គណបក្សសង្គ្រោះជាតិ ប្រកាសនៅថ្ងៃទី៨ សីហា ថា គណបក្សនឹងចូលរួមធ្វើយុទ្ធនាការថ្ងៃច័ន្ទពណ៌ខ្មៅ ចាប់ពីពេលនេះតទៅ។
មន្ត្រីជាន់ខ្ពស់គណបក្សសង្គ្រោះជាតិ លោក អេង ឆៃអ៊ាង ឲ្យអាស៊ីសេរី ដឹងនៅថ្ងៃទី៨ សីហា ថា បក្សប្រឆាំងគាំទ្រយុទ្ធនាការថ្ងៃច័ន្ទពណ៌ខ្មៅ ហើយការចូលរួមរបស់បក្សប្រឆាំង គឺធ្វើតាមរយៈការស្លៀកពាក់ពណ៌ខ្មៅប្រមូលផ្តុំនៅទីស្នាក់ការកណ្ដាលគណបក្ស និងមានការថ្លែងសារ ជាដើម។
លោក អេង ឆៃអ៊ាង ថ្លែងថា «យើងប្រកាសជំហររបស់យើងគាំទ្រ ហើយយើងចូលរួមតាមរយៈយើងជួបជុំគ្នាជារៀងរាល់ថ្ងៃច័ន្ទ ពាក់អាវពណ៌ខ្មៅ ដើម្បីតស៊ូមតិក្នុងការទាមទារឲ្យមានការដោះលែងសកម្មជនគណបក្សនយោបាយ និងមន្ត្រីអង្គការសិទ្ធិមនុស្ស ក៏ដូចជាមន្ត្រីអាដហុក ( ADHOC ) ដែលកំពុងជាប់ពន្ធនា គារ និងដើម្បីទម្លាក់ចោលការចោទប្រកាន់ទាំងអស់នោះ»។
លោក អេង ឆៃអ៊ាង បញ្ជាក់ថា គណបក្សសង្គ្រោះជាតិ មិនមានអំណាចអ្វីឡើយ ដូចនេះអ្វីដែលគណបក្សនេះអាចធ្វើបាន គឺមានតែការប្រើប្រាស់សតិសម្បជញ្ញៈ មនសិការ ឬសម្ដីដើម្បីតស៊ូមតិឲ្យមានការដោះស្រាយបញ្ហាប្រឈមនានាដែលកំពុងគាបសង្កត់មកលើសិទ្ធិសេរីភាពពលរដ្ឋ និងអភ័យឯកសិទ្ធិរបស់តំណាងរាស្ត្រ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។