តំណាងគណបក្សសង្គ្រោះជាតិ អះអាងថា គណបក្សកំពុងរៀបចំដាក់លិខិតជាផ្លូវការទៅគណៈកម្មាធិការជាតិរៀបចំការបោះឆ្នោត (គ.ជ.ប) ដើម្បីសុំតវ៉ារឿងសាលារាជធានីភ្នំពេញ មិនអនុញ្ញាតឲ្យហែក្បួនឃោសនាបោះឆ្នោតនៅតាមដងផ្លូវសំខាន់ៗមួយចំនួននៅរាជធានីភ្នំពេញ។ ចំណែកមន្ត្រី គ.ជ.ប បញ្ជាក់ថា នឹងពិគ្រោះយោបល់ឡើងវិញចំពោះសំណើរបស់គណបក្សសង្គ្រោះជាតិ។
មន្ត្រីគណបក្សសង្គ្រោះជាតិ អះអាងថា ការចេញបម្រាមរបស់សាលាក្រុងដែលមិនអនុញ្ញាតឲ្យហែក្បួនឃោសនាបោះឆ្នោតឃុំ-សង្កាត់នៅតាមដងផ្លូវមួយចំនួននៅរាជធានីភ្នំពេញ គឺប្រៀបបាននឹងការរារាំងមិនឲ្យគណបក្សនយោបាយចេញឃោសនាបោះឆ្នោត ហើយជាទង្វើមួយផ្ទុយទៅនឹងច្បាប់ស្ដីពីការបោះឆ្នោតដែរ។
ប្រធាននាយកដ្ឋាននីតិកម្ម និងកិច្ចការបោះឆ្នោតគណបក្សសង្គ្រោះជាតិ អ្នកស្រី ម៉េង សុភារី ថ្លែងនៅក្នុងកិច្ចប្រជុំផ្សព្វផ្សាយស្ដីពីកិច្ចការពារសុវត្ថិភាព និងសណ្ដាប់ធ្នាប់ សម្រាប់ដំណើរការបោះឆ្នោតឃុំ-សង្កាត់អាណត្តិទី៤ នៅថ្ងៃទី៩ ឧសភា ថា ទីតាំងសាធារណៈដែលសាលាក្រុងមិនអនុញ្ញាតឲ្យហែក្បួន ដូចនៅតាមផ្លូវ សួនច្បារ និងផ្សារ ជាដើម គឺសុទ្ធតែជាទីកន្លែងដែលសម្បូរទៅដោយមនុស្សច្រើន ហើយងាយស្រួលសម្រាប់គណបក្សនយោបាយចេញឃោសនាផ្សព្វផ្សាយគោលនយោបាយទៅដល់ប្រជាពលរដ្ឋ។
អ្នកស្រីបន្ថែមថា ខាងគណបក្សប្រឆាំងនឹងដាក់លិខិតទៅគណៈកម្មាធិការជាតិរៀបចំការបោះឆ្នោត ឲ្យបានមុនថ្ងៃឃោសនាបោះឆ្នោតខាងមុខ ដើម្បីគិតពិចារណាឡើងវិញចំពោះបម្រាមរបស់សាលារាជធានីភ្នំពេញនេះ៖ « កន្លែងសំខាន់ៗមានមនុស្សអ៊ូអរដែលគណបក្សនយោបាយអាចផ្ញើសារទៅកាន់ពលរដ្ឋទាំងនោះ សឹងតែអស់ទៅហើយនៅក្នុងរាជធានីភ្នំពេញ។ អ៊ីចឹងមកដល់ពេលនេះ មិនដឹងថា គ . ជ . ប សម្រេចបែបណា ? ព្រោះការចេញបម្រាមបែបនេះ គឺហាក់បីដូចជាការរារាំងមិនឲ្យឃោសនា »។
កាលពីពេលថ្មីៗនេះ សាលារាជធានីភ្នំពេញ បានចេញលិខិតហាមមិនឲ្យគណបក្សនយោបាយហែក្បួនតាមផ្លូវ ដូចជាមហាវិថីព្រះនរោត្តម សហព័ន្ធរុស្ស៊ី ព្រះមុនីវង្ស ព្រះសីហនុ ម៉ៅសេទុង ផ្លូវទេពផន វិថីសុធារស សុរាម្រិត និងផ្លូវជុំវិញព្រះបរមរាជវាំង។ ចំណែកកន្លែងសាធារណៈដូចជានៅផ្លូវជុំវិញផ្សាធំថ្មី អូរឫស្សី អូឡាំពិក ទួលទំពូង ផ្សារដេប៉ូ ដើមគ សួនមុខវាំង វាលព្រះមេរុ ផ្នែកនៃសួនច្បារមុខវត្តបទុមវតី ទីធ្លារូបសំណាកលោកយាយពេញ និងសួនច្បារលោកនាយករដ្ឋមន្ត្រី ហ៊ុន សែន ជាដើម។
អគ្គលេខាធិការ គ.ជ.ប លោក ទេព នីថា បកស្រាយថា បម្រាមរបស់សាលាក្រុង គឺដើម្បីការពារសន្តិសុខ សណ្ដាប់ធ្នាប់ និងការកកស្ទះចរាចរណ៍ប៉ុណ្ណោះ ព្រោះកន្លងទៅ ពលរដ្ឋ និងអាជីវករធ្លាប់ត្អូញត្អែរ និងតវ៉ានៅពេលគណបក្សខ្លះបានទៅឃោសនា និងចែកប័ណ្ណឃោសនាដល់ក្នុងផ្សារ ព្រមទាំងបិទផ្សាយប័ណ្ណឃោសនាតាមរបងផ្ទះ សាលារៀន និងមន្ទីរពេទ្យ ដែលមិនគោរពតាមការស្នើសុំរបស់អាជ្ញាធរ។ លោកបន្តថា បម្រាមបែបនេះក៏ដើម្បីបញ្ចៀសកុំឲ្យជាន់សកម្មភាពគ្នា ប្រសិនបើមានក្បួនរថយន្តគណៈប្រតិភូធ្វើដំណើរនៅតាមដងផ្លូវនោះ៖ « ផ្លូវនៅរាជធានីភ្នំពេញ មានគណៈប្រតិភូចុះឡើង ដូច្នោះត្រូវការពារសន្តិសុខ ដើម្បីបង្កលក្ខណៈងាយស្រួលជូនគណៈប្រតិភូបរទេសជាន់ខ្ពស់ជាន់ទាបឆ្លងកាត់ផ្លូវហ្នឹង »។
លោក ទេព នីថា បន្តថា ការចេញបម្រាមបែបនេះ មិនមែនមានតែនៅក្នុងរាជធានីភ្នំពេញឡើយ គឺធ្វើឡើងនៅទូទាំងប្រទេស។ លោកបញ្ជាក់ថា គ.ជ.ប នឹងលើកយកបញ្ហានេះទៅពិគ្រោះយោបល់ជាមួយគណៈកម្មការរាជធានីរៀបចំការបោះឆ្នោត ដើម្បីពិនិត្យឡើងវិញចំពោះទីតាំងណាដែលអាចអនុញ្ញាតឲ្យមានការហែក្បួន ថ្វីត្បិតតែមិនបានដកបម្រាមទាំងស្រុងក្ដី។
ទោះជាយ៉ាងណាក៏ដោយ សមាគម និងអង្គការសង្គមស៊ីវិលនៃបន្ទប់ស្ថានការណ៍សម្រាប់ការបោះឆ្នោតឆ្នាំ២០១៧ ដែលជាបណ្ដុំអង្គការសង្គមស៊ីវិលចំនួន៣៨ បានចេញសេចក្ដីថ្លែងការណ៍មួយនៅថ្ងៃទី៩ ឧសភា ដោយយល់ឃើញថា ការចេញបម្រាមរបស់សាលារាជធានី បិទផ្លូវមួយចំនួនមិនឲ្យគណបក្សនយោបាយហែក្បួន ក្រោមហេតុផលបញ្ចៀសការកកស្ទះចរាចរណ៍ គឺជារឿងមិនត្រឹមត្រូវ និងមិនសមហេតុផលឡើយ ព្រោះទីតាំងទាំងនោះ គឺជាកន្លែងប្រមូលផ្ដុំដោយប្រជាពលរដ្ឋជាអ្នកបោះឆ្នោត។
ក្រុមអង្គការទាំងនេះបន្តថា ទង្វើដដែលនេះក៏មិនបង្ហាញឲ្យឃើញអំពីការធានារបស់រដ្ឋាភិបាល ដើម្បីធ្វើយ៉ាងណាឲ្យការបោះឆ្នោតដោយសេរី និងត្រឹមត្រូវដែរ។ ម្យ៉ាងវិញ ការឃោសនាបោះឆ្នោតឃុំ-សង្កាត់រយៈពេល ១៤ថ្ងៃ ចាប់ពីថ្ងៃទី២០ ឧសភា ដល់ថ្ងៃទី២ មិថុនា គឺកាត់បន្ថយការហែក្បួនមកត្រឹមចំនួនពីរដងក្នុងមួយគណបក្សនយោបាយ ហើយបើកាត់បន្ថយទីធ្លាសាធារណៈ និងផ្លូវមួយចំនួន នឹងធ្វើឲ្យការអនុវត្តសិទ្ធិប្រមូលផ្ដុំ និងហែក្បួនកាន់តែធ្លាក់ចុះថែមទៀត។
នៅអំឡុងឃោសនាបោះឆ្នោតខាងមុខ រដ្ឋាភិបាលបានសម្រេចដាក់ពង្រាយនគរបាលចំនួន ៧នាក់ក្នុងមួយឃុំ-សង្កាត់ ដើម្បីការពារសន្តិសុខ សណ្ដាប់ធ្នាប់ ហើយនគរបាល កងរាជអាវុធហត្ថ និងកងយោធពលខេមរភូមិន្ទចំនួន ២០នាក់ នឹងត្រៀមអន្តរាគមន៍នៅតាមក្រុង ស្រុក និងខណ្ឌ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។