លោកបញ្ជាក់ថា មូលហេតុនៃការលុបចោលនេះ ដោយសារតែកម្លាំងយោធារបស់រដ្ឋាភិបាល បានបង្ក្រាបកម្មករធ្វើបាតុកម្មទាមទារដំឡើងប្រាក់ឈ្នួល និងចាប់ខ្លួនមេសហជីពនៅថ្ងៃនេះ។
សូមស្ដាប់សេចក្ដីរាយការណ៍របស់លោក ដែន អយុធ្យា ពីទីលានប្រជាធិបតេយ្យដូចតទៅ៖
គណបក្សប្រជាជនកម្ពុជា កាលពីថ្ងៃទី០២ ខែមករា បានចេញសេចក្តីថ្លែងការណ៍ភ្លាមៗ សំដែងការសោកស្តាយចំពោះការសម្រេចផ្អាកកិច្ចចរចានេះ ហើយបានបង្ហាញពីជំហរមិនកែប្រែ ក្នុងការស្វែងរកដំណោះស្រាយដោយសន្តិវិធី តាមរយៈការចរចា។ ជាមួយគ្នានេះ គណបក្សប្រជាជនកម្ពុជា ក៏បានថ្កោលទោសថា សកម្មភាពអុជអាល ញុះញង់ របស់គណបក្សសង្គ្រោះជាតិ ដែលឈានទៅដល់ការប្រព្រឹត្តអំពើហិង្សា បិទផ្លូវសាធារណៈ និងការរំខាននានា បានធ្វើឲ្យប៉ះពាល់ដល់សន្តិសុខ សណ្តាប់ធ្នាប់ និងរបៀបរៀបរយសង្គម។
ប៉ុន្តែមន្រ្តីគណបក្សសង្គ្រោះជាតិក៏បានសំដែងការសោកស្តាយ និងប្រតិកម្មជាខ្លាំង ចំពោះសេចក្តីថ្លែងការណ៍របស់គណបក្សប្រជាជនកម្ពុជា ដែលបានលើកឡើងថា ការប្រកាសផ្អាករបស់គណបក្សសង្គ្រោះជាតិ ដើម្បីជួបចរចាជាមួយក្រុមការងារនៃគណបក្សប្រជាជនកម្ពុជា នៅថ្ងៃសុក្រ ទី៣ ខែមករានេះ គឺជាទង្វើខ្វះឆន្ទៈក្នុងការស្វែងរកដំណោះស្រាយបញ្ហាជាប់គាំងនយោបាយតាមរយៈការចរចា។
លោក យឹម សុវណ្ណ អ្នកនាំពាក្យនៃគណបក្សសង្គ្រោះជាតិ បានបញ្ជាក់ហេតុផលថា ក្រុមការងាររបស់គណបក្សសង្គ្រោះ មិនអាចជួបចរចាបានទេ បន្ទាប់ពីមានការប្រើអំពើហិង្សារបស់ក្រុមសមត្ថកិច្ចចំរុះបានបង្ក្រាបយ៉ាងឃោរឃៅ មកលើក្រុមបាតុករ ដោយគ្រាន់តែទាមទារដំឡើងប្រាក់ខែ ព្រមទាំងចាប់ព្រះសង្ឃ និងចាប់តំណាងសហជីព និងកម្មករ-កម្មការិនី មួយចំនួនទៀត។ លោក បន្តថា ទង្វើរបស់អាជ្ញាធរ ដែលប្រើអំពើហិង្សាបង្ក្រាបលើក្រុមបាតុករអហិង្សានេះ គឺជាការរំលោភលើកិច្ចព្រមព្រៀងរវាងគណបក្សសង្គ្រោះជាតិ និងគណបក្សប្រជាជនកម្ពុជា ដែលបានឯកភាពគ្នា គោរព និងអនុវត្តដោយម៉ត់ចត់ ជាពិសេសគឺបញ្ឈប់ការប្រើអំពើហិង្សា។
សេចក្តីថ្លែងការណ៍របស់គណបក្សសង្គ្រោះជាតិ បានបង្ហាញជំហរថា គណបក្ស នឹងពិនិត្យលទ្ធភាពឡើងវិញ លើគំរោងចរចា រកដំណោះស្រាយ ចំពោះវិបត្តិនយោបាយ បច្ចុប្បន្ន នៅពេលណាសមត្ថកិច្ច ក្រោមការដឹកនាំរបស់គណបក្សប្រជាជនកម្ពុជា បញ្ឈប់ការប្រើអំពើហិង្សា មកលើការតវ៉ារបស់ព្រះសង្ឃ ប្រជាពលរដ្ឋ និងកម្មករជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ៕