គណបក្សសង្គ្រោះជាតិ អះអាងថា ខ្លួនមិនបានផ្លាស់ប្ដូរជំហរ និងគោលដៅរបស់ខ្លួនទេក្នុងការចរចាជាមួយគណបក្សប្រជាជនកម្ពុជា ក្នុងពេលកន្លងមក ដើម្បីជំរុញឲ្យមានការរៀបចំ គ.ជ.ប ថ្មី។ ការប្រកាសរបស់គណបក្សសង្គ្រោះជាតិបែបនេះ ធ្វើឡើងក្នុងពេលដែលមានមន្ទិលថា ការដោះលែងសកម្មជនបក្សសង្គ្រោះជាតិ កាលពីថ្ងៃទី១៣ មេសា អាចជាលទ្ធផលនៃការបន្ទន់ជំហររបស់គណបក្សសង្គ្រោះជាតិ ក្នុងការចរចាជាមួយគណបក្សប្រជាជនកម្ពុជា។
ក្រោយពីមានការដោះលែងសមាជិកមួយចំនួនរបស់គណបក្សសង្គ្រោះជាតិ និងសកម្មជនសិទ្ធិមនុស្ស សកម្មជនដីធ្លីមួយចំនួន នៅថ្ងៃទី១៣ ខែមេសា គណបក្សសង្គ្រោះជាតិ បានចេញផ្សាយសេចក្ដីថ្លែងការណ៍មួយបញ្ជាក់ឡើងវិញអំពីជំហរនយោបាយ និងគោលដៅរបស់ខ្លួនក្នុងការចរចាជាមួយមន្ត្រីគណបក្សប្រជាជនកម្ពុជា កន្លងមក។
សេចក្ដីថ្លែងការណ៍បានថ្លែងថា ការបង្កើតបានគណៈកម្មាធិការជាតិរៀបចំការបោះឆ្នោតថ្មីមួយឡើង គឺជំហរគណបក្សសង្គ្រោះជាតិ មិនបានផ្លាស់ប្ដូរទេ និងគណបក្សសុំថ្លែងអំណរគុណចំពោះវីរភាពជនរងគ្រោះទាំងឡាយដែលតែងតែផ្ញើសារមកឲ្យអ្នកដឹកនាំគណបក្សថា កុំយល់ព្រមយកពួកគាត់ធ្វើជាថ្នូរក្នុងការចរចាណាមួយ ហើយត្រូវរក្សាជំហរដើម្បីសម្រេចឲ្យបាននូវគោលដៅជាតិនិយម និងប្រជាធិបតេយ្យ។
គេនៅចាំបានថា នៅព្រឹកថ្ងៃទី៩ មេសា ពោលគឺនៅប្រមាណ ១ម៉ោងប៉ុណ្ណោះមុនពេលលោកនាយករដ្ឋមន្ត្រី ហ៊ុន សែន ទៅចូលរួមប្រជុំសភាដើម្បីបោះឆ្នោតផ្ដល់សេចក្ដីទុកចិត្តដល់សមាសភាព គ.ជ.ប ថ្មី លោក ហ៊ុន សែន បានដំឡើងសំឡេងខ្លាំងៗវាយប្រហារទៅលើថ្នាក់ដឹកនាំគណបក្សសង្គ្រោះជាតិ គឺលោក កឹម សុខា ទាក់ទងទៅនឹងការទាមទាររបស់អនុប្រធានបក្សប្រឆាំងរូបនេះឲ្យមានការដោះលែងលោក មាជ សុវណ្ណារ៉ា ចេញពីពន្ធនាគារឲ្យបានមុនចូលឆ្នាំខ្មែរ។ បើស្ដាប់សំឡេង និងការបញ្ចេញកំហឹងរបស់លោក ហ៊ុន សែន ពេលនោះ គេហាក់ពិបាកនឹងជឿថា លោក មាជ សុវណ្ណារ៉ា និងសកម្មជនបក្សសង្គ្រោះជាតិ ត្រូវបានគេដោះលែងវិញណាស់។
យ៉ាងណាក៏ដោយ ក្រោយការគំរាមរបស់លោក ហ៊ុន សែន មិនដល់១សប្ដាហ៍ផង លោក មាជ សុវណ្ណារ៉ា សកម្មជនបក្សប្រឆាំង សកម្មជនដីធ្លី និងព្រះសង្ឃដែលត្រូវបានអាជ្ញាធរចាប់ខ្លួន និងតុលាការកាត់ទោសទាក់ទងនឹងព្រឹត្តិការណ៍នយោបាយដែលបានកើតឡើងនៅក្រោយការបោះឆ្នោតខែកក្កដា ឆ្នាំ២០១៣ ក៏ត្រូវបានតុលាការដោះលែងឲ្យមានសេរីភាពវិញ។ ពិសេសជាងនេះទៀតនោះ ការដោះលែងសកម្មជនជនបក្សប្រឆាំង ធ្វើឡើងភ្លាមៗបន្ទាប់ពីសមាសភាព គ.ជ.ប ថ្មី បានប្រកាសចូលកាន់តំណែង។ ប្រការនេះ បានធ្វើឲ្យពលរដ្ឋមួយចំនួនមានមន្ទិលចំពោះការដោះលែងមន្ត្រី និងសកម្មជនបក្សប្រឆាំងយ៉ាងឆាប់រហ័សដូចនេះ។
ទោះជាយ៉ាងណា ក្នុងសេចក្ដីប្រកាសព័ត៌មានកាលពីថ្ងៃទី១៣ មេសា ពោលគឺនៅបន្ទាប់ពីសកម្មជនបក្សខ្លួនត្រូវបានតុលាការដោះលែង គណបក្សសង្គ្រោះជាតិ បានអះអាងថា ក្នុងការចរចាជាមួយគណបក្សប្រជាជនកម្ពុជា រហូតសម្រេចបង្កើតបាន គ.ជ.ប ថ្មីមួយ គណបក្សសង្គ្រោះជាតិ មិនដែលប្រែប្រួលជំហររបស់ខ្លួនម្ដងណាឡើយ ហើយបានរក្សាគោលដៅតាំងពីដើមទីយ៉ាងជាប់លាប់ គឺធ្វើយ៉ាងណាជំរុញឲ្យមាន គ.ជ.ប ថ្មីមួយ ដែលមានសមាសភាពអាចទុកចិត្តបាន។
សម្រាប់អ្នកវិភាគនយោបាយឯករាជ្យលោកបណ្ឌិត សុខ ទូច វិញ យល់ឃើញថា ការប្រកាសបញ្ជាក់មិនប្រែប្រួលជំហររបស់គណបក្សសង្គ្រោះជាតិ នៅក្រោយការប្រកាសសមាសភាព គ.ជ.ប និងនៅក្រោយសកម្មជនបក្សខ្លួនត្រូវបានគេដោះលែងនោះ គឺគណបក្សសង្គ្រោះជាតិ ចង់បង្ហាញប្រាប់អ្នកគាំទ្ររបស់ខ្លួនថា ពួកគេមិនបានទោរទន់ជំហរក្នុងពេលចរចាជាមួយគណបក្សប្រជាជនកម្ពុជានោះទេ។
លោកថា អ្វីដែលគណបក្សប្រឆាំងធ្វើ គឺដើម្បីការពារប្រជាប្រិយភាពរបស់ខ្លួន៖ «យើងឃើញហើយថា ថ្ងៃនេះលោក សម រង្ស៊ី និងសម្ដេចនាយក ដើរជាមួយគ្នាទៅបើកអង្គរសង្ក្រាន្ត មានន័យថា គេបារម្ភខ្លាចអ្នកគាំទ្រថា គណបក្សសង្គ្រោះជាតិ បាត់បង់ ត្រូវបានគេយកហើយ បានត្រូវគ្នាទាំងដងទាំងផ្លែហើយ អ៊ីចឹងដើម្បីបង្ហាញអ្នកគាំទ្រ គេថាគេអត់ទេ គេត្រូវនិយាយមុន អ៊ីចឹងវាជាយុទ្ធសាស្ត្ររបស់អ្នកនយោបាយរៀងខ្លួនដើម្បីកុំឲ្យបាត់អ្នកគាំទ្រ»។
យ៉ាងណាក៏ដោយ ប្រធានគណបក្សសង្គ្រោះជាតិ លោក សម រង្ស៊ី បានបញ្ជាក់ថា ដោយសារតែមានវប្បធម៌សន្ទនារវាងថ្នាក់ដឹកនាំគណបក្សសង្គ្រោះជាតិ និងគណបក្សប្រជាជនកម្ពុជា ទើបមានសមាសភាព គ.ជ.ប ថ្មីមួយអាចទុកចិត្តបានលេចចេញជារូបរាង ហើយក៏ដោយសារតែវប្បធម៌សន្ទនានេះ ទើបសកម្មជនបក្សប្រឆាំង និងសកម្មជនដីធ្លីត្រូវបានតុលាការដោះលែងឲ្យមានសេរីភាព។
លោក សម រង្ស៊ី ក៏បានអំពាវនាវឲ្យពលរដ្ឋខ្មែរមកពីគ្រប់និន្នាការគណបក្សនយោបាយទាំងអស់ ប្រកាន់ខ្ជាប់នូវវប្បធម៌សន្ទនានេះទៀតផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។