បេក្ខជនតំណាងរាស្ត្រជាប់ឆ្នោតបក្សសង្គ្រោះជាតិ ៥៥រូប បានសម្រេចចិត្តចូលស្បថក្នុងវាំងនៅរសៀលថ្ងៃទី៥ សីហា នេះ នៅពេលបក្សប្រជាជនកម្ពុជា មិនទាន់យល់ព្រមលើចំណុចខ្លះ ចំពោះការធ្វើវិសោធនកម្មរដ្ឋធម្មនុញ្ញ ទាក់ទងនឹងអង្គការរៀបចំការបោះឆ្នោត ដែលស្នើឡើងដោយបក្សសង្គ្រោះជាតិ។
ក៏ប៉ុន្តែ បក្សសង្គ្រោះជាតិ នឹងបន្តចរចាជាមួយបក្សប្រជាជន បន្តទៀត បន្ទាប់ពីបេក្ខជនតំណាងរាស្ត្រជាប់ឆ្នោតបក្សសង្គ្រោះជាតិ បានធ្វើសច្ចាប្រណិធាន និងចូលរដ្ឋសភា ហើយរំពឹងថា ការស្នើរបស់បក្សសង្គ្រោះជាតិ នឹងត្រូវបក្សប្រជាជន ទទួលយល់ព្រមជាក់ជាមិនខាន នេះបើតាមលិខិតរបស់ប្រធានបក្សសង្គ្រោះជាតិ ផ្ញើទៅ លោក ស ខេង ថ្ងៃទី៤ សីហា។
ចំណុចសំខាន់ពីរដែលបក្សប្រជាជន មិនយល់ព្រមនោះ គឺទាក់ទងនឹងស្វ័យភាពរបស់គណៈកម្មាធិការជាតិរៀបចំការបោះឆ្នោត (គ.ជ.ប) និងការបន្ថែមខ្លឹមសារទាក់ទងការជ្រើសរើសសមាជិកថ្មីជំនួស នៅពេលបាត់បង់សមាជិកភាពតាមរូបមន្ត ៤-៤-១ ស្របតាមបញ្ញត្តិនៃមាត្រា ១៥១ថ្មី នៃសេចក្ដីព្រាងវិសោធនកម្មរដ្ឋធម្មនុញ្ញ ដែលបក្សសង្គ្រោះជាតិ បានទាមទារ។
ក្នុងលិខិតនោះ លោក សម រង្ស៊ី បានប្រើពាក្យថា «ជឿជាក់» ហើយបានចាត់ទុកថា ការចរចាជាមួយបក្សប្រជាជន «អាច» ទទួលយកបាន ចំពោះដំណាក់កាលមុនពេលចូលសភា ដោយសរសេរថា៖ «គណបក្សសង្គ្រោះជាតិ ជឿជាក់ថា នីតិវិធីនៃការជ្រើសរើសនេះនឹងធានារក្សាសមាសភាព គ.ជ.ប តាមរូបមន្ត ៤-៤-១ ស្របតាមបញ្ញត្តិនៃមាត្រា ១៥១ថ្មី នៃសេចក្ដីព្រាងវិសោធនកម្មរដ្ឋធម្មនុញ្ញ...»។
ទោះយ៉ាងណា នៅប៉ុន្មានម៉ោងមុនបេក្ខជនតំណាងរាស្ត្រជាប់ឆ្នោតបក្សសង្គ្រោះជាតិចូលសច្ចាប្រណិធាន លោក សម រង្ស៊ី បានប្រកាសជំហរដាច់ខាតជាថ្មីម្ដងទៀត តាមគេហទំព័របក្សសង្គ្រោះជាតិ ថា លោកមិនក្បត់ឆន្ទៈរាស្ត្រដែលគាំទ្របក្សសង្គ្រោះជាតិទេ៕
សូមរង់ចាំអាន និងស្ដាប់ព័ត៌មានពិស្ដារ...
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។