ការធ្វើបាតុកម្មនេះឡើង គឺដើម្បីតវ៉ា ទាមទារឲ្យមានការកែទម្រង់សមាសភាពគណៈកម្មាធិការជាតិរៀបចំការបោះឆ្នោត (គ.ជ.ប) និងទាមទារឲ្យ គ.ជ.ប អនុវត្តតាមអនុសាសន៍សង្គមស៊ីវិល និងតំណាងពិសេសរបស់អង្គការសហប្រជាជាតិ លោក សុរិយា ស៊ូប៊ែឌី (Surya Subedi)។
ក្រុមបាតុករថ្លែងការណ៍នៅទីលានប្រជាធិបតេយ្យរយៈពេលជាង ៣ម៉ោង ដើម្បីធ្វើការប្ដេជ្ញាចិត្តហែក្បួនមហាបាតុកម្ម។ ការហែក្បួនដែលមានសកម្មជនចូលរួមប្រមាណជាង ៥ពាន់នាក់ បានធ្វើដំណើរទម្លុះរនាំងសមត្ថកិច្ចពីទីលានប្រជាធិបតេយ្យកាត់តាមផ្លូវប៉ាស្ទ័រ រហូតមកដល់ទីស្នាក់ការសហភាពអឺរ៉ុប និងបន្តទៅកាន់ការិយាល័យឧត្ដមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំនៅកម្ពុជា។
មុនហែក្បួន ប្រធានស្ដីទីគណបក្សសង្គ្រោះជាតិ លោក កឹម សុខា មានប្រសាសន៍ថា បាតុកម្មនេះមានសន្ទុះខ្លាំងក្លាជាងពេលណាៗទាំងអស់។ លោកបន្តថា គណបក្សកាន់អំណាចត្រូវតែកែទម្រង់សមាសភាព គ.ជ.ប ដើម្បីធានាការបោះឆ្នោតដោយសេរី និងយុត្តិធម៌។
លោក កឹម សុខា ថែមទាំងប្រកាសហៅនាយករដ្ឋមន្ត្រី លោក ហ៊ុន សែន ដើម្បីបើកការជជែកតទល់គ្នាពីគោលនយោបាយជាសាធារណៈឲ្យពលរដ្ឋបានដឹងទៀតផង៖ «បើសិនណាគណបក្សប្រជាជនកម្ពុជា ថាគណបក្សសង្គ្រោះជាតិ ធ្វើបាន ឬមិនបាន មកដេញដោលគ្នាសាកមើល៍ បើចិត្តសឿង។ ខ្ញុំសូមផ្តាំទៅលោកនាយករដ្ឋមន្ត្រី បើចិត្តសឿងចេញមកឃោសនាមក កុំយកតំណែងតួនាទីរដ្ឋ និងមធ្យោបាយរដ្ឋមករិះគន់វាយប្រហារគណបក្សប្រឆាំង គឺមិនស្របច្បាប់ឡើយ»។
មិនត្រឹមតែលោក កឹម សុខា ទេ សែរាជវង្សដែលចូលគណបក្សប្រឆាំង ព្រះអង្គម្ចាស់ ស៊ីសុវត្ថិ ធម្មិកោ ក៏ឡើងថ្លែងការណ៍សំដៅទៅលោកនាយករដ្ឋមន្ត្រី ហ៊ុន សែន។ ព្រះអង្គមានបន្ទូលថា គណបក្សកាន់អំណាចខ្លាចចាញ់ឆ្នោតទើបប្រើយុទ្ធសាស្ត្រវាយប្រហារសំដៅបុគ្គលព្រះអង្គ ហើយលោក ហ៊ុន សែន ឆ្លៀតយកពាក្យការពាររាជបល្ល័ង្កដើម្បីកេងចំណេញនយោបាយ។
បាតុករតវ៉ាចងបូពណ៌សលើក្បាល ដែលមានសរសេរអក្សរថា ដូរ គ.ជ.ប អនុវត្តតាមអនុសាសន៍សង្គមស៊ីវិល អនុវត្តតាមអនុសាសន៍របស់អង្គការសហប្រជាជាតិ ហើយក៏មានលើកបដា និងស្រែកជយឃោស ប្រាប់ពលរដ្ឋសងខាងផ្លូវពីបំណងនៃមហាបាតុកម្មដែរ។
នៅតាមដងផ្លូវវិញមនុស្សម្នាក្មេងចាស់ ប្រុសស្រី ឈរត្រៀបត្រាមើលការដង្ហែក្បួន ដោយអ្នកខ្លះលើកដៃស្វាគមន៍ ហើយយុវជនជាច្រើនយកកាមេរ៉ាថតរូបថែមទៀត។
ចំណែកសមត្ថកិច្ចវិញ ក៏បានដាក់ពង្រាយកម្លាំងគ្រប់ស្ថាប័ន ដូចជាកងកម្លាំងបង្ក្រាបកូដកម្ម បាតុកម្ម អង្គភាពចារកម្ម កងរាជអាវុធហត្ថ អង្គភាពពន្លត់អគ្គីភ័យ។ សមត្ថកិច្ចទាំងនោះភាគច្រើនមិនមានកាំភ្លើងជាប់ខ្លួនទេ តែមានដំបងឆក់ និងខែលកាន់ស្ទើរគ្រប់ដៃ។
យ៉ាងណាក៏ដោយ ប្រជាពលរដ្ឋចូលរួមបាតុកម្ម លោកស្រី ស្រី វី ថ្លែងថា គាត់មិនបារម្ភពីសុវត្ថិភាពផ្ទាល់ខ្លួនបន្តិចណាឡើយ បើទោះជាធ្លាប់ដឹងថា រាល់បាតុកម្មតែងមានការបង្ក្រាបយ៉ាងព្រៃផ្សៃក៏ដោយចុះ។
លោកស្រីបន្តថា គាត់សប្បាយចិត្តដោយសារតែបាតុកម្មលើកនេះដង្ហែក្បួនខុសពីបាតុកម្មលើកទី១៖ «លើកនេះពិតជាអស្ចារ្យជាងមុន។ លើកមុនយើងអត់បានដើរហែទេ ឥឡូវយើងធ្វើបានសម្រេចហើយ ដោយបានដើរហែទាំងអស់គ្នា»។
ឆ្លើយតបនឹងបញ្ហាទាំងនេះ មន្ត្រីអ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន ចាត់ទុកថា ការដើរហែក្បួនរបស់គណបក្សប្រឆាំងជាទង្វើរំលោភច្បាប់ ផ្ទុយពីការសន្យារបស់ខ្លួនជាមួយអាជ្ញាធរ។
លោកបន្តថា ចំពោះការឲ្យមានការតតាំងគ្នារវាងលោកនាយករដ្ឋមន្ត្រី ហ៊ុន សែន និងមេបក្សប្រឆាំងនោះ គឺមិនចាំបាច់នោះទេ ព្រោះថា ច្បាប់កម្ពុជា មិនតម្រូវឡើយ៖ «ឯកឧត្ដម កឹម សុខា គាត់មិនមែនជាចៅក្រម ប៉ុន្តែប្រជាពលរដ្ឋទេ ជាចៅក្រម ដែលគេឃើញថា តើស្នាដៃរបស់សម្ដេចបានប៉ុណ្ណា ល្អ ឬអាក្រក់ ស្ថិតនៅលើសន្លឹកឆ្នោតខែកក្កដា»។
បាតុកម្មរបស់គណបក្សសង្គ្រោះជាតិ លើកទី១ ធ្វើឡើងកាលពីថ្ងៃទី២៤ ខែមេសា មានមនុស្សចូលរួមប្រមាណ ៣ពាន់នាក់ ដើម្បីទាមទារឲ្យគណៈកម្មាធិការជាតិរៀបចំការបោះឆ្នោត និងដាក់ញត្តិឲ្យ គ.ជ.ប ប៉ុន្តែអាជ្ញាធរមិនអនុញ្ញាតឲ្យហែក្បួននោះទេ។ តែមន្ត្រី គ.ជ.ប បានមកទទួលញត្តិរបស់បក្សប្រឆាំងដល់ទីលានប្រជាធិបតេយ្យ។
បន្ទាប់ពីហែញត្តិទៅដល់សហភាពអឺរ៉ុប និងការិយាល័យឧត្ដមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំនៅកម្ពុជា មន្ត្រីបក្សប្រឆាំងត្រូវបានអនុញ្ញាតឲ្យចូលជួបមន្ត្រីនៅអង្គភាពទាំងពីរនោះ ដើម្បីជជែកគ្នាពីបំណងបក្សប្រឆាំង។ បន្ទាប់មកភាគីទាំងពីរក៏សម្រេចទទួលយកញត្តិរបស់បក្សប្រឆាំងទៅពិចារណា។ មន្ត្រីបក្សសង្គ្រោះជាតិឲ្យដឹងថា គណបក្សប្រឆាំងនឹងនៅតែតវ៉ាដរាបណា គ.ជ.ប នៅតែមិនឯករាជ្យ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។