បេក្ខនារីលេខរៀងទី២នៃបេក្ខភាពឈរឈ្មោះបោះឆ្នោតក្រុមប្រឹក្សាឃុំសង្កាត់គណបក្ស សម រង្ស៊ី ឃុំសំអាង ស្រុកថាឡាបរិវ៉ាត់ ខេត្តស្ទឹងត្រែង ចោទប្រកាន់មេឃុំសំអាង ថារំលោភច្បាប់ស្ដីពីការគ្រប់គ្រងរដ្ឋបាលឃុំសង្កាត់។ ប៉ុន្តែអាជ្ញាធរឃុំបដិសេធចំពោះការចោទប្រកាន់នេះ។
ការចោទប្រកាន់នេះ ធ្វើឡើងបន្ទាប់ពីមេឃុំសំអាង លោក ញៀន ថុន បដិសេធមិនចុះហត្ថលេខាលើលិខិតស្នើសុំជ្រើសរើសបេក្ខនារីលេខរៀងបន្ទាប់ក្នុងបញ្ជីឈរឈ្មោះបោះឆ្នោត នៃគណបក្ស សម រង្ស៊ី ដើម្បីបន្តតំណែងជំទប់ទី២ដែលត្រូវបាត់បង់សមាជិកភាពពីគណបក្សនយោបាយរបស់ខ្លួន។
កាលពីថ្ងៃទី១២ ខែមិថុនា ប្រធានគណបក្ស សម រង្ស៊ី លោក គង់ គាំ បានធ្វើលិខិតបញ្ចប់សមាជិកភាពជំទប់ទីពីរឃុំសំអាង គឺលោក ដន ចន ពីគណបក្ស សម រង្ស៊ី។ បន្ទាប់មក នៅថ្ងៃទី១៦ ខែឧសភា មន្ត្រីគណបក្ស សម រង្ស៊ី បានរៀបចំលិខិតស្នើសុំទៅមេឃុំ ដើម្បីរៀបចំឯកសារទៅក្រសួងមហាផ្ទៃ តាមរយៈអាជ្ញាធរមូលដ្ឋានឃុំស្រុកខេត្ត ដើម្បីផ្លាស់ប្ដូរបេក្ខនារីលេខរៀងទីពីរជំនួសជំទប់ទី២ ដែលបានដកសមាជិកភាពពីគណបក្ស។
បេក្ខនារីលេខរៀងទីពីរគណបក្ស សម រង្ស៊ី លោកស្រី ម៉ាន អុន អះអាងថា បានរៀបចំឯកសារដាក់ជូនមេឃុំទាក់ទិនសំណើផ្លាស់ប្ដូរនេះ ក៏ប៉ុន្តែមេឃុំមិនព្រមចុះហត្ថលេខាតាមពេលកំណត់ ហើយទាមទារឯកសារផ្សេងទៀតផ្ទុយទៅនឹងច្បាប់គ្រប់គ្រងរដ្ឋបាលឃុំសង្កាត់បានកំណត់។ លោកស្រីបន្តថា នេះគឺជាចេតនារាំងស្ទះការបំពេញតួនាទី និងជាការជ្រៀតជ្រែកកិច្ចការផ្ទៃក្នុងគណបក្ស សម រង្ស៊ី ពីមន្ត្រីមូលដ្ឋាននៃគណបក្សប្រជាជនកម្ពុជា៖ «ចា៎! គេដកចេញពីបក្សហើយ ប៉ុន្តែគាត់មេឃុំអត់ទាន់ឲ្យគាត់ចេញទេ ទាល់តែ ដន ចន ហ្នឹងគាត់ធ្វើសំបុត្រលាលែង បានគេអាចដកបានថាអ៊ីចេះ។ គេអត់ស៊ីញេវាយត្រាឲ្យ មេឃុំមិនដឹងគេកើតស្អីគេ»។
ឆ្លើយតបការចោទប្រកាន់នេះ មេឃុំសំអាង លោក ញៀន ថុន បញ្ជាក់ថា លោកមិនបានបដិសេធមិនចុះហត្ថលេខានោះទេ ប៉ុន្តែលោកណែនាំឲ្យមន្ត្រីគណបក្ស សម រង្ស៊ី បញ្ចូលកំណត់ហេតុស្តីពីមូលហេតុនៃការបញ្ចប់សមាជិកភាពរបស់ លោក ដន ចន បន្ថែមទៀត មុននឹងក្រុមប្រឹក្សាឃុំប្រជុំ និងធ្វើរបាយការណ៍ករណីនេះជូនទៅអាជ្ញាធរស្រុកខេត្ត។ យ៉ាងណា លោកអះអាងថា សមាជិកក្រុមប្រឹក្សាឃុំសំអាង បើកកិច្ចប្រជុំករណីនេះនៅថ្ងៃទី១៨ ខែមិថុនា៖ «ទទួលលិខិតតែពីរច្បាប់ទេ។ លិខិតទី១ បណ្ដេញ និងលិខិតប្ដូរ។ លិខិតបញ្ជីរាយនាមរបស់គណបក្ស គឺគាត់មានហើយ តែគាត់នៅខ្វះលិខិតកំណត់ហេតុប្រជុំគណបក្ស គាត់អត់មាន។ ទីពីរ មកទៀត គឺខ្ញុំប្រជុំក្រុមប្រឹក្សាឃុំមិនទាន់ ពីព្រោះចាប់ពីថ្ងៃទី១១ ដល់ថ្ងៃទី១៨ នេះទើបនឹងច្បាប់ផ្ដើមប្រជុំទេ»។
ទាក់ទងករណីនេះដែរ មន្ត្រីផ្នែកអង្កេតនៃគណៈកម្មការសង្កេតការណ៍ ដើម្បីការបោះឆ្នោតដោយសេរី និងយុត្តិធម៌នៅកម្ពុជា ហៅកាត់ថា ខុមហ្វ្រែល (COMFREL) លោក ស៊ិន ទិត្យសីហា ចាត់ទុកការទាមទាររបស់មេឃុំសំអាង ថាជាការធ្វើផ្ទុយច្បាប់ស្ដីពីការគ្រប់គ្រងរដ្ឋបាលឃុំសង្កាត់។ លោកបន្តថា លិខិតដកហូតសមាជិកភាពជំទប់ទី២ លោក ដន ចន គឺជាឯកសារគ្រប់គ្រាន់សម្រាប់បំពេញឯកសារទៅក្រសួងមហាផ្ទៃ ប្ដូរបេក្ខជនលំដាប់លេខរៀងបន្ទាប់មកជំនួស៖ «សមាជិកក្រុមប្រឹក្សាឃុំសង្កាត់ណាមួយបាត់បង់សមាជិកភាពពីគណបក្សនយោបាយ អ៊ីចឹងបេក្ខជននៅលេខរៀងបន្ទាប់ត្រូវមកជំនួសបេក្ខជនហ្នឹង។ អ៊ីចឹងបញ្ញត្តិហ្នឹងបានចែងច្បាស់ហើយ បើយើងមើលទៅលើស្មារតីនៃច្បាប់ហ្នឹង បើសិនគាត់អត់ព្រមធ្វើអ៊ីចឹង គឺគាត់អនុវត្តផ្ទុយនឹងច្បាប់»។
ច្បាប់ស្ដីពីការគ្រប់គ្រងរដ្ឋបាលឃុំសង្កាត់មាត្រាទី១៣ ចែងថា កាលបើសមាជិកក្រុមប្រឹក្សាឃុំសង្កាត់ណាម្នាក់ត្រូវបាត់បង់សមាជិកភាព ត្រូវជ្រើសរើសបេក្ខជនដែលមានឈ្មោះបន្ទាប់តាមលេខរៀងក្នុងបញ្ជីបេក្ខជន មកជំនួសដោយមិនចាំបាច់បោះឆ្នោតឡើងវិញឡើយ។
សេចក្តីរាយការណ៍របស់មន្ត្រីគណបក្ស សម រង្ស៊ី នៅរសៀលថ្ងៃដដែលនេះ មេឃុំសំអាង បានចុះហត្ថលេខាបញ្ជូនឯកសារប្ដូរសមាសភាពជំទប់ទី២ គណបក្ស សម រង្ស៊ី រួចរាល់ហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។