មន្ត្រីជាន់ខ្ពស់នៃគណៈកម្មាធិការជាតិរៀបចំការបោះឆ្នោត ៣រូប កំពុងជាប់បណ្ដឹងនៅតុលាការ ក្រោមបទក្លែងបន្លំឯកសារសាធារណៈ និងប្រើប្រាស់ឯកសារសាធារណៈក្លែងក្លាយ ក្នុងការរៀបចំការបោះឆ្នោត។
គណបក្សសង្គ្រោះជាតិ បានដាក់ពាក្យប្ដឹងទៅព្រះរាជអាជ្ញាអមសាលាដំបូងរាជធានីភ្នំពេញ កាលពីថ្ងៃទី១១ ខែកញ្ញា ប្ដឹង លោក អ៊ឹម សួស្តី ប្រធាន គ.ជ.ប លោក ទេព នីថា អគ្គលេខាធិការ គ.ជ.ប និង លោក ហ៊ឺ រ៉ុង ប្រធាននាយកដ្ឋានប្រតិបត្តិការនៃ គ.ជ.ប ពីបទក្លែងបន្លំឯកសារសាធារណៈ និងប្រើប្រាស់ឯកសារសាធារណៈក្លែងក្លាយ តាមមាត្រា៦២៩ និងមាត្រា៦៣០ នៃក្រមព្រហ្មទណ្ឌ។
ក្នុងលិខិតប្រកាសព័ត៌មានរបស់គណបក្សសង្គ្រោះជាតិ បញ្ជាក់ថា មន្ត្រីជាន់ខ្ពស់ គ.ជ.ប ទាំង ៣រូប ព្រមទាំងមន្ត្រីក្រោមបង្គាប់ បានក្លែងបន្លំឈ្មោះអ្នកបោះឆ្នោតនៅក្នុងបញ្ជីបោះឆ្នោត ក្លែងលិខិតបញ្ជាក់អត្តសញ្ញាណ និងបន្លំឲ្យមានការបោះឆ្នោតជំនួស ក្លែងបន្លំលទ្ធផលនៃការបោះឆ្នោត ការរំលោភច្បាប់ និងបទបញ្ជា និងនីតិវិធីសម្រាប់ការបោះឆ្នោត។
ប្រសិនបើតុលាការរកឃើញមានពិរុទ្ធដូចពាក្យបណ្ដឹងរបស់គណបក្សប្រឆាំងនោះ លោក អ៊ឹម សួស្តី លោក ទេព នីថា និង លោក ហ៊ឺ រ៉ុង អាចជាប់ពន្ធនាគារចន្លោះពី ២ឆ្នាំ ទៅ ១០ឆ្នាំ និងពិន័យប្រាក់ពី ៤លានរៀល ទៅ ១០លានរៀល នៅក្នុងម្នាក់ៗ។
ជុំវិញការដាក់ពាក្យបណ្ដឹងរបស់គណបក្សប្រឆាំងនេះ លោក អ៊ឹម សួស្តី ប្រធាន គ.ជ.ប មានប្រសាសន៍ថា គណបក្សសង្គ្រោះជាតិ មានសិទ្ធិប្ដឹងទៅតុលាការចំពោះអ្វីដែលគណបក្សនេះមិនពេញចិត្ត។ ប៉ុន្តែ ក្នុងនាមលោកជាអ្នកដឹកនាំ គ.ជ.ប លោកព្យាយាមអនុវត្តរៀបចំការបោះឆ្នោតស្របតាមច្បាប់បោះឆ្នោត៖ «អ្វីដែលយើងបានដោះស្រាយកន្លងមកហើយ គឺក្រុមប្រឹក្សាធម្មនុញ្ញបានពិនិត្យម្តងហើយ អ្វីៗយើងធ្វើតាមច្បាប់»។
មិនខុសគ្នាដែរ អគ្គលេខាធិការ គ.ជ.ប លោក ទេព នីថា បញ្ជាក់ថា តាមច្បាប់បោះឆ្នោត ការសម្រេចចុងក្រោយនៃបណ្ដឹងជុំវិញការបោះឆ្នោត គឺនៅក្រុមប្រឹក្សាធម្មនុញ្ញ ហើយក្រុមប្រឹក្សាធម្មនុញ្ញបានសម្រេច និងបិទផ្លូវតវ៉ារួចហើយចំពោះបណ្ដឹងរបស់គណបក្សនយោបាយ។
យ៉ាងណា លោក ទេព នីថា បានត្រៀមខ្លួនជាស្រេចចំពោះការកោះហៅរបស់តុលាការ ឲ្យចូលបំភ្លឺ ប្រសិនបើតុលាការត្រូវអនុវត្តតាមនីតិវិធីរបស់ខ្លួន៖ «ការសម្រេចរបស់តុលាការ គឺការសម្រេចរបស់គាត់ ហើយ គ.ជ.ប ត្រៀមខ្លួនជាស្រេច អនុវត្តតាមនីតិវិធីរបស់តុលាការ»។
ប្រធាននាយកដ្ឋានប្រតិបត្តិការនៃ គ.ជ.ប លោក ហ៊ឺ រ៉ុង ដែលមានឈ្មោះក្នុងបណ្ដឹងរបស់គណបក្សប្រឆាំងដែរនោះ បញ្ជាក់ថា លោកមិនមានការព្រួយបារម្ភចំពោះការប្ដឹងផ្តល់របស់គណបក្សប្រឆាំងទេ ហើយចាត់ទុកបណ្ដឹងរបស់គណបក្សប្រឆាំងនៅពេលនេះ ជារឿងដដែលៗដូចគ្នានឹងបណ្ដឹងដែលបានដាក់ទៅ គ.ជ.ប និងក្រុមប្រឹក្សាធម្មនុញ្ញ៖ «គ.ជ.ប ដូចជាអនុវត្តតាមច្បាប់បទបញ្ជានីតិវិធីទាំងអស់ ហើយអត់មានបញ្ហាអីទេ ហើយយើងដូចជាអត់មានការព្រួយបារម្ភអីទេ ករណីនេះ ព្រោះយើងអនុវត្តបានត្រឹមត្រូវហើយ»។
អនុប្រធានគណៈកម្មាធិការវិន័យរបស់គណបក្សសង្គ្រោះជាតិ លោក ហូរ វ៉ាន់ បញ្ជាក់ថា ថ្នាក់ដឹកនាំ គ.ជ.ប បានក្លែងបន្លំឯកសារសាធារណៈជាច្រើននៅពេលរៀបចំការបោះឆ្នោត ដែលរំលោភទៅលើបទល្មើសព្រហ្មទណ្ឌ ហើយ គ.ជ.ប ពុំអាចវិនិច្ឆ័យទោសខ្លួនឯងបានទេ៖ «គណបក្សសង្គ្រោះជាតិ ចង់បានយុត្តិធម៌។ គ.ជ.ប រំលោភច្បាប់ក្នុងការក្លែងលិខិតសាធារណៈ បង្កើតឲ្យមានឈ្មោះបោះឆ្នោតស្ទួន។ល។ ទាំងអស់នេះជាបទល្មើសព្រហ្មទណ្ឌ»។
យ៉ាងណា នាយកប្រតិបត្តិនៃគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា លោក គល់ បញ្ញា យល់ឃើញថា គណបក្សប្រឆាំងកុំទាន់គិតគូររឿងដាក់ពាក្យបណ្ដឹង ចំពោះអ្នករៀបចំការបោះឆ្នោត ហើយងាកទៅប្រឹងប្រែងធ្វើការងារអង្កេតភាពមិនប្រក្រតីនៃការបោះឆ្នោត ដោយបង្កើតឲ្យមានគណៈកម្មការឯករាជ្យស្វែងរកការពិតចេញជារូបរាង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។