គណបក្សសង្គ្រោះជាតិ នៅថ្ងៃអង្គារ ទី២៩ ខែតុលា បានចេញលិខិតចំហរបស់ខ្លួន ផ្ញើជូនបណ្ដាប្រទេសនានា ស្ថាប័នផ្តល់ប្រាក់កម្ចី និងក្រុមហ៊ុនវិនិយោគនានា ស្ដីពីការផ្តល់ប្រាក់កម្ចី និងការវិនិយោគជាមួយរដ្ឋាភិបាលអាណត្តិទី៥។
គណបក្សសង្គ្រោះជាតិ បានបង្ហាញជំហរថា មិនទទួលស្គាល់ និងពិនិត្យសើរើឡើងវិញនូវរាល់កិច្ចសន្យាផ្តល់ប្រាក់កម្ចី ការផ្តល់អាជ្ញាប័ណ្ណលើគម្រោងវិនិយោគ ការទិញលក់ ការដោះដូរ និងការជួលអចលនទ្រព្យដែលជាសម្បត្តិឯកជនរបស់រដ្ឋ ដែលភាគីពាក់ព័ន្ធធ្វើជាមួយរាជរដ្ឋាភិបាលកម្ពុជា បង្កើតដោយរដ្ឋសភានីតិកាលទី៥ ដែលបានបើកសម័យប្រជុំកាលពីថ្ងៃទី២៤ ខែកញ្ញា ឆ្នាំ២០១៣។
គណបក្សសង្គ្រោះជាតិ បានបញ្ជាក់ថា ការបោះឆ្នោតជ្រើសតាំងតំណាងរាស្ត្រនីតិកាលទី៥ មានភាពមិនប្រក្រតីធ្ងន់ធ្ងរ ហើយនៅមានភាពចម្រូងចម្រាសរវាងគណបក្សនយោបាយទាំងពីរ ដែលទទួលបានសំឡេងឆ្នោតប្រហាក់ប្រហែលគ្នា គឺគណបក្សប្រជាជនកម្ពុជា និងបក្សសង្គ្រោះជាតិ ជុំវិញលទ្ធផលនៃការបោះឆ្នោតនេះ។ ហេតុនេះហើយ ទាំងរដ្ឋសភា និងរាជរដ្ឋាភិបាល ដែលគណបក្សប្រជាជនកម្ពុជា បង្កើតដោយខ្លួនឯង មិនទាន់មានដំណោះស្រាយក្នុងការស៊ើបអង្កេត និងស្វែងរកការពិតនៃការបោះឆ្នោតនោះ គឺជារដ្ឋសភាឯកបក្ស និងជារាជរដ្ឋាភិបាលអធម្មនុញ្ញភាព ពោលគឺមិនស្របច្បាប់។ ហេតុដូច្នេះ ការចុះកិច្ចសន្យាផ្តល់ប្រាក់កម្ចី ការផ្តល់អាជ្ញាប័ណ្ណលើគម្រោងវិនិយោគ ការទិញលក់ ការដោះដូរ និងការជួលអចលនទ្រព្យដែលជាសម្បត្តិឯកជនរបស់រដ្ឋជាមួយនឹងរាជរដ្ឋាភិបាល ក៏មិនស្របច្បាប់ដែរ។
វិទ្យុអាស៊ីសេរី មិនអាចទាក់ទងសួរព័ត៌មានបន្ថែមពីមន្ត្រីនាំពាក្យទាំងពីររូបរបស់គណបក្សសង្គ្រោះជាតិ គឺ លោក យឹម សុវណ្ណ និងលោក យ៉ែម បុញ្ញឫទ្ធិ ដែលមានលេខទូរស័ព្ទភ្ជាប់ជាមួយលិខិតចំហបានទេ តាមទូរស័ព្ទ នៅរសៀលថ្ងៃអង្គារ ដោយទូរស័ព្ទរោទ៍ច្រើនសា ប៉ុន្តែមិនមានអ្នកលើកទទួល។
ទាក់ទិនបញ្ហានេះ លោក ផៃ ស៊ីផាន មន្ត្រីនាំពាក្យទីស្ដីការគណៈរដ្ឋមន្ត្រី មិនចាប់អារម្មណ៍ទៅលើលិខិតចំហរបស់គណបក្សសង្គ្រោះជាតិ ពេលនេះទេ។ លោកថ្លែងបែបចំអកថា សារគណបក្សសង្គ្រោះជាតិ គ្រាន់តែជាសារដើម្បីស្រែកបំពងសំឡេងឲ្យកងរំពង ប៉ុន្តែគ្មានខ្លឹមសារ៖ «អ្នកដែលទទួលខុសត្រូវលើកិច្ចសន្យាទាំងឡាយទាំងពួង យើងយល់ឃើញថា កម្រិតទៅតាមច្បាប់។ ច្បាប់ខ្លះត្រូវការ ៥០ភាគបូក ១ ច្បាប់ខ្លះត្រូវការ ២ភាគ៣ នៃចំនួនប្រជាពលរដ្ឋ។ ដូច្នេះ យោងទៅតាមច្បាប់ និងយោងទៅតាមទម្ងន់នៃអំណាចច្បាប់។ ដូច្នេះ នេះគ្រាន់តែជាការបញ្ចេញយោបល់មួយ ដែលគណបក្សសង្គ្រោះជាតិ មិនទាន់ក្លាយទៅជាគណបក្សមួយ ដែលទទួលបានការចាត់តាំងពីព្រះមហាក្សត្រ ទៅអង្គុយនៅរដ្ឋសភាទេ គ្រាន់តែធ្វើឲ្យឮសំឡេងដើម្បីឲ្យមានគេចាប់អារម្មណ៍តែប៉ុណ្ណឹងទេ ពីព្រោះមិនទាន់បានស្បថ ឬការតែងតាំងពីព្រះមហាក្សត្រនៅឡើយទេ»។
បញ្ហានេះដែរ លោក សុក សំអឿន នាយកប្រតិបត្តិក្រុមអ្នកច្បាប់ការពារសិទ្ធិកម្ពុជា ថ្លែងថា បើសិនគណបក្សមានអាសនៈទាំងពីរ គឺគណបក្សប្រជាជនកម្ពុជា និងបក្សសង្គ្រោះជាតិ មិនអាចចរចាត្រូវគ្នា ហើយខាងអន្តរជាតិលូកដៃ និងរកឃើញភាពមិនប្រក្រតីនៃការបោះឆ្នោត ហើយទាមទារឲ្យកម្ពុជា រៀបចំការបោះឆ្នោតឡើងវិញ អាចនឹងមានផលប៉ះពាល់លើកិច្ចសន្យាផ្សេងៗរវាងភាគីពាក់ព័ន្ធជាមួយរដ្ឋាភិបាល។ ប៉ុន្តែ បើគណបក្សទាំងពីរចរចាត្រូវរ៉ូវគ្នា ហើយបង្កើតរដ្ឋាភិបាលរួមគ្នា មិនមានបញ្ហាចំពោះកិច្ចសន្យាដែលបានធ្វើជាមួយរដ្ឋាភិបាលអាណត្តិទី៥ នេះទេ។
លោក សុក សំអឿន៖ «ក៏ប៉ុន្តែ បើសិនជាទៅថ្ងៃក្រោយទៅ គណបក្សទាំងពីរត្រូវរ៉ូវគ្នា និងមានការទទួលស្គាល់មិនអីទេ។ វាលើកលែងតែមិនមានការទទួលស្គាល់រហូត ឬមានបញ្ហាវិបត្តិអីមួយ ដែលមានលទ្ធផលមកថា មិនទទួលស្គាល់រដ្ឋាភិបាលហ្នឹង បានជាចាត់ទុកជាមោឃភាព។ ប៉ុន្តែ ករណីនេះជាអាចធ្វើឲ្យអ្នកវិនិយោគទុនមួយចំនួនរារែក ប៉ុន្តែអ្នកវិនិយោគខ្លះគេប្រថុយ ព្រោះគិតថា វាមិនដែលឈ្លោះគ្នាយូរទេ ជួនកាលគេនៅប្រថុយបន្តទៀត។ ខ្ញុំលើកឧទាហរណ៍ថា បើមានអន្តរជាតិគេគាបសង្កត់ ហើយដ៏អ៊ីចឹងទៅ វាត្រូវបង្កើតគណៈកម្មការថ្មី ហើយរកឃើញភាពមិនប្រក្រតីនៃលទ្ធផលបោះឆ្នោត ក៏បោះឆ្នោតម្តងទៀតអ៊ីចឹងទៅ អាហ្នឹងបានមានបញ្ហា។ តែបើចរចាត្រូវរ៉ូវគ្នា អាហ្នឹងជាគ្មានបញ្ហាអីទេ គឺត្រូវចប់»។
យ៉ាងណាក៏ដោយ នៅចុងបញ្ចប់នៃលិខិតចំហរបស់គណបក្សសង្គ្រោះជាតិ គណបក្សនេះរំពឹងមុតមាំថា បណ្ដាប្រទេសនានា ស្ថាប័នផ្តល់ប្រាក់កម្ចី និងក្រុមហ៊ុនវិនិយោគទាំងអស់ នឹងជ្រាបដោយឈរលើគោលការណ៍ប្រជាធិបតេយ្យ សេរីពហុបក្ស ជាពិសេសមិនចូលរួមរំលោភលើរដ្ឋធម្មនុញ្ញនៃព្រះរាជាណាចក្រកម្ពុជា ហើយក៏មិនរំលោភលើឆន្ទៈពិតប្រាកដរបស់ប្រជាពលរដ្ឋខ្មែរ ដែលនឹងអាចនាំឲ្យមានផលវិបាកជាអវិជ្ជមាននៅពេលអនាគត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។