លោក ហូរ វ៉ាន់ អនុប្រធានក្រុមការងាររាជធានីភ្នំពេញ និងជាអនុប្រធានគណៈកម្មការវិន័យគណបក្សសង្គ្រោះជាតិ បានឲ្យដឹងនៅថ្ងៃច័ន្ទ ទី២០ ខែមករា ថា កាលពីដើមសប្ដាហ៍មុន លោកបានដាក់លិខិតជូនលោក ប៉ា សុជាតិវង្ស អភិបាលសាលារាជធានីភ្នំពេញ ស្នើយកសម្ភារៈផ្សេងៗ ដែលត្រូវសមត្ថកិច្ចរាជធានីរឹបអូសនៅក្នុងព្រឹត្តិការណ៍បង្ក្រាបបាតុករដោយហិង្សានៅទីលានប្រជាធិបតេយ្យទាំងអស់មកវិញ។ ប៉ុន្តែលោកថ្លែងថា គិតមកដល់ថ្ងៃទី២០ ខែមករា នេះ មិនទាន់មានការឆ្លើយតបពីមន្ត្រីសាលារាជធានីចំពោះសំណើនេះទេ។
លោក ហូរ វ៉ាន់៖ «លិខិតនេះឯងមានបញ្ជីសារពើពន្ធទាំងអស់នៅលើទីលានប្រជាធិបតេយ្យ។ មានតាំងពីរោង មានសម្ភារៈបំពងសំឡេង មានកុំព្យូទ័រ ដែលយើងធ្វើការនៅទីនោះ។ មានសម្ភារៈធ្វើបាតុកម្ម មានបដា សម្ភារៈសុខាភិបាល ដូចជាថ្នាំពេទ្យ និងអុកស៊ីហ្សែន ព្រមទាំងសម្ភារៈចាំបាច់មួយចំនួនទៀត។ ក្នុងនោះក៏មានសម្ភារៈសម្រាប់សម្រាក ដូចជាប៉ៅអ៊ី ឬតង់ និងសម្ភារៈផ្សេងៗទៀតជាច្រើន»។
កាលពីថ្ងៃទី៤ ខែមករា កម្លាំងចម្រុះរដ្ឋាភិបាលរាប់រយនាក់ ប្រដាប់ដោយអាវុធ ខែល ដំបងឆក់ និងបំពង់ទីបជាដើម បានប្រើហិង្សាបង្ក្រាបទៅលើហ្វូងបាតុកររបស់គណបក្សសង្គ្រោះជាតិ ដែលបានប្រមូលផ្តុំគ្នាធ្វើបាតុកម្មអហិង្សានៅទីលានប្រជាធិបតេយ្យ និងបានរឹបអូសយកសម្ភារៈទាំងអស់។
ទាក់ទិនបញ្ហានេះ លោក ឡុង ឌីម៉ង់ មន្ត្រីនាំពាក្យសាលារាជធានីភ្នំពេញ បានឲ្យដឹងថា បានទទួលលិខិតរបស់គណបក្សសង្គ្រោះជាតិ ស្នើសុំសម្ភារៈរបស់ខ្លួនដែលអាជ្ញាធររឹបអូសពីការប្រមូលផ្តុំខុសច្បាប់នេះហើយ ហើយថា ករណីនេះថ្នាក់ដឹកនាំកំពុងពិនិត្យចំពោះការស្នើសុំនេះ៖ «យើងបានទទួលសំណើរបស់គាត់ហើយ ហើយយើងបានដាក់ជូនគណៈអភិបាលលោកពិនិត្យ និងសម្រេច។ ចាំមើលថ្ងៃច័ន្ទ នេះ ឬថ្ងៃស្អែកអីចាំខ្ញុំនឹងពិនិត្យថាតើថ្នាក់ដឹកនាំលោកមានការសម្រេចបែបណា»។
លោក ហូរ វ៉ាន ថ្លែងថា សម្ភារៈដែលអាជ្ញាធររឹបអូសពីទីលានប្រជាធិបតេយ្យកាលពីថ្ងៃទី៤ ខែមករា មានតម្លៃរាប់ម៉ឺនដុល្លារសហរដ្ឋអាមេរិក។ លោកសង្កត់ធ្ងន់ថា បើសិនជាមានការខូចខាត ឬបាត់បង់សម្ភារៈទាំងនោះ សាលារាជធានីភ្នំពេញ ជាអ្នកទទួលខុសត្រូវសងការខូចខាត។ ព្រោះព្រឹត្តិការណ៍បង្ក្រាបរបស់សមត្ថកិច្ចកាលពីថ្ងៃទី៤ ខែមករា ក្រុមបាតុករបក្សសង្គ្រោះជាតិ បានយល់ព្រមចាកចេញដោយសន្តិវិធី។
បញ្ហានេះដែរ លោក អំ សំអាត ប្រធានផ្នែកស៊ើបអង្កេតអង្គការលីកាដូ បានឲ្យដឹងថា សាលារាជធានី និងសមត្ថកិច្ចស្ថាប័នពាក់ព័ន្ធ ត្រូវប្រគល់សម្ភារៈទាំងអស់ដែលបានរឹបអូសនៅទីលានប្រជាធិបតេយ្យ កាលពីថ្ងៃទី៤ ខែមករា ប្រគល់ជូនម្ចាស់ដើមវិញដោយគ្មានលក្ខខណ្ឌ។ ហើយថា បើមានការបាត់បង់ ឬខូចខាតនូវសម្ភារៈទាំងនោះ អាជ្ញាធររាជធានីភ្នំពេញ ត្រូវសងការខូចខាតទាំងស្រុង៖ «កាលណាបើយើងរឹបអូសទ្រព្យសម្បត្តិរបស់គេ មិនបានប្រគល់ឲ្យគេវិញ វាជារឿងមួយដែលយើងមិនបានគោរពទៅដល់សិទ្ធិពលរដ្ឋ និងគោរពទៅតាមផ្លូវច្បាប់ទេ»។
បន្ថែមលើនេះ លោក អំ សំអាត ក្នុងនាមអង្គការឃ្លាំមើលសិទ្ធិមនុស្ស បានថ្កោលទោសចំពោះសកម្មភាពបង្ក្រាបដោយហិង្សា ផ្ដើមដោយកម្លាំងចម្រុះរដ្ឋាភិបាលទៅលើហ្វូងបាតុករអហិង្សា គណបក្សសង្គ្រោះជាតិ កាលពីថ្ងៃទី៤ ខែមករា ថាជាទង្វើខុសច្បាប់ និងបានរំលោភសិទ្ធិមនុស្សធ្ងន់ធ្ងរ និងទាមទារបញ្ឈប់ជាបន្ទាន់។
យ៉ាងនេះក្តី ថ្នាក់ដឹកនាំសាលារាជធានី និងថ្នាក់ដឹកនាំស្ថាប័នពាក់ព័ន្ធមួយចំនួនថ្លែងថា សកម្មភាពបង្ក្រាបរបស់កម្លាំងចម្រុះទៅលើការប្រមូលផ្តុំ ឬបាតុកម្មគណបក្សសង្គ្រោះជាតិ គឺមិនខុសច្បាប់ទេ ព្រោះការប្រមូលផ្ដុំគ្នានោះធ្វើឡើងអនាធិបតេយ្យ និងគ្មានច្បាប់អនុញ្ញាត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។