មេភូមិកោះអំយើល ឃុំណងឃីលឹក ស្រុកកោះញែក ដែលមកពីគណបក្សកាន់អំណាច ត្រូវបានមន្ត្រីបក្សសង្គ្រោះជាតិ ចោទថា បានប្រើអំណាចជាមេភូមិទៅគាបពលរដ្ឋដែលគាំទ្រគណបក្សសង្គ្រោះជាតិ មិនឲ្យមានឱកាសបានមើលវីដេអូឃោសនារបស់បក្សប្រឆាំង។
បេក្ខជនតំណាងរាស្ត្រគណបក្សសង្គ្រោះជាតិ លោក ជឹម សាមុត នៅថ្ងៃទី៨ ខែកក្កដា មានប្រសាសន៍ថា គណបក្សសង្គ្រោះជាតិ បានដើរចែកឌីស (Disc) ឃោសនាឲ្យពលរដ្ឋនៅគ្រប់ភូមិ ក្នុងឃុំណងឃីលឹក។ ក្នុងឌីសនោះមានបង្ហាញពីគោលនយោបាយរបស់គណបក្សសង្គ្រោះជាតិ និងរឿងរ៉ាវផ្សេងៗដែលកើតមានក្នុងសង្គម ក្រោមការដឹកនាំរបស់បក្សកាន់អំណាច។
លោកបន្តថា បន្ទាប់ពីចែកឌីសរួចហើយ ពលរដ្ឋមិនបានទាំងមើលស្រួលបួលផង មេភូមិមកពីគណបក្សប្រជាជនកម្ពុជា ឈ្មោះ គិន នួន ក៏បានដើរប្រមូលឌីសនោះពីពលរដ្ឋវិញតែម្តង។ លោក ជឹម សាមុត ចាត់ទុកថា ទង្វើនេះជាទង្វើរំលោភអំណាច និងប្រព្រឹត្តខុសច្បាប់៖ «បើគាត់ទៅដកបានន័យថាគាត់ប្រកាន់ជំហរកាន់ជើងគណបក្សកាន់អំណាចបច្ចុប្បន្ន មិនមែនឈរទៅលើគោលការណ៍ស្មើភាពគ្នានោះទេ រឹតត្បិតសេរីភាពបញ្ចេញមតិផ្នែកនយោបាយអំពីប្រទេសជាតិ។ យើងមានគម្រោងដាក់ពាក្យបណ្តឹង»។
ទោះយ៉ាងណាក្តី មេភូមិកោះអំយើល ឃុំណងឃីលឹក លោក គិន នួន ឆ្លើយបំភ្លឺថា លោកមិនបានដើរប្រមូលឌីសឃោសនារបស់បក្សសង្គ្រោះជាតិ ពីពលរដ្ឋទេ។ លោកបន្តថា គឺប្រជាពលរដ្ឋឯណោះវិញទេ ដែលយកឌីសនោះទៅប្រគល់ឲ្យសមាជិកភូមិ៖ «អត់បានដកទេ អាលូវហ្នឹងរៀបចំប្រគល់ជូនវិញហើយ អត់ឲ្យទុកទេ»។
ទាក់ទងនឹងបញ្ហានេះ អនុប្រធានគណៈកម្មការរៀបចំការបោះឆ្នោតខេត្តមណ្ឌលគិរី លោក គិន ជាន មានប្រសាសន៍ថា រឿងរ៉ាវនេះគណៈកម្មការរៀបចំការបោះឆ្នោតខេត្ត បានដោះស្រាយបញ្ចប់ដោយបញ្ជាឲ្យមេភូមិនោះប្រគល់ឌីសឃោសនាឲ្យពលរដ្ឋវិញ។ លោកបន្តថា គ.ខ.ប គ្រាន់តែបានទទួលដំណឹងពីមន្ត្រីបក្សសង្គ្រោះជាតិ ប៉ុណ្ណោះ មិនទាន់ទទួលបានបណ្ដឹងនោះទេ៖ «ការដកអីហ្នឹង បើសិនការដកវាខុស បើប្រជាជនប្រគល់ឲ្យជារឿងមួយផ្សេងទៀត ខ្ញុំមិនទាន់ស៊ើបអង្កេតបានទេ គ្រាន់តែគេរាយការណ៍មកវិញថាភ័ន្តច្រឡំអីចឹង ឲ្យសិក (SEC) ឲ្យគេសម្រួលជាមួយប្រជាជនអីទៅ»។
ទោះយ៉ាងណាក៏ដោយ មន្ត្រីគណបក្សសង្គ្រោះជាតិ ឲ្យដឹងថា កាលពីថ្ងៃទី៤ ខែកក្កដា ក៏មានករណីមេប៉ុស្តិ៍ស្រែអំពូម ស្រុកពេជ្រា ហាមឃាត់មិនឲ្យពលរដ្ឋចាក់ឌីសឃោសនារបស់គណបក្សសង្គ្រោះជាតិ មើលដែរ។ ប៉ុន្តែ ពលរដ្ឋទាំងនោះមិនហ៊ានប្ដឹងមេប៉ុស្តិ៍នោះទេ ដោយសារតែពួកគាត់បារម្ភពីសុវត្ថិភាពក្នុងការរស់នៅ។
បើតាមមន្ត្រីគណៈកម្មការរៀបចំការបោះឆ្នោតខេត្តមណ្ឌលគិរី មិនទាន់ទទួលបានបណ្ដឹងណាមួយពីគ្រប់មជ្ឈដ្ឋាននៅឡើយទេ។ រដ្ឋធម្មនុញ្ញនៃព្រះរាជាណាចក្រកម្ពុជា ចែងថា ពលរដ្ឋខ្មែរមានសិទ្ធិគ្រប់គ្រាន់ក្នុងការធ្វើនយោបាយ សិទ្ធិទទួលបានព័ត៌មាន និងសិទ្ធិសេរីភាពក្នុងការបញ្ចេញមតិ។ ការហាមឃាត់មិនឲ្យពលរដ្ឋទទួលបានព័ត៌មានណាមួយ ជាការរំលោភបំពានសិទ្ធិពលរដ្ឋ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។