ក្រុមអ្នកតំណាងរាស្ត្រភាគតិចក្នុងរដ្ឋសភា ជួបពិភាក្សាជាមួយក្រុមអង្គការសង្គមស៊ីវិលដែលធ្វើការផ្ដោតសំខាន់លើបរិស្ថាន និងធនធានធម្មជាតិ។ ជំនួបនេះធ្វើឡើងកាលពីថ្ងៃច័ន្ទ ទី២៨ ខែវិច្ឆិកា ដឹកនាំដោយលោក សុន ឆ័យ អ្នកតំណាងរាស្ត្រមកពីគណបក្សសង្គ្រោះជាតិ។
លោក សុន ឆ័យ បញ្ជាក់ថា កិច្ចពិភាក្សានោះ ក្រុមអ្នកតំណាងរាស្ត្រ និងតំណាងអង្គការមិនមែនរដ្ឋាភិបាល ស្វែងយល់ពីកិច្ចការពារបរិស្ថាន និងផ្ដល់ព័ត៌មានជុំវិញរឿងនេះដល់គ្នាទៅវិញទៅមក។
លោកថា ព័ត៌មានទាំងនេះ គឺជាឯកសារបន្ថែមទៀតក្នុងការផ្ដល់លទ្ធភាពឲ្យគណៈកម្មការនៃរដ្ឋសភាកោះហៅរដ្ឋមន្ត្រីពាក់ព័ន្ធមកសួរនាំទាក់ទងនឹងការបាត់បង់ប្រាក់ចំណូលរបស់ជាតិ ដែលបានមកពីអាជីវកម្មខ្សាច់ និងការប្រើប្រាស់ធនធានធម្មជាតិមិនត្រឹមត្រូវ ដែលនាំឲ្យមានផលប៉ះពាល់ជាច្រើន៖ «យើងឯកភាពគ្នាថា នឹងត្រូវកោះហៅមន្ត្រីពាក់ព័ន្ធមួយចំនួនមកសាកសួរផ្ទាល់មាត់ហើយនឹងប្រមូលឯកសារមួយចំនួនដាក់ទៅអង្គភាពប្រឆាំងអំពើពុករលួយផងដែរ...»។
លោកបន្តថា ក្រុមតំណាងរាស្ត្រនឹងទទួលយកនូវក្ដីកង្វល់របស់សង្គមស៊ីវិល ស្ដីពីអាជីវកម្មបូមខ្សាច់សមុទ្រនៅខេត្តកោះកុង ដែលកំពុងបង្កឲ្យផលប៉ះពាល់ដល់បរិស្ថាន ធនធានធម្មជាតិ ការរស់នៅរបស់ប្រជាពលរដ្ឋនៅទីនោះ ព្រមទាំងបញ្ហាពុករលួយក្នុងការនាំខ្សាច់ចេញទៅក្រៅប្រទេសទៅពិភាក្សាក្នុងរដ្ឋសភា ដើម្បីរកដំណោះស្រាយជុំវិញបញ្ហានេះ។
លោក សុន ឆ័យ សង្ឃឹមថា ក្រុមតំណាងរាស្ត្រគណបក្សកាន់អំណាចនឹងចូលសហការជាមួយសង្គមស៊ីវិល សកម្មជនបរិស្ថានដូចគ្នានេះដែរ ដើម្បីចូលរួមការពារធនធានធម្មជាតិ និងជំរុញឲ្យមានការគ្រប់គ្រងមួយប្រកបដោយតម្លាភាព និងសមធម៌៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។