បក្សសង្គ្រោះជាតិចោទក្បួនឃោសនាបក្សប្រជាជនស្រុកពញាឮតាមរំខាន
ដោយ ដែន អយុធ្យា
ខេត្តកណ្ដាល៖ គណបក្សសង្គ្រោះជាតិ បន្តចោទគណបក្សប្រជាជនកម្ពុជា ថាបាននាំក្បួនម៉ូតូ និងរថយន្តជាច្រើនគ្រឿងតាមរំខានក្បួនឃោសនារបស់ខ្លួន នៅស្រុកពញាឮ ខេត្តកណ្ដាល គ្មានសមត្ថកិច្ចស្ថាប័នពាក់ព័ន្ធណាមួយជួយទប់ស្កាត់ទេ។
បញ្ហានេះ ទាំងមន្ត្រីសង្គមស៊ីវិល និងអ្នកវិភាគស្ថានការណ៍សង្គមឯករាជ្យ បានចាត់ទុកសកម្មភាពរំខានរបស់បក្សកាន់អំណាច បានអនុវត្តផ្ទុយនីតិវិធីបោះឆ្នោត និងជាទង្វើគំរាមកំហែង។
សូមស្ដាប់សេចក្ដីរាយការណ៍របស់លោក ដែន អយុធ្យា ដូចតទៅ៖
គ.ខ.ប ខេត្តបាត់ដំបង ទទួលបានបណ្ដឹង២២
ដោយ សួន សុផលមុន្នី
ខេត្តបាត់ដំបង៖ គណៈកម្មការរៀបចំការបោះឆ្នោតខេត្តបាត់ដំបង បានឲ្យដឹងថា ចាប់តាំងពីថ្ងៃ២៧ ខែមិថុនា រហូតមកត្រឹមថ្ងៃទី១៣ កក្កដា នេះ គេទទួលបានពាក្យបណ្ដឹងចំនួន២២ ដែលគណបក្សនយោបាយចំនួនពីរបានប្ដឹងទាក់ទិនទៅនឹងភាពមិនប្រក្រតីមួយចំនួន ដែលកើតមានឡើងក្នុងថ្ងៃឃោសនាបោះឆ្នោត។
សូមស្ដាប់សេចក្ដីរាយការណ៍របស់លោក សួន សុផលមុន្នី ដូចតទៅ៖
បក្សប្រជាជនរងការចោទថាបង្ខិតបង្ខំសមាជិកបក្សសង្គ្រោះជាតិឲ្យចុះចូល
ដោយ សួន សុផលមុន្នី
ខេត្តប៉ៃលិន៖ បេក្ខជនឈរឈ្មោះតំណាងរាស្ត្រលំដាប់លេខរៀងទី២ របស់គណបក្សសង្គ្រោះជាតិ នៅខេត្តប៉ៃលិន រងការបង្ខិតបង្ខំឲ្យចុះចូលជាមួយគណបក្សប្រជាជនកម្ពុជា បើពុំដូច្នេះទេ បេក្ខជនគណបក្សប្រឆាំងរូបនេះនឹងត្រូវបញ្ចប់អាជីពមុខរបរលក់ថ្នាំពេទ្យនៅក្នុងខេត្តប៉ៃលិន។
មន្ត្រីគណបក្សសង្គ្រោះជាតិ ប្រចាំខេត្តប៉ៃលិន លោកស្រី វ៉េន ដារ៉ា បញ្ជាក់កាលពីថ្ងៃទី១៣ កក្កដា ថា ក្រុមអាជ្ញាធរ និងមន្ត្រីជំនាញដែលសុទ្ធសឹងតែជាមន្ត្រីរបស់គណបក្សប្រជាជនកម្ពុជា កាលពីពេលថ្មីៗនេះ បានចុះទៅឆែកឆេរលំនៅឋានរបស់លោក ស៊ូ ឌីណា ជាបេក្ខជនឈរឈ្មោះលំដាប់លេខរៀងទី២ របស់គណបក្សសង្គ្រោះជាតិ ប្រចាំខេត្តប៉ៃលិន៖ «គេសួរថា បើចង់លក់ថ្នាំវិញ សុខចិត្តបញ្ចប់អាជីព ឬមួយក៏សុខចិត្តចូលជាមួយគេ។ គាត់លក់ថ្នាំពេទ្យ ហើយគេថា ថ្នាំនោះខុសច្បាប់ គេថាគ្មានអាជ្ញាធរប័ណ្ណច្បាស់លាស់ គេចោទអ៊ីចឹង...»។
វិទ្យុអាស៊ីសេរី ពុំអាចសុំសេចក្ដីបញ្ជាក់បន្ថែមពីលោក ស៊ូ ឌីណា ជុំវិញបញ្ហានេះបានទេ។ ប៉ុន្តែ លោកស្រី វ៉េន ដារ៉ា អះអាងថា លោក ស៊ូ ឌីណា បានបង់លុយផាកពិន័យអស់ចំនួន ១លានរៀល ទៅឲ្យមន្ទីរសុខាភិបាល និងបានបិទទ្វារផ្ទះរបស់ខ្លួនឈប់លក់ថ្នាំពេទ្យតទៅមុខទៀត ប៉ុន្តែ លោក ស៊ូ ឌីណា បានបដិសេធមិនព្រមចុះចូលជាមួយគណបក្សប្រជាជនកម្ពុជា តាមការបង្ខិតបង្ខំនោះឡើយ។
គ.ខ.ប ខេត្តស្វាយរៀង ទទួលបានបណ្ដឹង១១
ដោយ ហ៊ុំ ចំរើន
ខេត្តស្វាយរៀង៖ ដំណើរការយុទ្ធនាការឃោសនារកសំឡេងឆ្នោតរបស់គណបក្សនយោបាយនានាក្នុងខេត្តស្វាយរៀង គិតចាប់ពីថ្ងៃទី២៧ មិថុនា ដល់ថ្ងៃទី១៣ កក្កដា ពុំមានអំពើហិង្សាកើតឡើងទេ តែមានពាក្យបណ្ដឹងចំនួន១១។ ដោយឡែកគណៈកម្មការខេត្តរៀបចំការបោះឆ្នោត (គ.ខ.ប) យល់ឃើញថា ការឃោសនារកសំឡេងឆ្នោតឆ្នាំនេះមានភាពល្អប្រសើរជាងឆ្នាំមុនៗ។
តើប្រជាពលរដ្ឋ និងគណបក្សនយោបាយនានាវិញ យល់ឃើញយ៉ាងណាដែរចំពោះបញ្ហានេះ?
សូមស្ដាប់សេចក្ដីរាយការណ៍របស់លោក ហ៊ុំ ចំរើន ដូចតទៅ៖
ការបោះឆ្នោតសភាអាណត្តិទី៥ មានគណបក្សចំនួន៨ បានចូលរួមប្រកួតប្រជែង។ គណៈកម្មាធិការជាតិរៀបចំការបោះឆ្នោត បានកំណត់ថា សកម្មភាពឃោសនាដោយឧបករណ៍បំពងសំឡេង ត្រូវហាមឃាត់ចាប់ពីម៉ោង ១២ថ្ងៃត្រង់ ដល់ម៉ោង ២រសៀល។ ហើយថា គ្រប់សកម្មភាពឃោសនារបស់គណបក្សនយោបាយ ត្រូវឈប់សម្រាកនៅចន្លោះពីម៉ោង ១០យប់ ដល់ម៉ោង ៦ព្រឹក។ ការឃោសនាត្រូវចប់ ២៤ម៉ោងមុនថ្ងៃបោះឆ្នោតមកដល់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។