លោក កឹម សុខា អនុប្រធានគណបក្សសង្គ្រោះជាតិ មានប្រសាសន៍នៅព្រឹកថ្ងៃច័ន្ទ ទី១៨ ខែវិច្ឆិកា ថា មហាបាតុកម្មទ្រង់ទ្រាយធំដែលគ្រោងធ្វើនៅថ្ងៃទិវាសិទ្ធិមនុស្សអន្តរជាតិ ១០ធ្នូ ខាងមុខ មិនទាន់កំណត់ទីតាំងប្រមូលផ្តុំឲ្យពិតប្រាកដទេ។
លោកថា ទីតាំងប្រមូលផ្តុំអាចធ្វើនៅរាជធានីភ្នំពេញ ឬអាចជ្រើសយកទីប្រជុំជនខេត្តណាមួយដើម្បីរៀបចំ ព្រោះក្រុមការងារគណបក្សកំពុងពិគ្រោះយោបល់។
លោក កឹម សុខា ឲ្យដឹងថា គោលបំណងនៃការដឹកនាំធ្វើមហាបាតុកម្មប្រមូលផ្ដុំសមាជិកគាំទ្រជាថ្មីនេះ គឺដើម្បីទាមទារឲ្យរដ្ឋាភិបាលគោរពសិទ្ធិមនុស្ស និងស្វែងរកយុត្តិធម៌ជូនម្ចាស់ឆ្នោត ជាពិសេសដើម្បីរកយុត្តិធម៌ជូនកម្មកររោងចក្រ អែស.អិល (SL) និងប្រជាពលរដ្ឋដែលអាជ្ញាធរបាញ់ឲ្យស្លាប់ និងរងរបួសធ្ងន់កាលពីថ្ងៃទី១២ ខែវិច្ឆិកា។
លោក កឹម សុខា៖ «ក្នុងថ្មីៗនេះ កាលពីថ្ងៃទី១២ ខែវិច្ឆិកា នេះ អាជ្ញាធររដ្ឋាភិបាលគណបក្សប្រជាជនកម្ពុជាហ្នឹង បានប្រើអំពើហិង្សាយ៉ាងឃោរឃៅបំផុតទៅលើកម្មករ សម្លាប់ប្រជាពលរដ្ឋស្លូតត្រង់ដែលមិនដឹងខ្លួន និងវ៉ៃព្រះសង្ឃជាដើម។ អំពើទាំងអស់ហ្នឹងហើយដែលសបញ្ជាក់ឲ្យឃើញថា គណបក្សប្រជាជនមិនគោរពកិច្ចសន្យា ហើយគណបក្សប្រជាជនកម្ពុជាហ្នឹង នៅតែប្រើគំនិតចាស់ដដែល មិនមានការផ្លាស់ប្ដូរទេ។ ដូច្នេះយើងមិនអាចទៅចរចា ឬទៅធ្វើការជាមួយគណបក្សប្រជាជនកម្ពុជាបានឡើយ បើសិនណាមិនរកយុត្តិធម៌ មិនរកការពិត ហើយទុកឲ្យប្រជារាស្ត្ររងគ្រោះយ៉ាងសាហាវព្រៃផ្សៃនេះតទៅទៀត»។
គម្រោងដឹកនាំមហាបាតុកម្មជាថ្មីរបស់គណបក្សប្រឆាំង កើតមានបន្ទាប់ពីជំនួបចរចារវាងមន្ត្រីគណបក្សសង្គ្រោះជាតិ និងគណបក្សប្រជាជនកម្ពុជា លើវិវាទបោះឆ្នោតត្រូវបរាជ័យជាបន្តបន្ទាប់រួចមក។
វិទ្យុអាស៊ីសេរី មិនអាចទាក់ទងលោក ជាម យៀប និងលោក ព្រំ សុខា មន្ត្រីជាន់ខ្ពស់គណបក្សប្រជាជនកម្ពុជា ដែលជាសមាជិកដឹកនាំជំនួបចរចាលើវិវាទនយោបាយរវាងគណបក្សប្រជាជន និងបក្សសង្គ្រោះជាតិបានទេ នៅថ្ងៃច័ន្ទ។ ប៉ុន្តែកន្លងមក មន្ត្រីជាន់ខ្ពស់គណបក្សប្រជាជនកម្ពុជា បានអះអាងថា ទ្វារចរចាលើវិវាទបោះឆ្នោត ឬវិវាទនយោបាយរវាងគណបក្សទាំងពីរមិនទាន់បញ្ចប់ទេ និងរង់ចាំគណបក្សប្រឆាំងមកធ្វើការងាររួមគ្នា។
លោកបណ្ឌិត សុខ ទូច អ្នកជំនាញវិទ្យាសាស្ត្រនយោបាយ និងជាអ្នកវិភាគស្ថានការណ៍នយោបាយឯករាជ្យ។ លោកបានចាត់ទុកគម្រោងយកថ្ងៃទិវាសិទ្ធិមនុស្ស ១០ ធ្នូ របស់មេដឹកនាំគណបក្សសង្គ្រោះជាតិ ប្រមូលផ្តុំមហាជនធ្វើបាតុកម្មជាថ្មី អាចជាការដាក់សម្ពាធនយោបាយមួយដល់ការចរចាជាមួយបក្សប្រជាជនកម្ពុជា។ ទោះយ៉ាងណា អ្នកវិភាគរូបនេះមើលឃើញថា គណបក្សប្រឆាំងហាក់មិនមានកម្មវិធីនយោបាយរបស់ខ្លួនឲ្យបានត្រឹមត្រូវទេ ម្ដងទាមទារយកតំណែងប្រធានសភា ឬតំណែងនេះតំណែងនោះ ប៉ុន្តែក្រោយមកច្រានចោល៖ «ចុងក្រោយនេះគណបក្សប្រជាជនកម្ពុជា មានការប្រែប្រួលដែលគិតស្មានមិនដល់នូវគំហុកនយោបាយនៃការទទួលស្គាល់របស់គណបក្សប្រជាជន។ អ៊ីចឹងគណបក្សសង្គ្រោះជាតិត្រូវតែរក ឬក៏គួរតែរកយុត្តិសាស្ត្រនយោបាយណាមួយដើម្បីរកដំណោះស្រាយនយោបាយ។ យើងកុំចង់រុញប្រទេសជាតិយើងឲ្យចូលទៅក្នុងវិបត្តិជ្រៅមួយដែលឈានដល់បង្ហូរឈាមគ្នា ឬក៏បែកបាក់កាន់តែជ្រៅទៅ គឺជាអត់មានទៅសង្ឃឹមនរណា ហើយឈប់ទៅសង្ឃឹមមហាអំណាច គ្រប់ភាគីទាំងសងខាង។ ការដែលនិយាយរបស់ខ្ញុំនេះ មិនសំដៅទៅលើភាគីណាទេ»។
លោកសាស្ត្រាចារ្យបណ្ឌិត សុខ ទូច ដែលជាសកលវិទ្យាធិការនៃសកលវិទ្យាល័យខេមរៈផងនោះ ផ្ដល់វិភាគទៅអ្នកជយោបាយដែលឈ្នះអាសនៈសភានីតិកាលទី៥ទាំងពីរ គួរបញ្ចប់វិវាទនយោបាយតទៅទៀត និងរួមគ្នាដឹកនាំអភិវឌ្ឍន៍ប្រទេសប្រសើរជាងពាក់មុខយក្សដាក់គ្នា ដែលនាំឲ្យប្រទេសជាតិអន្តរាយ។
អ្នកវិភាគរូបនេះព្រួយបារម្ភថា បើសិនជាអ្នកនយោបាយខ្មែរបន្តឈ្មោះគ្នា ឬអាត្មានិយមតែរៀងៗខ្លួនដូចសព្វថ្ងៃនេះ អាចនាំឲ្យជម្លោះផ្ទៃក្នុងរីករាលដាលធ្ងន់ធ្ងរ និងប្រទេសជាតិជួបវិបត្តិសេដ្ឋកិច្ចនៅថ្ងៃអនាគត។
ទោះជាបែបណា រហូតមកដល់ថ្ងៃច័ន្ទ ទី១៨ ខែវិច្ឆិកា មន្ត្រីគណបក្សប្រជាជនកម្ពុជា និងគណបក្សសង្គ្រោះជាតិ មិនទាន់បានកំណត់ថ្ងៃជួបចរចាជាថ្មីទេ បន្ទាប់ពីជំនួបចុងក្រោយរវាងក្រុមការងារបច្ចេកទេស ឬជំនាញគណបក្សទាំងពីរមិនបានទទួលលទ្ធផលកាលពីថ្ងៃទី៥ ខែវិច្ឆិកា រួចមក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។