ក្រសួងការបរទេសកម្ពុជាដាក់កំណត់ទូតទៅថៃតវ៉ាប្រឆាំងនឹងការបាញ់សម្លាប់ពលរដ្ឋខ្មែរ
2014.10.25
ក្រសួងការបរទេសកម្ពុជា ដាក់កំណត់ទូតទៅរាជរដ្ឋាភិបាលថៃ តវ៉ាប្រឆាំងនឹងការបាញ់សម្លាប់ប្រជាពលរដ្ឋខ្មែរ ដោយទាហានថៃ ដោយគ្រាន់តែសង្ស័យថាឆ្លងដែនចូលក្នុងទឹកដីថៃ ទៅលួចម៉ូតូមួយគ្រឿង។ ក្រុមអង្គការមិនមែនរដ្ឋាភិបាល ហៅមធ្យោបាយកំណត់ទូតរបស់រដ្ឋាភិបាល ថាជាមធ្យោបាយដែលពុំមានប្រសិទ្ធភាព។
មន្ត្រីអង្គការមិនមែនរដ្ឋាភិបាល ជំរុញអោយរដ្ឋាភិបាលកម្ពុជា រាយការណ៍ពីការបាញ់សម្លាប់ពលរដ្ឋខ្មែរដោយទាហានថៃ នៅតាមព្រំដែន ទៅសហគមន៍អន្តរជាតិ រួមមានអង្គការសហប្រជាជាតិ តុលាការព្រហ្មទណ្ឌអន្តរជាតិ (ICC) និងសមាគមប្រជាជាតិអាស៊ីអាគ្នេយ៍ ហៅកាត់ថាអាស៊ាន (ASEAN) ជាដើម។
ប្រធានផ្នែកស៊ើបអង្កេតនៃសមាគមការពារសិទ្ធិមនុស្សអាដហុក (Adhoc) លោក នី ចរិយា មានប្រសាសន៍ថា ប្រទេសថៃ ហាក់មិនអើពើចំពោះការតវ៉ារបស់កម្ពុជា ទេ។ លោកថា កម្ពុជា គួររិះរកមធ្យោបាយផ្សេងទៀត ជាពិសេស គឺគួរសម្លឹងមើលស្ថាប័នអន្តរជាតិចំនួន ដែលបំពេញការងារធានាសិទ្ធិមនុស្ស។ លើសពីនេះ លោកថា រដ្ឋាភិបាលគួរបើកទូលាយអោយភាគីពាក់ព័ន្ធចូលរួមស៊ើបអង្កេត និងដាក់របាយការណ៍៖ «ខ្ញុំជឿថា ដោយសារយើងជារដ្ឋភាគីមួយ និងជារដ្ឋសមាជិកនៃអង្គការសហប្រជាជាតិយើងគួរតែឈប់ប្រើយន្តការអស់នេះទៅ គឺយន្តការទ្វេភាគីហ្នឹងយើងមិនដែលស្មើមុខមាត់ជាមួយថៃជាមួយនឹងវៀតណាមទេ តាមខ្ញុំមើល»។
មិនខុសគ្នានេះដែរ មន្ត្រីអង្គការសិទ្ធិមនុស្សលីកាដូ (Licadho) លោក អំ សំអាត មានប្រសាសន៍ថា រដ្ឋាភិបាលក៏អាចបញ្ជូនបញ្ហានេះទៅសមាគមអាស៊ានដែរ៖ «ដើម្បីជំរុញអោយប្រទេសថៃហ្នឹង គោរពទៅតាមធម្មនុញ្ញសិទ្ធិមនុស្សអាស៊ាន កុំអោយមានការកាប់សម្លាប់មកលើពលរដ្ឋខ្មែរបន្តទៅទៀត»។
ការលើកឡើងរបស់ក្រុមអង្គការមិនមែនរដ្ឋាភិបាលនេះ គឺបន្ទាប់ពីក្រសួងការបរទេសកម្ពុជា ដាក់កំណត់ទូតថ្មីមួយទៅរាជរដ្ឋាភិបាលថៃ។ កំណត់ទូតដែលចេញកាលពីថ្ងៃទី២៤ ខែតុលា ដាក់ទៅស្ថានទូតថៃ ប្រចាំនៅកម្ពុជា បញ្ជាក់ថា រដ្ឋាភិបាលកម្ពុជា ប្រឆាំងដាច់ខាតចំពោះការអំពើហិង្សាដែលប្រព្រឹត្តដោយទាហានថៃ និងបានចាត់ទុកទង្វើនោះ ថាបានរំលោភលើគោលការណ៍មនុស្សធម៌ជាមូលដ្ឋាន រំលោភបំពានស្មារតីភាពអ្នកជិតខាងល្អ និងមិត្តភាពរវាងប្រទេសទាំងពីរ។
រដ្ឋលេខាធិការ និងជាអ្នកនាំពាក្យក្រសួងការបរទេស លោក កុយ គួង មានប្រសាសន៍ថា កម្ពុជា ទាមទារអោយអាជ្ញាធរថៃ ជៀសវាងប្រើវិធានការហិង្សា ការបាញ់សម្លាប់ ប៉ុន្តែត្រូវប្រើប្រាស់វិធានការច្បាប់ចំពោះអ្នកប្រព្រឹត្តិល្មើស៖ «សុំបើមានការខុសឆ្គងនៅលើទឹកដីហ្នឹង សុំអោយចាប់ផ្តន្ទាទោសតាមផ្លូវច្បាប់ទៅ យើងមិនមានថាអ្វីទេ ព្រោះប្រទេសរៀងៗខ្លួនសុទ្ធតែមានច្បាប់ដូចគ្នា»។
ការដាក់កំណត់ទូតរបស់តំណាងរដ្ឋាភិបាលកម្ពុជា នៅពេលនេះ គឺបន្ទាប់ពីទាហានថៃ ខេត្តសុរិន្ទ ដែលជាប់ព្រំប្រទល់គ្នាតំបន់អូរស្មាច់ ខេត្តឧត្តរមានជ័យ បានបាញ់សម្លាប់ពលរដ្ឋខ្មែរម្នាក់ កាលពីថ្ងៃទី២៣ ខែតុលា នៅពេលឆ្លងដែនចូលក្នុងទឹកដីថៃ និងសង្ស័យថាលួចម៉ូតូម៉ាកស្គូពីពណ៌ស (Honda Scoopy) មួយគ្រឿង។ ក្នុងកំណត់ទូតរបស់ក្រសួងការបរទេស បញ្ជាក់ថា យុវជនរងគ្រោះឈ្មោះ សឿន វ៉ន ភេទប្រុស អាយុ ២១ឆ្នាំ ប៉ុន្តែសាច់ញាតិបញ្ជាក់ថា យុវជនរូបនោះឈ្មោះ ហេង ម៉េងអ៊ី។
ទាក់ទិននឹងករណីនេះ របាយការណ៍របស់អង្គការអាដហុករកឃើញថា មកដល់ពេលនេះមានពលរដ្ឋខ្មែរចំនួន ២៥នាក់ហើយដែលត្រូវបាញ់សម្លាប់ដោយទាហានថៃ ការពារព្រំដែន ភាគច្រើននៃអ្នកទាំងនោះ គឺបានឆ្លងដែនទៅកាប់ឈើគ្រញូងក្នុងទឹកដីថៃ៕