បេក្ខជនតំណាងរាស្ត្រគណបក្សសង្គ្រោះជាតិ បានជំរុញឲ្យរដ្ឋាភិបាលថ្មីត្រៀមកញ្ចប់ថវិកាជាតិ ដើម្បីជួយដល់ប្រជាពលរដ្ឋក្រីក្រដែលរងគ្រោះដោយសារទឹកជំនន់ ជៀសវាងកុំឲ្យពួកគាត់ខ្ចីបុលពីស្ថាប័នមីក្រូហិរញ្ញវត្ថុដែលមានការប្រាក់ខ្ពស់។
បេក្ខជនតំណាងរាស្ត្រមណ្ឌលបាត់ដំបង អ្នកស្រី មូរ សុខហួរ បានថ្លែងនៅក្នុងសន្និសីទកាសែតនៅស្នាក់ការគណបក្សសង្គ្រោះជាតិ នៅចាក់អង្រែលើ នាព្រឹកថ្ងៃទី៧ វិច្ឆិកា ថា ប្រជាពលរដ្ឋជាង ៣ម៉ឺនគ្រួសារ ស្មើនឹងជាង ១លាន ៥សែននាក់ កំពុងរងគ្រោះដោយទឹកជំនន់នៅឆ្នាំ២០១៣ នេះ។ អ្នកស្រី មូរ សុខហួរ បញ្ជាក់ថា ថវិកាជាតិ គឺជាថវិការបស់ប្រជាពលរដ្ឋទាំងអស់គ្នា។ ដូច្នេះ រដ្ឋាភិបាលថ្មីត្រូវអនុម័តថវិកាមួយកញ្ចប់សម្រាប់ជួយសង្គ្រោះដល់ប្រជាពលរដ្ឋរងគ្រោះដោយសារទឹកជំនន់។
អ្នកស្រី មូរ សុខហួរ បានអះអាងថា ប្រជាពលរដ្ឋជាង ១លាននាក់នោះ បានខ្ចីបុលពីស្ថាប័នហិរញ្ញវត្ថុចំនួន ៣៧ស្ថាប័ន នៅទូទាំងប្រទេស។ អ្នកស្រីបញ្ជាក់ថា អ្នកស្រីបានជួបខាងសមាគមមីក្រូហិរញ្ញវត្ថុ និងបានសំណូមពរបីចំណុច គឺទី១ សុំឲ្យស្ថាប័នមីក្រូហិរញ្ញវត្ថុផ្អាកការទារបំណុលពីប្រជាពលរដ្ឋជាម្ចាស់បំណុលក្នុងរយៈពេល ៦ខែ។ ទី២ សុំឲ្យបញ្ចុះការប្រាក់ឲ្យនៅទាបជាង ១% ក្នុងរយៈពេល ១២ខែទៅមុខ និងទី៣ សុំកុំឲ្យរឹបអូសផ្ទះសម្បែង ឬទ្រព្យសម្បត្តិរបស់ប្រជាពលរដ្ឋដែលជំពាក់បំណុលនោះ។
ឆ្លើយតបនឹងបញ្ហានេះ ប្រធានសមាគមស្ថាប័នមីក្រូហិរញ្ញវត្ថុកម្ពុជា និងជានាយកប្រតិបត្តិស្ថាប័នមីក្រូហិរញ្ញវត្ថុស្ថាបនា លោកបណ្ឌិត ប៊ុន មុនី មានប្រសាសន៍ថា លោកបានជួបអ្នកស្រី មូរ សុខហួរ អំពីបញ្ហានេះដែរ។ លោកអះអាងថា ស្ថាប័នមីក្រូហិរញ្ញវត្ថុមានទិសដៅលើកកម្ពស់ជីវភាពប្រជាពលរដ្ឋ ក្នុងការផ្ដល់ប្រាក់កម្ចីនេះ ដើម្បីយកទៅប្រើប្រាស់ជាដើមទុនប្រកបអាជីវកម្មផ្សេងៗ ហើយសំណូមពររបស់ អ្នកស្រី មូរ សុខហួរ នេះ ស្ថាប័នមីក្រូហិរញ្ញវត្ថុក៏គិតគូរអំពីបញ្ហាប្រឈមរបស់ប្រជាពលរដ្ឋដែរ ប៉ុន្តែស្ថាប័នមីក្រូហិរញ្ញវត្ថុមិនអាចធ្វើតាមសំណូមពរនេះបានទេ។
លោក ប៊ុន មុនី បញ្ជាក់ថា ស្ថាប័នមីក្រូហិរញ្ញវត្ថុបានផ្ដល់ទុនជាង ១.២០០លានដុល្លារសហរដ្ឋអាមេរិក ឲ្យប្រជាពលរដ្ឋខ្ចីជាង ១លាន ៥សែននាក់នៅទូទាំងប្រទេស។ ប្រជាពលរដ្ឋម្នាក់ខ្ចីគិតជាមធ្យមប្រមាណ ៨០០ដុល្លារ។ ចំពោះការប្រាក់ អាស្រ័យលើការខ្ចីច្រើន ឬតិច គឺចន្លោះពី ១% ទៅ ២,៥% ក្នុងមួយខែ។
អ្នកស្រី មូរ សុខហួរ បានលើកឡើងថា ប្រជាពលរដ្ឋរងគ្រោះដោយសារទឹកជំនន់ខ្លាំងជាងគេ ហើយគ្មានលទ្ធភាពសងរំលោះទៅស្ថាប័នមីក្រូហិរញ្ញវត្ថុនោះ មាននៅខេត្តបាត់ដំបង បន្ទាយមានជ័យ សៀមរាប កំពង់ធំ ជាដើម។ ពួកគាត់ទាំងនោះ មានអ្នកខ្លះខ្ចីយកមកធ្វើបុណ្យសព ធ្វើចម្ការ និងខ្ចីយកមកព្យាបាលជំងឺ។ល។ អ្នកស្រីបញ្ជាក់ថា បញ្ហាទឹកជំនន់នេះនឹងធ្វើឲ្យប្រជាពលរដ្ឋស្ថិតនៅក្រោមភាពក្រីក្រកាន់តែច្រើនថែមទៀត។
របាយការណ៍របស់ធនាគារពិភពលោក និងធនាគារអភិវឌ្ឍន៍អាស៊ី ឆ្នាំ២០១៣ បានរកឃើញថា ប្រជាពលរដ្ឋតិចតួចបានទទួលផលពីកំណើនសេដ្ឋកិច្ចរៀងរាល់ឆ្នាំ។ អ្នកមាន និងអ្នកក្រនៅកម្ពុជា មានគម្លាតឆ្ងាយពីគ្នាខ្លាំង។
ប្រជាពលរដ្ឋកម្ពុជា ប្រមាណ ៦លាននាក់ ស្ថិតនៅក្រោមបន្ទាត់ភាពក្រីក្រ មានន័យថា ពួកគាត់មិនអាចរកចំណូលបានប្រមាណ ៥ពាន់រៀលក្នុងមួយថ្ងៃ។ បន្ថែមពីលើនេះទៀត ប្រជាពលរដ្ឋប្រមាណ ៣លាននាក់ផ្សេងទៀត ងាយនឹងធ្លាក់ក្រោមបន្ទាត់ភាពក្រីក្រដែរ ប្រសិនបើកម្ពុជា មានវិបត្តិសេដ្ឋកិច្ចបន្ថែមទៀត ដូចជា ទំនិញកាន់តែឡើងថ្លៃ និងគ្រោះថ្នាក់ធម្មជាតិផ្សេងៗ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។