ការខ្វែងគំនិតគ្នាលើផ្លូវនយោបាយ បានចាប់ផ្ដើមតានតឹងសាជាថ្មីទៀតហើយរវាងបក្សដែលមានអាសនៈទាំងនៅក្នុងរដ្ឋសភា។ សង្គ្រាមពាក្យសម្ដីបានចាប់ផ្ដើមធ្វើឲ្យអ្នកនយោបាយកំពូលៗទាំងពីរបក្ស មកដល់ពេលនេះ ដើរចេញពីគ្នាមួយជំហានម្នាក់។ គណបក្សប្រជាជនកម្ពុជា ដែលជាបក្សកាន់អំណាចដ៏ចាស់វស្សាជាងគេនៅកម្ពុជា សម្រេចលុបចោលគម្រោងនៃការចរចា ដែលគ្រោងធ្វើនៅពាក់កណ្ដាលខែមករា នេះជាមួយបក្សប្រឆាំង។ ចំណែកបក្សប្រឆាំងវិញថា នឹងចុះជួបពលរដ្ឋតាមមូលដ្ឋានជំនួសអោយការចរចាជាមួយបក្សកាន់អំណាច។
អ្នកវិភាគព្រមានថា ការប្រេះស្រាំផ្នែកនយោបាយនេះ នឹងមិននាំឲ្យប្រទេសជាតិត្រូវរីកចំរើន និងអភិវឌ្ឍន៍ជឿនលឿនទេ ផ្ទុយទៅវិញ ការខ្វែងគំនិតលើផ្លូវនយោបាយនេះ នឹងរឹតតែធ្វើឲ្យសេដ្ឋកិច្ចជាតិបន្តធ្លាក់ចុះបន្ថែមទៀត ដែលបញ្ហានេះ ធ្វើឲ្យអ្នកវិនិយោគមិនហ៊ានធ្វើសេចក្ដីសម្រេចក្នុងការបណ្ដាក់ទុននៅកម្ពុជា។
ការព្រមានរបស់អ្នកវិភាគសង្គមនៅពេលនេះ ស្របពេលបក្សកាន់អំណាចប្រតិកម្មនឹងជំហររបស់បក្សប្រឆាំងថា លែងខ្វល់ពីការលុបគម្រោងនានារបស់បក្សប្រជាជនកម្ពុជា។ ការបិទផ្លូវជួបចរចាតាមរយៈការស្នើសុំឲ្យធ្វើវិសោធនកម្មបទបញ្ជាផ្ទៃក្នុងរដ្ឋសភា ដែលលោក ហ៊ុន សែន បង្ហើបកាលពីថ្ងៃទី១៦ ខែមករា ត្រូវបានអ្នកនាំពាក្យគណបក្សដែលគ្រប់គ្រងអំណាច គឺលោក ឈឹម ផលវរុណ ចាត់ទុកថា មូលហេតុនេះគឺដោយសារបក្សប្រឆាំងមានចេតនាមិនស្មោះត្រង់ក្នុងការចរចា និងជាអ្នកបង្កឲ្យមានភាពស្មុគស្មាញនាំឲ្យជំនួបនេះត្រូវបរាជ័យ៖ «រឿងការចរចាដោយសារពួកគាត់អត់ស្មោះត្រង់។ អ៊ីចឹងយន្តការនយោបាយនៃវប្បធម៌សន្ទនាគាត់ចង់យកយន្តការនយោបាយនៃវប្បធម៌សន្ទនាមកបំផ្លាញរដ្ឋធម្មនុញ្ញ បំផ្លាញឯករាជ្យភាពរបស់តុលាការ ហើយនិងគោលការណ៍បែងចែកអំណាច»។
បក្សនយោបាយធំៗទាំងពីរ ចាប់ផ្ដើមបែរខ្នងដាក់គ្នាម្ដងទៀត នៅពេលពពកខ្មៅបានរលាយបាត់កាលពីដើមខែធ្នូ ឆ្នាំ២០១៦ តាមរយៈការសម្របសម្រួលនយោបាយឈ្នះៗទាំងសង្ខាង។ ប៉ុន្តែជាអកុសល វិបត្តិនេះត្រូវរាំងស្ទះជាថ្មីឡើងវិញ នៅក្រោយលោក ស ខេង ផ្ញើលិខិតលុបចោលជំនួបរវាងបក្សទាំងពីរ កាលពីថ្ងៃទី១៨ ខែមករា។ ការបដិសេធ ជំនួបដោយបក្សកាន់អំណាចមិនបានបញ្ជាក់ពីមូលហេតុនេះ ធ្វើឡើង ១ថ្ងៃក្រោយពេលរដ្ឋមន្ត្រីក្រសួងមហាផ្ទៃ បានណាត់ជួបគ្នា ដែលគ្រោងនឹងរៀបចំនៅថ្ងៃទី២៥ ខែមករា។
ឆ្លើយតបនឹងការចោទប្រកាន់នេះ អ្នកនាំពាក្យបក្សប្រឆាំង លោក យឹម សុវណ្ណ បដិសេធក្នុងការបកស្រាយចំពោះជំហររបស់បក្សកាន់អំណាចនៅពេលនេះ។ ប៉ុន្តែទោះយ៉ាងណា មន្ត្រីនាំពាក្យរូបនេះយល់ឃើញថា អ្នកណាអាក្រក់ អ្នកណាល្អ ពលរដ្ឋម្ចាស់ឆ្នោតប្រាកដជាយល់ច្បាស់ជាងអ្នកនយោបាយទៅទៀត៖ «ខ្ញុំមិនឆ្លើយឆ្លងទេ។ យើងរង់ចាំមើលតែលទ្ធផលចុងក្រោយទៅថា ប្រជាពលរដ្ឋគាំទ្រនូវអ្វីដែលគណបក្សសង្គ្រោះជាតិ បាន និងកំពុងធ្វើ។ ដូច្នេះយើងសង្ឃឹមថា ប្រជាពលរដ្ឋមានសុភវិនិច្ឆ័យត្រឹមត្រូវ»។
ទាក់ទិនបញ្ហានេះ អ្នកវិភាគនយោបាយ យល់ឃើញថា ការជាប់គាំងផ្នែកនយោបាយ ទោះក្នុងរូបភាពតិច ឬច្រើនក្ដី រឿងនេះចៀសមិនផុតឡើយពីការប្រឈមនៃឱនភាពសេដ្ឋកិច្ច។
លោក អ៊ូ វីរៈ ប្រធានវេទិកាអនាគតឲ្យដឹងថា ភាពចម្រូងចម្រាសផ្នែកនយោបាយនេះ អាចមានលទ្ធផល២ ធំៗ ដែលនាំឲ្យជះឥទ្ធិពលអាក្រក់ដល់ខឿនសេដ្ឋកិច្ចជាតិ។ លោកបន្តថា ទី១ បើបក្សនយោបាយមួយខ្លាំងហើយជិះសេះលែងដៃដោយមិនគិតពីសេដ្ឋកិច្ច វានឹងរុញច្រានឲ្យប្រទេសជួបផលអាក្រក់។ ដោយឡែក ទី២ បក្សទាំងពីរខ្លាំងដូចគ្នា ហើយចង់ឈ្នះរៀងៗខ្លួន នោះរឹតតែជាបញ្ហាដ៏អាក្រក់ថែមទៀត។
អ្នកវិភាគនយោបាយរូបនេះ មើលឃើញថា មធ្យោបាយដែលល្អនោះ គឺបក្សនយោបាយ បើទោះជាខ្លាំងប៉ុណ្ណា ប៉ុន្តែត្រូវគោរពគោលការណ៍ប្រជាធិបតេយ្យ និងជាច្បាប់ជាគោល។ ហេតុផលនេះ ត្រូវបានលោក អ៊ូ វីរៈ យល់ឃើញថា គឺជាជម្រើសដ៏ល្អសម្រាប់សេដ្ឋកិច្ចជាតិ៖ «បើសិនជាយើងខ្លាំងទាំងពីរ ហើយយើងមាននីតិរដ្ឋជាយន្តការដោះស្រាយជម្លោះ ឬក៏បញ្ហាផ្លូវច្បាប់ទុកចិត្ត ជាពិសេសការគោរពធម្មនុញ្ញនិយម។ ខ្ញុំមើលទៅហ្នឹង គឺជារូបមន្តដ៏ល្អបំផុត»។
ជម្លោះនយោបាយនេះ ស្របពេលដំណើរការបោះឆ្នោតជ្រើសរើសសមាជិកក្រុមប្រឹក្សាឃុំសង្កាត់កាន់តែខិតជិតមកដល់ណាស់ទៅហើយ។ អ្នកវិភាគនយោបាយយល់ឃើញថា គណបក្សប្រឆាំងអាចនឹងស្ដារប្រជាប្រិយភាព បានមួយកម្រិតថែមទៀត ស្របពេលមន្ទិលសង្ស័យដែលអាចថា បែកបាក់ផ្ទៃក្នុងបក្សប្រឆាំងត្រូវបញ្ចប់ដោយការបិទទ្វារចរចានយោបាយនៅពេលនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។