សសង្គ្រោះជាតិ ចាំបាច់ត្រូវពង្រឹងសមត្ថភាពធនធានមនុស្សជាអ្នកដឹកនាំឱ្យបានជ្រាលជ្រៅថែមទៀត ដើម្បីអាចជួយសង្គមជាតិខ្មែរ ឱ្យទទួលបានផលប្រយោជន៍ខ្ពស់បំផុតក្នុងវិស័យសិទ្ធិសេរីភាព យុត្តិធម៌ និងនីតិរដ្ឋ។
លោក កែម ឡី៖ «…លោកដុកទ័រ គាត់និយាយឱ្យពង្រឹងវិភាគមុខងារភារកិច្ចក្នុងគណបក្ស ពង្រឹងភាពជាអ្នកដឹកនាំ ប្រព័ន្ធគណបក្សនោះ គឺត្រឹមត្រូវហើយ។ តាមពិតកន្លងមក គឺដោយសារគណបក្សប្រជាជនគាត់ធ្វេសប្រហែស គាត់បង្កើតបញ្ហាច្រើនក្នុងសង្គម ធ្វើឱ្យប្រជាជនឈឺចាប់ច្រើន បានជាប្រជាជនអស់ជម្រើស គឺរត់មកពឹងគណបក្សសង្គ្រោះជាតិ។ ហ្នឹងដែលខ្ញុំចង់និយាយ…»។
លោក កែម ឡី ក៏បានយល់ស្របផងដែរ ចំពោះចំណុចដែលលោកបណ្ឌិត ហ្គាហ្វា ពៀង មេត លើកឡើងថា លោកនាយករដ្ឋមន្រ្តី ហ៊ុន សែន នៅតែកាន់អំណាចយូរតទៅទៀត មិនចុះចេញពីតំណែងងាយៗនោះទេ ហើយនិងចំណុចដែលថា គណបក្សសង្គ្រោះជាតិ គប្បីប្រើរយៈពេល ៥ឆ្នាំនៃអាណត្តិថ្មីនេះ ដើម្បីពង្រឹងធនធានមនុស្សក្នុងការដឹកនាំប្រទេស ដើម្បីកាត់បន្ថយបន្តិចម្តងៗនូវរបបគ្រប់គ្រងបែបអនាធិបតេយ្យ និងភាពអយុត្តិធម៌ក្នុងសង្គមជាតិកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។