ការព្រមាននេះ បន្ទាប់ពីសកម្មជនរបស់គណបក្សសង្គ្រោះជាតិ មកពីតំបន់ខុសៗគ្នានៅខេត្តកំពត ចំនួន ៨នាក់ ត្រូវបានតុលាការនៃខេត្តមួយនេះសម្រេចឃុំខ្លួនមុនបោះឆ្នោតអាណត្តិទី៥។ ប៉ុន្តែ ម្នាក់ក្នុងចំណោមនោះ ត្រូវបានដោះលែងឲ្យនៅក្រៅឃុំបណ្ដោះអាសន្ន កាលពីពាក់កណ្ដាលខែសីហា កន្លងទៅនេះ។
មន្ត្រីជាន់ខ្ពស់គណបក្សប្រឆាំងដ៏ធំមួយនៅកម្ពុជា ចាត់ទុកថា ការមិនអើពើក្នុងការដោះលែងសកម្មជនរបស់ខ្លួនចំនួន ៧នាក់បន្ថែមទៀត នៅខេត្តកំពត ឲ្យមានសេរីភាពឡើងវិញ គឺជាផ្នែកមួយដែលមិនអាចទម្លាយភាពទាល់ច្រកផ្នែកនយោបាយ ដែលកំពុងជាប់គាំងក្រោយថ្ងៃបោះឆ្នោតនេះបានទេ។
នេះជាការព្រមានដ៏កម្រអំពីសកម្មជនដែលជាប់ពន្ធនាគាររបស់ លោក កឹម សុខា អនុប្រធានគណបក្សសង្គ្រោះជាតិ កាលពីថ្ងៃទី១៩ សីហា នៅស្រុកឈូក ខេត្តកំពត ចាប់តាំងពីការបោះឆ្នោតរួច។ លោក កឹម សុខា ប្រាប់វិទ្យុអាស៊ីសេរី ក្រោយកិច្ចពិភាក្សាជាមួយអ្នកគាំទ្ររបស់ខ្លួនប្រហែល ៦០០នាក់ ថា លោកនឹងតតាំងករណីនេះទៅដៃគូសន្ទនា និងអន្តរជាតិ ប្រឆាំងការចាប់ខ្លួន ដែលលោកហៅថា ធ្វើឡើងខុសនីតិវិធី និងរើសអើងផ្នែកនយោបាយ។ ហើយដំណើរដែលឈានទៅរកកិច្ចចរចាណាមួយ ដើម្បីទម្លាយភាពជាប់គាំងនេះ នឹងមិនអាចកើតឡើងបានឡើយ ប្រសិនបើរកឃើញថា អ្នកគាំទ្ររបស់ខ្លួននៅតែមិនត្រូវបានដោះលែងវិញទេនោះ។
លោក កឹម សុខា៖ «យើងនៅតែរកមេធាវីដើម្បីធ្វើការតាមផ្លូវច្បាប់។ ប៉ុន្តែ ទន្ទឹមនឹងធ្វើការតាមផ្លូវច្បាប់នេះ ក៏យើងប្រាប់ទៅអង្គទូត និងសហគមន៍អន្តរជាតិ ដើម្បីប្រាប់ទៅរដ្ឋាភិបាលថា កុំប្រើប្រាស់នូវតុលាការ ដើម្បីគំរាមទៅសកម្មជននយោបាយ នេះគឺអយុត្តិធម៌។ ទីបី មុននឹងមានដំណោះស្រាយនយោបាយ ដើម្បីរៀបចំដំណើរការសភា ឬរដ្ឋាភិបាល គឺយើងខ្ញុំនឹងទាមទារឲ្យដោះលែងអ្នកអស់នោះជាមុនសិន»។
កាលពីចុងខែកក្កដា កន្លងទៅនេះ សកម្មជនរបស់បក្សប្រឆាំងចំនួន ៨នាក់ ក្នុងចំណោមនោះ ម្នាក់ត្រូវបានដោះលែងឲ្យនៅក្រៅឃុំបណ្ដោះអាសន្ន មកពីតំបន់ផ្សេងៗគ្នា។ ការចាប់ខ្លួននេះ ដោយចោទប្រកាន់ពីបទខុសៗគ្នា មានជាអាទិ៍ ដឹកអនុផលព្រៃឈើដោយគ្មានលិខិតអនុញ្ញាត គំរាមថានឹងសម្លាប់ដែលបញ្ជាដោយមានលក្ខខណ្ឌ អំពើសេពសន្ថវៈ និងសិប្បកម្មអនុផលព្រៃឈើដោយគ្មានលិខិតអនុញ្ញាត ហើយអ្នកទាំងនោះកំពុងរង់ចាំការដោះស្រាយនៅឡើយ។
ព្រះរាជអាជ្ញាអមសាលាដំបូងខេត្តកំពត លោក ជុំ សំបាន អះអាងថា ករណីនេះកំពុងស្ថិតនៅក្នុងដៃចៅក្រមស៊ើបសួរ។ ទោះជាយ៉ាងណា លោកបញ្ជាក់ថា ក្រោយពីបញ្ចប់ការស៊ើបអង្កេតសំណុំរឿងនេះ នឹងត្រូវលើកយកទៅជំនុំជម្រះ៖ «ទាក់ទិននឹងរឿងជម្រះពេលណា ខ្ញុំមិនទាន់ដឹង ព្រោះនៅក្នុងដំណាក់កាលស៊ើបសួរ ខាងចៅក្រមស៊ើបសួរនោះណា។ ហើយគាត់ស៊ើបសួរចប់ពេលណា ជម្រះពេលនោះហើយ»។
អ្នកស្រាវជ្រាវរបស់អង្គការលីកាដូ (Licadho) ប្រចាំតំបន់ លោក យន់ ផល្លី គិតថា អ្នកគាំទ្របក្សប្រឆាំងគួរត្រូវបានដោះលែង។ លោកចាត់ទុកថា ព្រោះនេះ គឺជាទំនាស់នយោបាយ។ ហេតុនេះ អ្នកគាំទ្របក្សប្រឆាំង គួរត្រូវបានផ្ដល់សេរីភាពពេញលេញ ដោយពុំទាមទារឲ្យមានការជំនុំជម្រះអ្វីឡើយ៖ «ការតាមដានដោយយកចិត្តទុកដាក់អំពីខាងសង្គមស៊ីវិលយើងខ្ញុំឃើញថា វាមិនគប្បីនឹងទទួលរងនូវការចោទប្រកាន់ក្នុងលក្ខណៈធ្ងន់ធ្ងរ។ ហើយមានការចាប់ ឬក៏ដាក់ទៅការឃុំឃាំងទេ ព្រោះថាបទល្មើសនេះ វាជាបទល្មើសមជ្ឈិម។ អ៊ីចឹង យើងអាចនិយាយថា សម្របសម្រួល ឬក៏មានការពិន័យអីផ្សេងៗទាក់ទិនបទល្មើសព្រៃឈើបាទ»។
អង្គការសង្គមស៊ីវិល ដែលធ្វើការពាក់ព័ន្ធការបោះឆ្នោត រកឃើញថា ប្រជាពលរដ្ឋកម្ពុជា នៅតែពុំទាន់ទទួលបានសិទ្ធិដោយសេរី ក្នុងវិស័យនយោបាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។