លោក សុន ឆ័យ ប្រធានក្រុមសមាជិកសភាគណបក្សសង្គ្រោះជាតិ ថ្លែងនៅថ្ងៃទី៥ សីហា មុនពេលចូលធ្វើសច្ចាប្រណិធានក្នុងព្រះបរមរាជវាំងថា ក្រោយពីធ្វើសច្ចាប្រណិធានហើយ សមាជិកសភា ៥៥រូប មកពីគណបក្សសង្គ្រោះជាតិ នឹងចូលប្រជុំសភាពេញអង្គនៅថ្ងៃទី៨ ខែសីហា។
លោកបញ្ជាក់ថា ការចូលធ្វើសច្ចាប្រណិធាន និងប្រជុំសភានេះ មិនមែនមកពីគណបក្សសង្គ្រោះជាតិ ទាល់ច្រក ឬមានការគំរាមកំហែងណាមួយឡើយ។ លោកបានបន្ថែមឲ្យដឹងថា រាល់បញ្ហានានាដែលនៅសេសសល់មិនទាន់ដោះស្រាយនោះ គណបក្សសង្គ្រោះជាតិ នឹងដោះស្រាយតាមផ្លូវច្បាប់។
ចំពោះករណីយុវជនសមាជិកគណបក្សសង្គ្រោះជាតិ ៣នាក់ ដែលត្រូវអាជ្ញាធរឃុំខ្លួន ហើយតុលាការធ្វើការចោទប្រកាន់នោះ លោក សុន ឆ័យ បានចាត់ទុកថា នោះជាបញ្ហានយោបាយ ហើយរឿងនេះត្រូវដោះស្រាយតាមកិច្ចព្រមព្រៀងនយោបាយរវាងគណបក្សទាំងពីរដែលមានកន្លងមកស្រាប់ហើយ។
បន្ថែមលើនេះ អនុប្រធានគណបក្សសង្គ្រោះជាតិ លោក កឹម សុខា មានប្រសាសន៍បន្ទាប់ពីធ្វើសច្ចាប្រណិធាននៅព្រះបរមរាជវាំងនៅថ្ងៃនេះថា លោកសង្ឃឹមថា យុវជនទាំង ៣នាក់ នឹងត្រូវបានដោះលែងឆាប់ៗនេះ។
នៅថ្ងៃទី៥ សីហា នេះដែរ នាយកដ្ឋានព័ត៌មាននៃអគ្គលេខាធិការដ្ឋានរដ្ឋសភា បានជូនដំណឹងចំពោះអ្នកសារព័ត៌មានជាតិ និងអន្តរជាតិថា នៅអង្គារ ទី៦ ខែសីហា ឆ្នាំ២០១៤ វេលាម៉ោង ៨ព្រឹក ក្រុមចរចាគណបក្សប្រជាជនកម្ពុជា និងគណបក្សសង្គ្រោះជាតិ សម្រាប់ធ្វើវិសោធនកម្មបទបញ្ជាផ្ទៃក្នុងរដ្ឋសភា នឹងបន្តការពិភាក្សាលើបញ្ហាសេសសល់បន្តទៀត នៅវិមានរដ្ឋសភាបន្ទប់លេខ២៧។សមាសភាពក្រុមចរចាខាងគណបក្សប្រជាជនកម្ពុជា ដឹកនាំដោយលោក ឈាង វុន ចំណែកខាងគណបក្សសង្គ្រោះជាតិ ដឹកនាំដោយលោក យ៉ែម បុញ្ញឫទ្ធិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។