យុវជនបក្សសង្គ្រោះជាតិ ជាច្រើននាក់ បានអះអាងថា មានការចាប់ខ្លួនយុវជនរបស់ខ្លួនចំនួន ៣នាក់ ហើយទាមទារឱ្យមានអន្តរាគមន៍ដោះលែងអ្នកទាំងនោះ។ មិនត្រឹមតែប៉ុណ្ណោះ មានយុវជនមួយចំនួនរងរបួស ដែលនេះជាករណីហិង្សាខ្លាំងជាងគេ គិតចាប់តាំងពីថ្ងៃដំបូងនៃយុទ្ធនាការឃោសនាបោះឆ្នោត។
នៅព្រឹកថ្ងៃទី៦ កក្កដា នេះ ព្រះរាជអាជ្ញារងសាលាដំបូងរាជធានីភ្នំពេញ លោក មាស ច័ន្ទពិសិដ្ឋ រួមជាមួយស្នងការនគរបាល លោក ជួន សុវណ្ណ តំណាងគណបក្សសង្គ្រោះជាតិ និងមន្ត្រីសង្គមស៊ីវិលមួយចំនួន បានចុះទៅត្រួតពិនិត្យកាមេរ៉ាសុវត្ថិភាព នៅគេហដ្ឋានដែលមានអំពើហិង្សា និងការផ្ទុះអាវុធកាលពីយប់ថ្ងៃទី៥។ ក្រោមការត្រួតពិនិត្យរបស់សមត្ថកិច្ច និងការអង្កេតដោយផ្ទាល់ពីសង្គមស៊ីវិលរកឃើញថា មិនមានការចាប់សកម្មជនជាយុវជនរបស់គណបក្សសង្គ្រោះជាតិនោះឡើយ។
តាមការកត់សម្គាល់របស់បុគ្គលិកផ្នែកសម្របសម្រួលសន្តិសុខគណបក្សសង្គ្រោះជាតិ លោក អ៊ិន សំអុល បានបញ្ជាក់ថា រូបលោកបានឃើញក្នុងរូបភាពកាមេរ៉ា មានបុរសម្នាក់ចេញពីក្នុងផ្ទះទៅប្រតាយប្រតប់ជាមួយយុវជនគណបក្សសង្គ្រោះជាតិ នៅខាងក្រៅរបងផ្ទះ ហើយឃើញមានស្ត្រីម្នាក់ជាសមាជិកក្នុងផ្ទះ ចេញទៅក្រៅទាញបុរសជាសមាជិកគ្រួសារផ្ទះខាងលើចូលមកក្នុងផ្ទះវិញ។
សមត្ថកិច្ចចម្រុះបានសម្រេចដកហូតក្បាលម៉ាស៊ីនកាមេរ៉ាមួយគ្រឿងដែលមានរូបអំពើហិង្សានោះ បញ្ជូនទៅរក្សាទុកនៅទីបញ្ជាការដ្ឋានកងរាជអាវុធហត្ថរាជធានីភ្នំពេញ ទុកជាភស្តុតាង បន្ទាប់ពីពិនិត្យកាមេរ៉ា នោះរួច។
អតីតតំណាងរាស្ត្រគណបក្ស សម រង្ស៊ី លោក ហូរ វ៉ាន់ ដែលមានវត្តមាននៅទីនោះដែរ បានមានប្រសាសន៍ថា លោកមិនឃើញមានសកម្មជនគណបក្សសង្គ្រោះជាតិណាត្រូវបានគេចាប់បញ្ចូលក្នុងផ្ទះនោះទេ តាមកាមេរ៉ា សុវត្ថិភាព៖ «តាមយើងឆែកឆេរក្នុងផ្ទះ និងតាមយើងមើលក្នុងកាមេរ៉ាសុវត្ថិភាពដែលបញ្ចាំងឱ្យមើលអម្បាញ់មិញ យើងរកពុំឃើញថា មានការចាប់យុវជនចូលក្នុងផ្ទះលេខ ៩ នោះទេ។ ដូច្នេះជារូបភាពដែលយើងបានទទួល និងអ្វីដែលលោកបានធ្វើពេលនេះ គឺយើងពុំអាចមានភស្តុតាងណាមួយ ឬរកឃើញរូបភាពណាមួយដែលថា មានយុវជនយើងត្រូវចាប់បញ្ចូលក្នុងផ្ទះកើតហេតុនេះឡើយ»។
កាលពីយប់ថ្ងៃទី៥ ខែកក្កដា មានហេតុការណ៍ហិង្សាមួយកើតឡើងចំពោះក្បួនឃោសនាគណបក្សសង្គ្រោះជាតិ ដែលបណ្ដាលឱ្យយុវជនគណបក្ស ៣នាក់រងរបួស។ ហេតុការណ៍នោះកើតឡើងនៅចំណុចមុខផ្ទះលេខ ៩ ផ្លូវ ១៣៥ សង្កាត់ផ្សារដើមថ្កូវ ខណ្ឌចំការមន។
ក្រោយពីព្រឹត្តិការណ៍នោះ យុវជនជាច្រើនរបស់គណបក្សសង្គ្រោះជាតិ បាននាំគ្នាប្រមូលផ្ដុំនៅចំណុចកើតហេតុ ហើយពួកគេបានស្រែកទាមទារឱ្យមានការដោះលែងយុវជនចំនួន ៣នាក់ ដែលគេសង្ស័យថា ត្រូវបានម្ចាស់ផ្ទះចាប់បញ្ចូលទៅក្នុង។
យុវជនបក្សសង្គ្រោះជាតិម្នាក់ដែលរងរបួសបានអះអាងថា មានមនុស្សពីរនាក់បានជិះម៉ូតូមួយគ្រឿងមកដល់ក្បួនដែលកំពុងតែដង្ហែ។ ពួកគេទាំងពីរបានប្រមាថគណបក្សសង្គ្រោះជាតិ ពេលនោះអ្នកគាំទ្របាននាំគ្នាស្រែកដាក់ពួកគេវិញ។ លុះមកដល់ចំណុចកើតហេតុ ពួកគេបានយកដុំថ្ម អំបែងកែវ និងចាន គប់មកលើក្បួនដង្ហែ បន្ទាប់មកមានឮការបាញ់ជាច្រើនគ្រាប់ពីក្នុងផ្ទះមក។
យុវជនបក្សសង្គ្រោះជាតិ៖ «ពួកខ្ញុំហ្នឹង ខ្ញុំធ្វើក្បួនហែចូលពីផ្លូវ ២៧១ មក ពួកវាមានគ្នាពីរនាក់ ជិះម៉ូតូស្កូភី ០១៣ (Scoopy 013) ហើយខ្ញុំក៏មិនបានស្គាល់ស្លាកលេខវាច្បាស់ដែរ។ វាជិះក្នុងក្បួនយើងហ្នឹង វាស្រែកថា លេខ ៤ លេខ ៤ ហើយវាក៏បានជេរប្រមាថលើពួកយើង ហើយយើងក៏បានហ៊ោកំដរវា។ ពេលមកដល់មុខផ្ទះវា វាក៏បានចូលទៅផ្ទះ។ ពេលដែលក្បួនយើងហែមិនទាន់ផុតផ្ទះវា វាក៏បានបើកទ្វារចោលជាចាន ឬមួយអំបែងកែវ ឬមួយជាដប ចោលមកលើពួកយើងតែម្ដង»។
ភ្លាមៗក្រោយផ្ទុះហេតុការណ៍ គណបក្សសង្គ្រោះជាតិ បានចេញសេចក្ដីប្រកាសព័ត៌មានមួយ ថ្កោលទោសយ៉ាងដាច់អហង្ការចំពោះការប្រើហិង្សាមកលើក្បួនដង្ហែរបស់ខ្លួន ហើយអំពាវនាវឱ្យអាជ្ញាធរមានសមត្ថកិច្ច ស៊ើបអង្កេតស្រាវជ្រាវឱ្យបានម៉ត់ចត់ និងច្បាស់លាស់ រកឱ្យឃើញជនបង្កហេតុ និងអ្នកនៅពីក្រោយខ្នងដើម្បីចាប់ខ្លួនយកមកផ្ដន្ទាទោសតាមច្បាប់។
បន្ទាប់ពីព្រឹត្តិការណ៍នោះ មានមនុស្សចំនួន ៤នាក់ ដែលគេសង្ស័យថា ជាជនបង្កហេតុ និងអ្នកពាក់ព័ន្ធ ត្រូវបានកម្លាំងសមត្ថកិច្ចចាប់ខ្លួនបញ្ជូនទៅបញ្ជាការដ្ឋានកងរាជអាវុធហត្ថរាជធានីភ្នំពេញ ទាំងយប់។ មិនយូរប៉ុន្មាន អ្នកទាំង ៤នាក់នោះ ត្រូវបានដោះលែងវិញ បន្ទាប់ពីព្រះរាជអាជ្ញារកឃើញថា ពួកគេមិនមានការពាក់ព័ន្ធ។ ប៉ុន្តែបុរសមួយរូបដែលមានមុខនាទីជាមន្ត្រីកងរាជអាវុធហត្ថ ក្នុងចំណោមអ្នកទាំង ៤នាក់នោះ នឹងត្រូវទៅបំភ្លឺនៅតុលាការនៅប៉ុន្មានថ្ងៃទៀត។ នេះបើតាមអ្នកនាំពាក្យកងរាជអាវុធហត្ថលើផ្ទៃប្រទេស លោក ខេង ទីតូ។
លោក ខេង ទីតូ៖ «ធម្មតាសមត្ថកិច្ចតែកាលណាមានរឿងអីកើតឡើង គេត្រូវតែប្រមូលយកមកទាំងអស់ហើយ ដើម្បីយកមកធ្វើការសាកសួរ។ ក្រោយពីសាកសួររួចទៅ ឃើញថា អត់មានពាក់ព័ន្ធ អ៊ីចឹងព្រះរាជអាជ្ញាគាត់ក៏បានបញ្ជាឱ្យដោះលែងទៅវិញទៅ។ មនុស្សពីរនាក់ហ្នឹង ក្មេងៗពីរនាក់ហ្នឹង។ ហើយនៅសល់ពីរនាក់ទៀតហ្នឹង ក៏អត់មានការពាក់ព័ន្ធអីដែរ គ្រាន់តែថា នៅសល់តែម្នាក់ហ្នឹង ដែលជាម្ចាស់អាវុធ គឺគាត់នឹងត្រៀមខ្លួនទៅបំភ្លឺនៅតុលាការតែប៉ុណ្ណឹង»។
ឆ្លើយតបនឹងបញ្ហានេះ លោក គល់ បញ្ញា នាយកប្រតិបត្តិនៃគណៈកម្មាធិការដើម្បីការបោះឆ្នោតដោយសេរីនិងយុត្តិធម៌នៅកម្ពុជា ឬហៅថា ខុមហ្វ្រែល បានឱ្យដឹងថា ករណីនេះចែកជាពីរ គឺបទល្មើសបោះឆ្នោត និងបទល្មើសព្រហ្មទណ្ឌ។ ទាក់ទងនឹងបទល្មើសបោះឆ្នោត លោក គល់ បញ្ញា បានឱ្យដឹងថា គ.ជ.ប អាចដាក់ពិន័យដកសិទ្ធិឈរឈ្មោះ ឬដកសិទ្ធិបោះឆ្នោត។ ចំណែកបទល្មើសព្រហ្មទណ្ឌវិញ តុលាការអាចដាក់ទោសទណ្ឌជនល្មើសតាមផ្លូវច្បាប់។
លោក គល់ បញ្ញា៖ «បទល្មើសក្នុងការបោះឆ្នោត ខាង គ.ជ.ប នឹងដាក់ពិន័យ ឬក៏រហូតដល់ដកសិទ្ធិឈរឈ្មោះ ដកសិទ្ធិបោះឆ្នោត។ ឯចំណែកទៅខាងតុលាការ បញ្ហាហ្នឹង វាទាក់ទងនឹងរឿងព្រហ្មទណ្ឌ។ បើសិនជាមានការគប់ដុំថ្មទៅ មានរបួសស្នាមធ្ងន់ធ្ងរ ឬទៅបាញ់បោះខុសច្បាប់ អ៊ីចឹងត្រូវតែមានទោសខាងព្រហ្មទណ្ឌ»។
ចំណែកលោកមេធាវី សុក សំអឿន វិញ បានឱ្យដឹងថា ជាដំបូងគេត្រូវពិនិត្យមើលគោលបំណងនៃការបាញ់។ លោកបន្តថា បើការបាញ់ជាចេតនា សំដៅការឃោសនាគណបក្សនយោបាយ វាខុសនឹងច្បាប់បោះឆ្នោតផង និងច្បាប់ព្រហ្មទណ្ឌផង៖ «បាញ់សម្លុតពេលឃើញគេហែ បាញ់ហែ ឬក៏បាញ់ក្នុងគោលបំណងអ៊ីចឹងទៅណា។ បើសិនជាបាញ់ក្នុងគោលបំណង ប៉ះពាល់ដល់យុទ្ធនាការឃោសនាគេ អាហ្នឹងវាត្រូវខុសហើយ ទីមួយ ខុសច្បាប់ប្រើប្រាស់អាវុធ ទីពីរ វាអាចខុសច្បាប់បោះឆ្នោត។ ច្បាប់បោះឆ្នោតវាគ្រាន់តែពិន័យទេ»។
ច្បាប់បោះឆ្នោតនៃព្រះរាជាណាចក្រកម្ពុជា ត្រង់មាត្រា ១២៤ ថ្មី ចែងពីទោសបញ្ញត្តិថា ត្រូវលុបឈ្មោះចេញពីបញ្ជីបោះឆ្នោត លុបបេក្ខភាពរបស់សាមីខ្លួន ឬលុបបេក្ខភាពឈរឈ្មោះបោះឆ្នោតរបស់គណបក្សនយោបាយ ដោយគណៈកម្មាធិការជាតិរៀបចំការបោះឆ្នោត ឬនឹងត្រូវផ្ដន្ទាទោសពិន័យជាប្រាក់ពី ៥លាន ទៅ ២៥លានរៀល ដោយពុំទាន់គិតដល់ទោសព្រហ្មទណ្ឌផ្សេងទៀត ចំពោះជនណា និងគណបក្សនយោបាយណាដែលញុះញង់អ្នកគាំទ្រ ឬអ្នកបោះឆ្នោតឱ្យប្រព្រឹត្តអំពើរំលោភបំពាន អំពើគំរាមកំហែង អំពើហិង្សាទៅលើបេក្ខជន ឬទៅលើគណបក្សនយោបាយដទៃ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។