ប្រធានស្ដីទីគណបក្សសង្គ្រោះជាតិ លោក កឹម សុខា បានបង្ហោះសារលើហ្វេសប៊ុក (Facebook) មួយប្រាប់ឲ្យអ្នកគាំទ្រឲ្យហ៊ានប្រឈមមុខនឹងបញ្ហា ស្របពេលដែលកូនស្រីរបស់លោករិះគន់លោក សម រង្ស៊ី ពីការមានលេសមិនចូលស្រុក។ អ្នកវិភាគសង្គមថា នៅពេលនេះការបែកបាក់គណបក្សប្រឆាំងមួយនេះ មិនមែនជាជម្រើសល្អទេ។
សារលើហ្វេសប៊ុក មួយរបស់លោក កឹម សុខា បង្ហោះនៅរសៀលថ្ងៃពុធ ទី២៦ ខែតុលា សរសេរថា "ជាធម្មតាយើងធ្វើដំណើរកាត់ភ្លៀងតែងតែទទឹកហើយ ក៏ប៉ុន្ដែបើពេលវេលាចាំបាច់តម្រូវឲ្យយើងទៅឲ្យដល់គោលដៅនោះ យើងត្រូវតែធ្វើ! យើងត្រូវតែហ៊ានប្រឈម! យើងមិនត្រូវគេចវេះ ឬខ្លាចរអាឡើយ"។
ការលើកឡើងបែបនេះ គឺធ្វើឡើងស្របពេលដែលចំណាប់អារម្មណ៍របស់សាធារណជនកំពុងផ្ដោតមកលើកូនស្រីរបស់លោក កឹម សុខា ផ្ទាល់ គឺកញ្ញា កឹម មនោវិទ្យា ដែលបង្ហោះសារលើបណ្ដាញសង្គម ធ្វីតធឺ (Twitter) ផ្ទួនៗ ក្នុងមួយរយៈពេលចុងក្រោយនេះ រិះគន់ទៅលើលោក សម រង្ស៊ី ដែលជាប្រធានគណបក្សសង្គ្រោះជាតិ។
អ្នកវិភាគនយោបាយលោកបណ្ឌិត មាស នី មានប្រសាសន៍ថា លោកមិនច្បាស់ទេ ថាតើសារហ្វេសប៊ុក របស់លោក កឹម សុខា ជាការគាំទ្រទៅលើកូនស្រីរបស់លោក ហើយសំដៅទៅលោក សម រង្ស៊ី យ៉ាងណាទេ។ ប៉ុន្តែលោកបន្តថា ក្នុងប្រទេសកម្ពុជា ដែលគណបក្សសង្គ្រោះជាតិ ជាកម្លាំងប្រឆាំងតែមួយគត់សម្រាប់រដ្ឋាភិបាល ការបែកបាក់គ្នានៅក្នុងបក្សប្រឆាំងមួយនេះ មិនមែនជាជម្រើសល្អឡើយ៖ «បើខ្ញុំជាកូនលោក កឹម សុខា ខ្ញុំត្រូវប្រយ័ត្នប្រយែង ព្រោះជាតិត្រូវការអ្នករួបរួមគ្នា មិនត្រូវការអ្នកបំបែកទេ។ ប្រសិនសម្ដីរបស់កូនលោក កឹម សុខា ក្លាយទៅរឿងមួយធ្វើឲ្យមានការបែកបាក់គណបក្សសង្គ្រោះជាតិ នាងនឹងមានវិប្បដិសារី និងទទួលបានការជេរស្ដីពីសំណាក់មហាជន»។
កាលពីយប់ថ្ងៃទី២៣ ខែតុលា នៅលើបណ្ដាញសង្គម ធ្វីតធឺ កញ្ញា កឹម មនោវិទ្យា បង្ហោះសារមួយឆ្លើយតបទៅនឹងចំណាត់ការរបស់រដ្ឋាភិបាល ដែលហាមឃាត់លោក សម រង្ស៊ី មិនឲ្យត្រឡប់មកកម្ពុជា។ កញ្ញាបានសរសេរថា៖ "អស់រយៈពេលមួយឆ្នាំហើយ ទីបំផុតលោក សម រង្ស៊ី នៅថ្ងៃនេះអាចប្រកាសជាផ្លូវការនូវការនិរទេសរបស់ខ្លួនហើយ។ គាត់ថែមទាំងមានហេតុផលសមស្របសម្រាប់បន្តនៅបរទេសទៀត"។
នេះមិនមែនជាការសរសេរសាររិះគន់លើកទី១របស់កញ្ញា កឹម មនោវិទ្យា ទេ។ កាលពីថ្ងៃទី១៧ ខែតុលា កញ្ញាក៏ធ្លាប់បានប្រតិកម្មទៅនឹងការលើកឡើងរបស់លោក សម រង្ស៊ី ថា ចង់ចូលខ្លួនមកឲ្យរដ្ឋាភិបាលកម្ពុជា ចាប់ខ្លួនជាថ្នូរនឹងការដោះលែងមន្ត្រីគណបក្សសកម្មជនបក្សប្រឆាំង និងអ្នកការពារសិទ្ធិមនុស្សដែរ។ តែកញ្ញា មនោវិទ្យា ហៅសំណើជាថ្នូរដោះដូរនេះថាជាការកុហក កើតឡើងដោយសារលោក សម រង្ស៊ី មើលភាពយន្តច្រើនពេកនៅពេលទំនេរ។
សាររិះគន់ជារឿយៗ ទៅលើប្រធានគណបក្សសង្គ្រោះជាតិ ពីកូនស្រីរបស់ប្រធានស្ដីទីនេះ ត្រូវបានមន្ត្រីជាន់ខ្ពស់គណបក្សសង្គ្រោះជាតិ អ្នកស្រី មូរ សុខហួរ បកស្រាយថា ជាការបញ្ចេញមតិរបស់កញ្ញា កឹម មនោវិទ្យា តែប៉ុណ្ណោះ ដែលមិនឆ្លុះបញ្ចាំងពីជំហររបស់បក្សទាំងមូលឡើយ។ អ្នកស្រីបន្តថា គណបក្សសង្គ្រោះជាតិ ប្រកាន់យកលទ្ធិប្រជាធិបតេយ្យ ដូចនេះមនុស្សគ្រប់រូបមានសិទ្ធិបញ្ចេញមតិរបស់គេ។
ទាក់ទងនឹងបញ្ហានេះ អ្នកគាំទ្រគណបក្សសង្គ្រោះជាតិ មួយចំនួននៅថ្ងៃទី២៤ ខែតុលា ឆ្នាំ២០១៦ ក៏បានបញ្ចេញមតិរបស់ពួកគេដែរ តាមរយៈការដាក់លិខិតទៅកាន់គណៈកម្មាធិការអចិន្ត្រៃយ៍គណបក្សប្រឆាំង រិះគន់ទៅលើសម្ដីរបស់កញ្ញា កឹម មនោវិទ្យា ថា ជាការវាយប្រហារ និងប្រមាថមើលងាយទៅលើលោក សម រង្ស៊ី។ ពួកគេទាមទារឲ្យកូនប្រធានស្ដីទីរូបនេះ ធ្វើការកែប្រែនូវពាក្យសម្ដីរបស់ខ្លួន។
លោក សម រង្ស៊ី ត្រូវរដ្ឋាភិបាលកម្ពុជា ហាមមិនឲ្យចូលស្រុក ដែលជារឿងមួយដែលគេមើលឃើញថា បម្រាមនេះ ជាការបំពានទាំងច្បាប់ជាតិ និងអន្តរជាតិ។ រដ្ឋាភិបាលបានបញ្ជាឲ្យគ្រប់ក្រុមហ៊ុនអាកាសចរណ៍ទាំងអស់ដែលធ្វើការហោះហើរមកកម្ពុជា មិនឲ្យទទួលលោក សម រង្ស៊ី ទេ ហើយយន្តហោះណាមួយដែលធ្វើខុសពីបទបញ្ជានេះ នឹងត្រូវបង្វែរឲ្យហោះទៅកាន់អាកាសយានដ្ឋានដើមវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។