កម្ពុជា និងថៃ កាលពីថ្ងៃសៅរ៍ ទី១៩ ធ្នូ បានសេចក្តីប្រកាសព័ត៌មានរួម ស្ដីពីការពង្រឹងទំនាក់ទំនងការទូតរវាងភាគីទាំងពីរឲ្យកាន់តែរឹងមាំ ដើម្បីផលប្រយោជន៍ទៅវិញទៅមកសម្រាប់ប្រជាជាតិទាំងពីរ។
សេចក្តីប្រកាសព័ត៌មានរួមនេះ ធ្វើឡើងក្នុងដំណើរទស្សនកិច្ចផ្លូវការរបស់លោកនាយករដ្ឋមន្ត្រី ហ៊ុន សែន នៅប្រទេសថៃ និងក្នុងកិច្ចប្រជុំគណៈរដ្ឋមន្ត្រីចម្រុះលើកទី២ កម្ពុជា-ថៃ នាទីក្រុងបាងកក ថ្ងៃទី១៨-១៩ ខែធ្នូ ឆ្នាំ២០១៥។ ក្នុងឱកាសនោះដែរ នាយករដ្ឋមន្ត្រីនៃប្រទេសទាំងពីរ គឺលោក ហ៊ុន សែន និងលោក ប្រាយុទ្ធ ចាន់អូចា (Prayuth Chan-o-cha) ក៏បានជួបពិភាក្សាការងារមួយចំនួនដែរ។
ក្នុងសេចក្តីប្រកាសរួមដដែលនោះ បានឲ្យដឹងថា នៅចុងបញ្ចប់នៃទស្សនកិច្ច និងកិច្ចប្រជុំគណៈរដ្ឋមន្ត្រីចម្រុះ កម្ពុជា-ថៃ មានឯកសារចំនួន៥ ដែលត្រូវបានចុះហត្ថលេខាគ្នា ក្នុងនោះរួមមាន សេចក្តីថ្លែងការណ៍រួមនៃកិច្ចប្រជុំគណៈរដ្ឋមន្ត្រីចម្រុះ កម្ពុជា-ថៃ លើកទី២ ដែលនឹងជួយតម្រង់ទិសសម្រាប់ទំនាក់ទំនងទ្វេភាគី និងកិច្ចសហប្រតិបត្តិការនាពេលអនាគត អនុស្សរណៈនៃការយោគយល់គ្នាស្ដីពីការអភិវឌ្ឍអគារត្រួតពិនិត្យនៅច្រកព្រំដែនស្ទឹងបត់ (កម្ពុជា)-ណងអៀន (ថៃ) អនុស្សរណៈនៃការយោគយល់គ្នាស្ដីពីកិច្ចសហប្រតិបត្តិការលើវិស័យការងារ។
ទាក់ទងបញ្ហាសន្តិសុខវិញ ភាគីទាំងពីរបានឯកភាពពន្លឿនការចាប់ផ្ដើមការធ្វើល្បាត ដោយសហការគ្នានៅតាមបណ្តោយតំបន់ព្រំដែន ដើម្បីបង្ក្រាបការកាប់ឈើខុសច្បាប់ និងពង្រឹងបន្ថែមទៀតនូវកិច្ចសហប្រតិបត្តិការលើការប្រយុទ្ធប្រឆាំងការជួញដូរគ្រឿងញៀន ការជួញដូរមនុស្ស និងឧក្រិដ្ឋកម្មឆ្លងដែន។
ជាមួយគ្នានោះដែរ ភាគីទាំងពីរបានឯកភាពកែលំអសេវាកម្មការដឹកជញ្ជូនតាមផ្លូវថ្នល់ សមុទ្រ និងរថភ្លើង។ សេវាកម្មរថភ្លើងរវាងទីក្រុងបាងកក និងរាជធានីភ្នំពេញ នឹងចាប់ផ្ដើមដំណើរការនៅដំណាច់ឆ្នាំ២០១៦ ខាងមុខនេះ។
ចំណែកវិស័យកសិកម្មវិញ ភាគីទាំងពីរបានឯកភាពកោះប្រជុំក្រុមការងារ ស្ដីពីកិច្ចសហប្រតិបត្តិការលើវិស័យកសិកម្ម ដើម្បីពិភាក្សាពីវិធានការក្នុងការពង្រឹងកិច្ចសហប្រតិបត្តិការលើនេះឲ្យបានឆាប់។ ភាគីថៃ នឹងផ្តល់ការគាំទ្រផ្នែកបច្ចេកទេស ដោយផ្អែកលើមូលដ្ឋាននៃគម្រោងសម្រាប់រយៈពេលបីឆ្នាំ។
ដោយឡែកខាងវិស័យទេសចរណ៍ ភាគីទាំងពីរបានឯកភាពបន្តជំរុញយុទ្ធនាការ "គោលដៅតែមួយ" ដើម្បីទាក់ទាញអ្នកទេសចរបន្ថែមទៀតនៅក្នុងប្រទេសទាំងពីរ ដូចជាទីតាំងបេតិកភណ្ឌពិភពលោក និងតំបន់ប្រវត្តិសាស្ត្រ ក៏ដូចជាការលើកកម្ពស់ទេសចរណ៍តាមរយៈការតភ្ជាប់ផ្លូវសមុទ្រ ជាពិសេសរវាងកម្ពុជា-ថៃ-វៀតណាម។
ជំនួបរវាង លោក ហ៊ុន សែន និងលោក ប្រាយុទ្ធ ចាន់អូចា នៅក្រុងបាងកក នេះ គឺធ្វើឡើងនៅស្របពេលថៃ នៅតែបន្តសកម្មភាពរុលចូលក្នុងតំបន់ប្រាសាទព្រះវិហារ ផ្ទុយនឹងសាលដីកាសម្រេចរបស់តុលាការយុត្តិធម៌អន្តរជាតិ ដូចជាករណីចូលកាត់សោទ្វាររបងច្រកចូលប្រាសាទព្រះវិហារ កាលពីថ្ងៃទី១៧ ខែធ្នូ ប៉ុន្តែនៅក្នុងសេចក្តីប្រកាសរួម ពុំបានលើកចំបញ្ហានេះមកពិភាក្សា ឬបង្ហាញនូវដំណោះស្រាយយ៉ាងណានោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។