មន្ត្រីជាន់ខ្ពស់របស់គណបក្សសង្គ្រោះជាតិ ថាបេក្ខភាពឈឈ្មោះបោះឆ្នោតជ្រើសរើសក្រុមប្រឹក្សាឃុំ-សង្កាត់ នៅទូទាំងប្រទេសមាន ១.៦៤១ឃុំ-សង្កាត់ បានរៀបចំរួចរាល់ប្រមាណ ៩៥% ហើយ។ ចំណែក ៥% ឃុំ-សង្កាត់ ស្មើជាង ៤០ឃុំ សង្កាត់ ដែលមានបញ្ហាកំពុងដោះស្រាយបញ្ចប់មុននឹងបញ្ជូនឈ្មោះបេក្ខជនទៅគណៈកម្មាធិការជាតិរៀបចំការបោះឆ្នោត។
នៅគ្រាដែលសកម្មជន និងជំទប់ឃុំរបស់គណបក្សប្រឆាំងនៅតាមខេត្តខ្លះ កំពុងប្រទាំងប្រទើសគ្នាចង់បានឈឈ្មោះនៅលេខរៀងទី១ ដើម្បីមានឱកាសជាប់ជាមេឃុំ ឬចៅសង្កាត់នោះ មន្ត្រីជាន់ខ្ពស់គណបក្សសង្គ្រោះជាតិ លោក អេង ឆៃអ៊ាង ប្រកាសថា ការជ្រើសរើសបេក្ខជនឈឈ្មោះ គឺផ្អែកលើយន្តការច្បាស់លាស់បីដំណាក់កាលដោយពុំមានការជ្រៀតជ្រែកពីមន្ត្រីបក្សនៅថ្នាក់លើឡើយ។
មន្ត្រីជាន់ខ្ពស់ និងជាអ្នកនាំពាក្យគណបក្សសង្គ្រោះជាតិ លោក អេង ឆៃអ៊ាង ថ្លែងនៅថ្ងៃទី៣១ ខែមករា ថា ក្នុងចំណោមឃុំ-សង្កាត់ជាង ១.៦០០ ដែលគណបក្សសង្គ្រោះជាតិ រៀបចំឲ្យមានបេក្ខជនឈឈ្មោះ នៅមានឃុំ-សង្កាត់ជាង ៤០ទៀត មានបញ្ហាកំពុងបន្តដោះស្រាយ។ ប៉ុន្តែលោកថា ករណីប្រទាំងប្រទើសគ្នានៅខេត្តកំពង់ឆ្នាំង និងខេត្តតាកែវ លោកមិនបានដឹងឡើយ៖ «អាបញ្ហាហ្នឹងដូចថា សាមីខ្លួនដែលគាត់មិនអាចទទួលយកបាននូវការព្រមព្រៀង គាត់មានសិទ្ធិតវ៉ាមកថ្នាក់ដឹកនាំខេត្តរបស់គាត់ ហើយថ្នាក់ដឹកនាំខេត្ដ ត្រូវរៀបចំឲ្យមានការបោះឆ្នោត»។
អតីតសកម្មជនគណបក្ស សម រង្ស៊ី និងបក្សសិទ្ធិមនុស្ស នៅឃុំត្បែងខ្ពស់ ស្រុកសាមគ្គីមានជ័យ ខេត្តកំពង់ឆ្នាំង ប្រតិកម្មនឹងការរៀបចំដាក់បេក្ខជនឈឈ្មោះនៅក្នុងឃុំរបស់ខ្លួន។ ពួកគេព្រមានដើរចេញពីគណបក្ស បើថ្នាក់ដឹកនាំខេត្ត ឬថ្នាក់ជាតិ មិនដាក់ឈ្មោះពួកគេជាបេក្ខភាពលេខរៀងទី១ និងទី២ ក្នុងការបោះឆ្នោតក្រុមប្រឹក្សាឃុំ-សង្កាត់ នៅថ្ងៃ៤ ខែមិថុនា ឆ្នាំ២០១៧ ខាងមុខនោះទេ។
ជំទប់ទី២ ឃុំត្បែងខ្ពស់ លោក ហេង ហុន មានប្រសាសន៍ថា កាលពីល្ងាចថ្ងៃទី១០ ខែមករា ប្រធានក្រុមសម្របសម្រួលថ្នាក់ខេត្ត គឺលោក ដួង ចន្ដ្រា បានធ្វើកំណត់ហេតុសម្រុះសម្រួលបញ្ចប់ដោយដាក់ឲ្យលោកឈឈ្មោះនៅលេខរៀងទី៤ និងជំទប់ទី១ មកពីគណបក្សសិទ្ធិមនុស្សឈរនៅលេខរៀងទី៥ ហើយឈ្មោះ សឿង ស៊ី និងឈ្មោះ ឆោម ភី ដែលជាសកម្មជនថ្មីធ្លាប់ទទួលការបណ្ដុះបណ្ដាលពីលោកកន្លងមកនោះ បែរជាបានឈឈ្មោះនៅលេខរៀងទី១ និងលេខរៀងទី២ ទៅវិញ៖ «យកមនុស្សគាំទ្រពីរបីដែលគេយកទៅហ្នឹងឲ្យលើកដៃ ហើយយកជាផ្លូវការ ខ្ញុំថា ខ្ញុំអត់ទទួលយកបានទេ ព្រោះខ្ញុំជាក្បាលម៉ាស៊ីនដឹកនាំក្នុងគណបក្សឃុំ ហើយជាលេខាថ្នាក់ស្រុកទៀត ហើយខ្ញុំមកឈលេខ៤ ហើយឲ្យខ្ញុំជាអ្នកផ្ដល់គំនិតផ្ដល់យោបល់ឲ្យគេទៅវិញ ខ្ញុំអត់អាចទទួលយកបានទេ»។
ឆ្លើយតបបញ្ហានេះ អនុប្រធានគណៈកម្មាធិការប្រតិបត្តិខេត្តកំពង់ឆ្នាំង របស់គណបក្សសង្គ្រោះជាតិ លោក ដួង ចន្ដ្រា បញ្ជាក់ថា គណៈកម្មាធិការ ឬមន្ត្រីថ្នាក់លើមិនអាចអារកាត់យ៉ាងណាបានចំពោះករណីនេះទេ ព្រោះសកម្មជននៅមូលដ្ឋានបានបោះឆ្នោតគាំទ្រដាក់ឈ្មោះឲ្យបេក្ខជនទាំងពីរនាក់ឋិតនៅលេខរៀងទី៤ និងទី៥ រួចហើយ។
លោកសង្កេតឃើញថា រយៈពេលចុងក្រោយនេះអ្នកទាំងពីរ អសកម្មនឹងការងារ បាត់បង់សមត្ថភាពការងារដោយវ័យជរា ហើយមានពលរដ្ឋខ្លះថ្នាំងថ្នាក់ចិត្តជាមួយលោក ម៉ី វ៉ែន ទៀតផង ក្រោយពីប្រជាពលរដ្ឋមានបញ្ហារត់ទៅពឹងពាក់មិនបាន៖ «ខ្ញុំបានព្យាយាមកិច្ចការហ្នឹងដែរ ដោយសារគាត់ជាជំទប់ទី១ និងទី២ កន្លង ប៉ុន្ដែនៅមូលដ្ឋានអត់ព្រមព្រៀង។ អ៊ីចឹងយើងមិនអាចជម្នះនៅមូលដ្ឋានបានទេ ព្រោះសន្លឹកឆ្នោតចេញមកពីមូលដ្ឋាន អ៊ីចឹងយើងមិនអាចរៀបចំឡើងវិញបានទេ មានតែការសម្របសម្រួល និងសុំអង្វរចិត្តគាត់តែប៉ុណ្ណឹងឯង»។
ចំណែកនៅឯឃុំត្រាំកក់ ស្រុកត្រាំកក់ ខេត្តតាកែវ វិញ ក៏មានបញ្ហាស្រដៀងគ្នានេះដែរ។ សកម្មជនបក្សប្រឆាំងដែលកំពុងមានតំណែងជាក្រុមប្រឹក្សា ឬជំទប់ ត្រូវបានគេដាក់ឲ្យឈឈ្មោះនៅលេខរៀងក្រោយគេ សម្រាប់ការបោះឆ្នោតនៅខែមិថុនា ខាងមុខនេះ។ ពួកគេព្រមានឈប់គាំទ្រគណបក្សសង្គ្រោះ និងដុតស្លាកសញ្ញាចោល បើពុំមានការបោះឆ្នោតជ្រើសរើសបេក្ខភាពឈឈ្មោះឡើងវិញទេ។
ទោះជាយ៉ាងណាអ្នកនាំពាក្យគណបក្សសង្គ្រោះជាតិ លោក អេង ឆៃអ៊ាង បញ្ជាក់នៅក្នុងសន្និសីទសារព័ត៌មានមួយនៅព្រឹកថ្ងៃទី៣១ ខែមករា ថា ការប្រកួតប្រជែងផ្ទៃក្នុងតែងតែមានទំនាស់ ប៉ុន្តែគណបក្សសង្គ្រោះជាតិ មានយន្តការច្បាស់លាស់បីដំណាក់កាល។ ដំណាក់កាលទី១ បេក្ខជនត្រូវដាក់ពាក្យសុំឈឈ្មោះដោយមានការជជែកគ្នានៅថ្នាក់មូលដ្ឋាន ទី២ បើមានបញ្ហា មន្ត្រីគណបក្សត្រូវចុះណែនាំ និងសម្របសម្រួល ហើយដំណាក់កាលទី៣ បើនៅតែមានបញ្ហា បេក្ខជនត្រូវឲ្យពលរដ្ឋបោះឆ្នោតជ្រើសរើសដោយផ្ទាល់។ លោកថា ការអនុវត្តបែបនេះទទួលបានជោគជ័យច្រើន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។