គណបក្សប្រឆាំងនៅរសៀលថ្ងៃអង្គារ ទី២១ មករា ធ្វើសន្និសីទកាសែតបង្ហាញពីហេតុផលជុំវិញការសម្រេចចិត្តរបស់មេដឹកនាំ មិនទៅជួបសំណេះសំណាលជាមួយប្រជាពលរដ្ឋនៅឃុំត្រើយស្លា នោះថា ដើម្បីបញ្ចៀសកុំឲ្យមានការប្រឈមមុខដោយហិង្សារវាងប្រជាពលរដ្ឋ ជាមួយកម្លាំងរបស់រដ្ឋាភិបាល។
លោក សម រង្ស៊ី ប្រធានគណបក្សសង្គ្រោះជាតិ មានប្រសាសន៍ប្រាប់អ្នកសារព័ត៌មានថា នេះជាលើកទីមួយដែលលោកឃើញក្រុមរបស់អ្នកកាន់អំណាចមួយក្រុម បានរៀបចំផែនការបង្ករឿង ក្នុងការជួបជុំរបស់គណបក្សសង្គ្រោះជាតិ ដែលអាចឈានទៅដល់អំពើហិង្សាផ្ទុះឡើងធ្ងន់ធ្ងរ។
ក្រៅពីនេះទៀត លោកមានការសង្ស័យថា ការរំខាននេះហាក់ជាមានការរៀបចំអន្ទាក់មួយ ឲ្យរូបលោក និងលោក កឹម សុខា ធ្លាក់ចូលទៅក្នុងអន្ទាក់នោះ៖ «ព្រោះថាដូចមានការធានា លោក ស ខេង បានអះអាងថា វាអត់អីទេ គេអនុញ្ញាតឲ្យធ្វើ ប៉ុន្តែអត់អីៗហ្នឹង អត់ស្រួលទេ កាលពីថ្ងៃ៣០ មីនា ១៩៩៧ ខ្ញុំក៏បានទទួលលិខិតពី លោក ស ខេង កាលនោះមានសហរដ្ឋមន្ត្រីក្រសួងមហាផ្ទៃ ស ខេង និង យូ ហុកគ្រី ទាំងពីរនាក់ហ្នឹងចុះហត្ថលេខាលើលិខិតជាលាយលក្ខណ៍អក្សរ ប្រាប់ថា ឲ្យធ្វើចុះ ធ្វើបាតុកម្មនៅមុខអគាររដ្ឋសភាចាស់នោះ ប្រាប់ថា ធ្វើចុះអត់អីទេ ស្រាប់តែម្ចាស់ថ្លៃអើយគ្រាប់បែកបួនគ្រាប់អ៊ីចឹង មិនធម្មតាទេ។ អ៊ីចឹង បានខ្ញុំកំពុងតែសង្ស័យហ្នឹង ព្រឹកមិញគេថាអត់អីទេ ឲ្យធ្វើចុះ ប៉ុន្តែដឹកមនុស្សពីក្រៅសុទ្ធតែអង្គរក្ស ហ៊ុន សែន មួយពាន់នាក់ចូលមក គេច្បាស់ជាមានគម្រោងអាក្រក់អ្វីមួយហើយ អ៊ីចឹងសុំឲ្យអ្នកសារព័ត៌មានបានជ្រាបរឿងនេះ»។
សកម្មជន និងមន្ត្រីគណបក្សប្រឆាំង បានឲ្យដឹងថា ការរំខាននោះកើតមុនមួយថ្ងៃ និងថ្ងៃនៃគម្រោងរបស់មេដឹកនាំចុះជួបប្រជាពលរដ្ឋ ដោយជំហានមុនដំបូងមានកងកម្លាំងប្រដាប់អាវុធ ក្រោយមកដោយមានការតវ៉ា ទើបកម្លាំងប្រដាប់អាវុធដកចេញ ហើយជំនួសមកវិញដោយកម្លាំងស៊ីវិល ដោយមានចងខ្សែក្រហមសម្គាល់ផង ហើយថា ក្រុមនោះមិនមែនជាអ្នកស្រុកស្អាង នោះទេ គឺជាកម្លាំងដែលគេបញ្ជូនពីភ្នំពេញទៅ។
វិទ្យុអាស៊ីសេរី ពុំទាន់អាចសុំការពន្យល់ពីមន្ត្រីនាំពាក្យក្រសួងមហាផ្ទៃ លោក ខៀវ សុភ័គ ឆ្លើយតបចំពោះការលើកឡើងរបស់មេដឹកនាំរបស់បក្សសង្គ្រោះជាតិនោះទេ។
យ៉ាងណាក្តី លោក កឹម សុខា អនុប្រធានគណបក្សអះអាងថា ទោះបីជាមានការប៉ុនប៉ងរំខានដល់ការជួបជុំសកម្មជនរបស់គណបក្សយ៉ាងណាក្តី ក៏លោកនៅតែមានគម្រោងចុះជួបប្រជាពលរដ្ឋនៅតាមបណ្ដាខេត្តបន្តទៀតដោយសន្តិវិធី៖ «យើងនៅតែបន្តសកម្មភាពនយោបាយតស៊ូនយោបាយដោយអហិង្សា គឺយើងជៀសដាច់ខាតនូវការប្រើប្រាស់អំពើហិង្សា យើងចង់ដោះស្រាយបញ្ហាប្រទេសជាតិ ដោយសន្តិវិធី ហើយយើងចង់យកបញ្ហាមកដោះស្រាយ យើងអត់យកហិង្សាមកដោះស្រាយដូចគណបក្សប្រជាជនកម្ពុជា ទេ សកម្មភាពយើងនៅតែបន្តចុះតាមខេត្តតទៅទៀត»។
ការជួបជុំសកម្មជនតាមបណ្ដាខេត្តដែលគណបក្សប្រឆាំងចាត់ទុកថា មានការរំខានខ្លាំងក្លាជាងគេនោះ គឺខេត្តបាត់ដំបង ដែលជាខេត្តរបស់ លោក ស ខេង ឧបនាយករដ្ឋមន្ត្រីក្រសួងមហាផ្ទៃ ឈរជាតំណាងរាស្ត្រនៅទីនោះ និងនៅស្រុកស្អាង ខេត្តកណ្ដាល ដែលស្ថិតនៅជិតផ្ទះរបស់លោកនាយករដ្ឋមន្ត្រី ហ៊ុន សែន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។