តំណាងសង្គមស៊ីវិលជាង ១០ស្ថាប័ន ព្រះសង្ឃ និងប្រជាពលរដ្ឋប្រមាណ ៤០០នាក់ បានប្រមូលផ្តុំគ្នាថ្វាយញត្តិជូនព្រះមហាក្សត្រ ធ្វើឡើងនាសួនច្បារមាត់ទន្លេ មុខវត្តឧណ្ណាលោម នៅព្រឹកថ្ងៃអាទិត្យ ទី២២ ខែកញ្ញា គឺមួយថ្ងៃមុនសម័យប្រជុំដំបូងរបស់សមាជិកសភាអាណត្តិទី៥។
លោក វន់ ពៅ ជាប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ និងជាអ្នកដឹកនាំពិធីយកញត្តិថ្វាយព្រះមហាក្សត្រ។ លោកបានប្រាប់ពីគោលបំណងដែលសង្គមស៊ីវិលថ្វាយញត្តិជូនព្រះមហាក្សត្រពេលនេះ គឺស្នើឲ្យព្រះអង្គប្រកាសលើកពេលកោះប្រជុំសភាដែលគ្រោងធ្វើនៅថ្ងៃទី២៣ ខែកញ្ញា ព្រោះវិវាទបោះឆ្នោតមិនទាន់រកដំណោះស្រាយនៅឡើយទេ។ ក្រៅពីថ្វាយញត្តិជូនព្រះមហាក្សត្រ លោក វន់ ពៅ ក៏បានរិះគន់សកម្មភាពដាក់ពង្រាយកម្លាំងប្រដាប់អាវុធ និងការបិទរបាំងបន្លាលួស ឬរបាំងដែកបិទផ្លូវជុំវិញព្រះបរមរាជវាំងរបស់រដ្ឋាភិបាល។
លោក វន់ ពៅ៖ «យកកម្លាំងប្រដាប់អាវុធមកព័ទ្ធវាំង មិនខុសអ្វីពីការធ្វើរដ្ឋប្រហារបង្ខំឲ្យព្រះមហាក្សត្រទៅប្រជុំរដ្ឋសភាទាំងបង្ខំព្រះអង្គ។ ដូច្នេះយើងជាម្ចាស់ឆ្នោត គឺយើងមិនអាចទទួលយកបាននូវទង្វើរបៀបហ្នឹង។ អ៊ីចឹងហើយបានជាថ្ងៃនេះយើងដាក់ញត្តិថ្វាយព្រះមហាក្សត្រ ដើម្បីឲ្យព្រះអង្គពន្យារពេលប្រជុំរដ្ឋសភា ពីព្រោះរដ្ឋធម្មនុញ្ញបានចែងថា ព្រះអង្គគឺជាអ្នកការពារអធិបតេយ្យភាព ជាអ្នកការពារ និងធ្វើឲ្យមានឯកភាពជាតិ។ ប៉ុន្តែឥឡូវមិនទាន់មានឯកភាពជាតិទេ រវាងគណបក្សសង្គ្រោះជាតិ និងគណបក្សប្រជាជនកម្ពុជាទេ។ អ៊ីចឹងព្រះអង្គមិនអាចចូលរួមប្រជុំសភានេះបានទេ។ នេះជាគោលបំណងរបស់យើង ដើម្បីឲ្យព្រះអង្គយល់អំពីតម្រូវការរបស់យើងជាកូនចៅ ចៅទួតរបស់ព្រះអង្គ»។
ព្រះរាជសាររបស់ព្រះមហាក្សត្របានកោះអញ្ជើញអ្នកតំណាងរាស្ត្រជាប់ឆ្នោតអាណត្តិទី៥ ចំនួន ១២៣រូបឲ្យចូលប្រជុំសភាលើកដំបូងនៅថ្ងៃទី២៣ ខែកញ្ញា។ ប៉ុន្តែប្រកាសនេះ ត្រូវមេដឹកនាំគណបក្សប្រឆាំង គឺគណបក្សសង្គ្រោះជាតិ ស្នើសុំព្រះអង្គពន្យារពេលកោះប្រជុំដោយរង់ចាំមានដំណោះស្រាយលើវិវាទបោះឆ្នោតជាមុន។
លោក រ៉ុង ឈុន ប្រធានសហភាពសហជីពកម្ពុជា និងជាប្រធានសមាគមគ្រូបង្រៀនកម្ពុជាឯករាជ្យ មានប្រសាសន៍ក្នុងពិធីជួបជុំថ្វាយញត្តិជូនព្រះមហាក្សត្រ ដោយបានទទូចដល់រដ្ឋាភិបាល ត្រូវដករបាំងបន្លាលួស ឬរបាំងដែក ដែលសមត្ថកិច្ចបានយកទៅឡោមព័ទ្ធព្រះបរមរាជវាំងជាបន្ទាន់។
លោក រ៉ុង ឈុន រិះគន់ថា របាំងបន្លាលួសដែលសមត្ថកិច្ចបានដាក់ និងពង្រាយកម្លាំងប្រដាប់អាវុធយាមកាមទាំងយប់ថ្ងៃ គឺមិនខុសគ្នាពីការឃុំឃាំងព្រះអង្គទុកក្នុងវាំងនោះទេ៖ «សព្វថ្ងៃនេះយើងមើលឃើញសកម្មភាពខាងអ្នកកាន់អំណាចកំពុងតែចាប់ព្រះមហាក្សត្រធ្វើជាចំណាប់ខ្មាំង ហើយវាជារូបភាពអាក្រក់ណាស់ដែលពង្រាយកម្លាំង និងដាក់ពង្រាយរនាំងបន្លាលួសព័ទ្ធជុំវិញវាំង ទាំងអស់នេះវាជារឿងមួយអាក្រក់ ហើយបង្ហាញថា ព្រះមហាក្សត្រកំពុងតែប្រឈមទៅនឹងការគំរាមកំហែងពីសំណាក់អ្នកមានអំណាច»។
មន្ត្រីសង្គមស៊ីវិលនិងព្រះសង្ឃមានថេរដីកា និងបានទទូចស្នើដល់ព្រះមហាក្សត្រ ត្រូវមានព្រះរាជតម្រិះលើសំណើពន្យារពេលកោះប្រជុំសភានីតិកាលទី៥ ដែលគ្រោងធ្វើនៅថ្ងៃទី២៣ ខែកញ្ញា ដើម្បីរង់ចាំដោះស្រាយលើវិវាទបោះឆ្នោតជាមុនសិន។
បន្ទាប់ពីបានរង់ចាំនៅក្រៅរបងព្រះបរមរាជវាំងជិត ១ព្រឹក នៅម៉ោង ១១ និង៥នាទី ព្រឹកថ្ងៃអាទិត្យ ទី២២ ខែកញ្ញា មន្ត្រីតំណាងក្រសួងព្រះបរមរាជវាំង គឺលោក ប៉ុល ប៊ុនលី បានចេញមកទទួលយកញត្តិរបស់ក្រុមអង្គការសង្គមស៊ីវិលដើម្បីដាក់ថ្វាយព្រះមហាក្សត្រ។
ទាក់ទិនបញ្ហានេះ ព្រះអង្គម្ចាស់ ស៊ីសុវត្ថិ ធម្មិកោ អតីតព្រះរាជលេខាផ្ទាល់ព្រះករុណាសម្ដេចព្រះ នរោត្តម សីហនុ ដែលបានធ្វើពិធីបួងសួង និងមិនសោយអាហារដើម្បីស្នើឲ្យព្រះមហាក្សត្រពន្យារពេលកោះប្រជុំសភា ប៉ុន្តែត្រូវរំខានដោយអាជ្ញាធរមានបន្ទូលរិះគន់ធ្ងន់ៗ ចំពោះទង្វើផ្ដាច់ការរបស់ រដ្ឋាភិបាលដឹកនាំដោយលោកនាយករដ្ឋមន្ត្រី ហ៊ុន សែន៖ «ឆ្លុះបញ្ចាំងឲ្យឃើញហើយថា គណបក្សប្រជាជនកម្ពុជា អត់មានគោលបំណងផ្តល់យុត្តិធម៌ទេ។ ពេលណាដែលយើងទាមទារយុត្តិធម៌ គឺពេលហ្នឹងគេបង្ក្រាប សកម្មភាពអហិង្សាបែបនោះ ដោយយកកងកម្លាំងប្រដាប់អាវុធរាប់រយនាក់មកបង្ក្រាប។ អ៊ីចឹងឆ្លុះបញ្ចាំងឲ្យឃើញហើយថា គណបក្សប្រជាជនកម្ពុជា អត់មានគោលបំណងផ្តល់យុត្តិធម៌ទេ»។
បញ្ហានេះដែរ កាលពីថ្ងៃសៅរ៍ ទី២១ ខែកញ្ញា តំណាងប្រជាពលរដ្ឋម្ចាស់ឆ្នោតក៏បាននាំយកញត្តិជាង ២០ម៉ឺនស្នាមមេដៃ និងហត្ថលេខា ដាក់ថ្វាយព្រះមហាក្សត្រ ស្នើឲ្យព្រះអង្គពន្យារពេលវេលាកោះប្រជុំសភាអាណត្តិទី៥ នេះដែរ។ ប៉ុន្តែរហូតមកទល់នេះ មិនទាន់មានការឆ្លើយតបបែបណាពីមន្ត្រីព្រះបរមរាជវាំងជុំវិញការដាក់ញត្តិទាំងនេះនៅឡើយទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។