សាលារាជធានីភ្នំពេញ បានអនុញ្ញាតឲ្យគណបក្សសង្គ្រោះជាតិ រៀបចំពិធីសមាជមហាជន នៅទីលានប្រជាធិបតេយ្យ ដែលគេគ្រោងធ្វើឡើងនៅថ្ងៃទី៦ ខែតុលា ឆ្នាំ២០១៣ ប៉ុន្តែនៅមិនទាន់និយាយត្រូវរ៉ូវគ្នាលើចំនួនអ្នកចូលរួមនោះទេ។
នាយកទីចាត់ការរដ្ឋបាលនៃសាលារាជធានីភ្នំពេញ លោក ឡុង ឌីម៉ង់ មានប្រសាសន៍នៅល្ងាចថ្ងៃទី១ តុលា ថា បន្ទាប់ពីពិភាក្សាគ្នារួច សាលារាជធានីភ្នំពេញ បានសម្រេចអនុញ្ញាតឲ្យមានពិធីសមាជនេះឡើងទៅតាមកាលកំណត់។ ប៉ុន្តែ អ្វីដែលនៅមិនទាន់ត្រូវរ៉ូវគ្នានោះ គឺគណបក្សសង្គ្រោះជាតិ ទទូចចង់បានអ្នកចូលរួម ២ម៉ឺននាក់ ដែលមិនសមាមាត្រទៅនឹងទីធ្លានៃទីលានប្រជាធិបតេយ្យ។ បញ្ហានេះ សាលារាជធានីភ្នំពេញ នឹងសុំគោលការណ៍ពីក្រសួងមហាផ្ទៃ ជាមុនសិន។
សមាជិកគណៈកម្មការអចិន្ត្រៃយ៍នៃគណបក្សសង្គ្រោះជាតិ លោក គួយ ប៊ុនរឿន បានឲ្យដឹងថា គណបក្សនេះនៅតែប្រកាន់ជំហរថា នៅតែធ្វើបើទោះជាក្រសួងមហាផ្ទៃ មិនអនុញ្ញាតក្ដី ដោយគណបក្សសង្គ្រោះជាតិ យោងទៅលើបទពិសោធន៍នៃការរៀបចំមហាបាតុកម្មកន្លងមក ដែលប្រកាន់គោលការណ៍អហិង្សា។
គណបក្សសង្គ្រោះជាតិ បានរៀបចំផែនការយុទ្ធសាស្ត្រជាហូរហែ បន្ទាប់ពីធ្វើមហាបាតុកម្មពីរលើក ដើម្បីទាមទារបង្កើតគណៈកម្មការចម្រុះស៊ើបអង្កេតភាពមិនប្រក្រតីនៅថ្ងៃបោះឆ្នោត តែពុំបានជោគជ័យនោះ។ ជាថ្មីម្ដងទៀត គណបក្សនេះបានចាប់ផ្ដើមកំណត់ពេលវេលាធ្វើសកម្មភាពបន្តបន្ទាប់ទៀត ដោយមានផែនការចំនួនបីចំណុច គឺធ្វើសមាជមហាជននៅទីលានប្រជាធិបតេយ្យ នៅថ្ងៃទី៦ ខែតុលា ចំណុចទី២ គឺធ្វើញត្តិដាក់ជូនអង្គការសហប្រជាជាតិ និងប្រទេសជាហត្ថលេខីនៃកិច្ចព្រមព្រៀងទីក្រុងប៉ារីស ២៣ តុលា ឆ្នាំ១៩៩១ និងចំណុចចុងក្រោយ ធ្វើមហាបាតុកម្មនៅទីលានប្រជាធិបតេយ្យថ្ងៃទី២៣ តុលា ដើម្បីយកញត្តិដាក់ជូនអង្គការសហប្រជាជាតិ និងប្រទេសជាហត្ថលេខីនៃកិច្ចព្រមព្រៀងទីក្រុងប៉ារីស ២៣ តុលា ឆ្នាំ១៩៩១ តាមរយៈតំណាងឧត្ដមស្នងការអង្គការសហប្រជាជាតិប្រចាំកម្ពុជា ដើម្បីទាមទារឲ្យពិនិត្យសើរើភាពមិនប្រក្រតីនៃលទ្ធផលបោះឆ្នោតឡើងវិញ។
គណៈកម្មាធិការជាតិរៀបចំការបោះឆ្នោត (គ.ជ.ប) បានប្រកាសលទ្ធផលបោះឆ្នោតអាណត្តិទី៥ នេះថា បក្សប្រជាជនឈ្នះ ៦៨កៅអី។ ចំណែកបក្សសង្គ្រោះជាតិ បាន ៥៥កៅអី។ តែបក្សសង្គ្រោះជាតិ តវ៉ាថា លទ្ធផលនេះមិនត្រឹមត្រូវ ព្រោះមានការបន្លំសន្លឹកឆ្នោត ហើយទាមទារឲ្យបង្កើតគណៈកម្មការឯករាជ្យមួយស៊ើបអង្កេតឡើងវិញ និងអំពាវនាវឲ្យអង្គការអន្តរជាតិ និងអង្គការសហប្រជាជាតិ ចូលរួមដោះស្រាយ តែគណបក្សប្រជាជនកម្ពុជា មិនព្រម។
គណបក្សប្រជាជនកម្ពុជា បានចូលប្រជុំសភា និងបង្កើតរដ្ឋាភិបាលតែឯកឯង។ មិនត្រឹមតែប៉ុណ្ណោះ លោកនាយករដ្ឋមន្ត្រី ហ៊ុន សែន បានព្រមានគណបក្សប្រឆាំងថា នឹងបញ្ចេញខ្សែអាត់សំឡេងនៃកិច្ចចរចារវាងគណបក្សសង្គ្រោះជាតិ និងបក្សប្រជាជន ចេញជាសាធារណៈ អំពីការព្រមទទួលស្គាល់លទ្ធផលបោះឆ្នោតរបស់គណបក្សសង្គ្រោះជាតិ បើសិនជាគណបក្សនេះធ្វើបាតុកម្មម្ដងទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។