សាលារាជធានីភ្នំពេញ នឹងប្រជុំពិនិត្យលើសំណើដែលជាលិខិតជូនដំណឹងធ្វើបាតុកម្មរបស់លោក ម៉ម សូណង់ដូ។ អភិបាលរងសាលារាជធានីភ្នំពេញ លោក ឃួង ស្រេង ឲ្យដឹងថា លោកបានឃើញលិខិតនេះហើយ ប៉ុន្តែមិនទាន់បញ្ជាក់បានថា តើសាលារាជធានីនឹងឆ្លើយតបនឹងសំណើនេះយ៉ាងណាទេ។
ថ្លែងឲ្យវិទ្យុអាស៊ីសេរី ដឹងនៅថ្ងៃទី២១ ខែឧសភា អភិបាលសាលារាជធានីភ្នំពេញ លោក ឃួង ស្រេង មានប្រសាសន៍ថា សាលារាជធានីភ្នំពេញ នឹងកំណត់ថ្ងៃប្រជុំជាមួយលោក ម៉ម សូណង់ដូ ដើម្បីជជែកលម្អិតពីខ្លឹមសារលិខិតរបស់លោក ម៉ម សូណង់ដូ។ លោកអភិបាលរងឲ្យដឹងទៀតថា ខ្លឹមសារទាមទាររបស់លោក ម៉ម សូណង់ដូ ជាការលូកដៃចូលការងាររបស់តុលាការ និងនិទណ្ឌភាព ឬភាពគ្មានទោសនៅកម្ពុជា៖ «ចាំមើលយើងប្រជុំពិភាក្សាសិន ព្រោះវាមានបញ្ហាមួយដែលនៅក្នុងលិខិតហ្នឹងគាត់សុំសម្ដែងមតិ សុំដោះលែងពិរុទ្ធជនដែលកំពុងជាប់ទោសនៅតុលាការ រឿងហ្នឹងវាទាក់ទងទៅនិទណ្ឌភាព ដែលកន្លងមកអង្គារសង្គមស៊ីវិលទាំងអស់អំពាវនាវសុំកុំអោយមាននិទណ្ឌភាព»។
ប្រធានគណបក្សសំបុកឃ្មុំសង្គមប្រជាធិបតេយ្យ លោក ម៉ម សូណង់ដូ អះអាងថា លោកនឹងប្រមូលអ្នកគាំទ្រប្រមាណ ២០០នាក់ធ្វើបាតុកម្មនៅទីលានប្រជាធិបតេយ្យពីម៉ោង ៨ព្រឹក ដល់ម៉ោង ១២ថ្ងៃ នៅថ្ងៃទី០៩ ខែកក្កដា ដើម្បីឲ្យដោះលែងសកម្មជនការពារសិទ្ធិមនុស្សនៃសមាគមការពារសិទ្ធិមនុស្ស ៤នាក់ និងអគ្គលេខាធិការរងនៃ គ.ជ.ប ម្នាក់ ដែលរងការចោទប្រកាន់ និងកំពុងត្រូវឃុំខ្លួននៅពន្ធនាគារ ទាក់ទងការចោទប្រកាន់របស់អ្នកនាង ខុម ចាន់តារាទី ហៅស្រីមុំ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។