មន្ត្រីសង្គមស៊ីវិល និងមន្ត្រីគណបក្សប្រឆាំងរិះគន់សមត្ថកិច្ចថា ចាត់វិធានការបានលើតែអ្នកដែលគំរាមសម្លាប់មន្ត្រីរដ្ឋាភិបាល ប៉ុន្តែអ្នកគំរាមសម្លាប់មន្ត្រីបក្សប្រឆាំងមិនឃើញមានចំណាតការ ឬការស៊ើបអង្កេតច្បាស់លាស់ឡើយ។ ប៉ុន្តែមន្ត្រីរដ្ឋាភិបាលថា ការអនុវត្តការងាររបស់សមត្ថកិច្ចមិនប្រកាន់និន្នាការនយោបាយឡើយ ហើយសមត្ថកិច្ចនៅតែបន្តតាមដានលើរឿងនេះដដែល។
ការរិះគន់នេះ ខណៈដែលអ្នកគំរាមសម្លាប់អនុប្រធានរដ្ឋសភា និងជាអនុប្រធានគណបក្សសង្គ្រោះជាតិ តាមហ្វេសប៊ុក (Facebook) ជិត ២ឆ្នាំទៅហើយ អ្នកគំរាមនោះនៅតែមានសេរីភាព គ្មានការចោទប្រកាន់ ឬត្រូវបានអាជ្ញាធរចាប់ខ្លួននៅឡើយ។ ប៉ុន្តែអ្នកគំរាមសម្លាប់លោកបណ្ឌិត សុខ ទូច ប្រធានក្រុមស្រាវជ្រាវកិច្ចការព្រំដែននៃរាជបណ្ឌិត្យសភា ត្រូវសមត្ថកិច្ចចាប់ខ្លួនបាន ក្រោយពេលគំរាមមិនដល់ ១០ថ្ងៃផង។
អនុប្រធានស៊ើបអង្កេតសិទ្ធិមនុស្សរបស់ក្រុមមេធាវីសមាគមអាដហុក (ADHOC) លោក ណៃ វ៉ង់ដា និយាយថា សមត្ថកិច្ចកម្ពុជា សព្វថ្ងៃអនុវត្តការងារបែងចែកជាពីរ គឺក្រុមរស់នៅលើច្បាប់ និងក្រុមរស់នៅក្រោមច្បាប់។ លោកថា ប្រសិនបើក្រុមរស់នៅលើច្បាប់ធ្វើខុសយ៉ាងណាក៏មិនងាយត្រូវប្រឈមមុខនឹងផ្លូវច្បាប់ឡើយ។ មន្ត្រីសង្គមស៊ីវិលដដែលស្នើឲ្យសមត្ថកិច្ចអនុវត្តការងារតាមច្បាប់ និងមិនរង់ចាំទទួលបទបញ្ជាតែពីថ្នាក់លើ ឬពីនាយករដ្ឋមន្ត្រីទើបចាំធ្វើនោះទេ៖ «សមត្ថកិច្ចត្រូវតែស៊ើបអង្កេតឲ្យដឹងពិតប្រាកដថា គណនេយ្យហ្នឹងក្លែងក្លាយ ឬពិតប្រាកដ ហើយបើក្លែងក្លាយជារបស់នរណា?»។
កម្លាំងសមត្ថកិច្ចនគរបាលកម្ពុជា បានចាប់ជនសង្ស័យគំរាមសម្លាប់លោកបណ្ឌិត សុខ ទូច តាមហ្វេសប៊ុក ឈ្មោះ ផង់ សីហា កាលពីល្ងាចថ្ងៃទី៥ ខែកញ្ញា ក្នុងពេលជនរូបនេះ ឆ្លងដែនពីទឹកដីថៃ មកកម្ពុជា តាមច្រកព្រំដែនប៉ាយប៉ែត។ ការចាប់ខ្លួននេះ បន្ទាប់ពីជនសង្ស័យបង្ហោះរូបកាំភ្លើង និងសរសេរគំរាមសម្លាប់ លោក សុខ ទូច ដោយចោទប្រកាន់ថា លោកលក់ក្បាលឲ្យវៀតណាម ក្នុងរឿងព្រំដែន។
កម្លាំងសមត្ថកិច្ចនគរបាលកម្ពុជា បានចាប់ជនសង្ស័យគំរាមសម្លាប់លោកបណ្ឌិត សុខ ទូច តាមហ្វេសប៊ុក ឈ្មោះ ផង់ សីហា កាលពីល្ងាចថ្ងៃទី៥ ខែកញ្ញា ក្នុងពេលជនរូបនេះឆ្លងដែនពីទឹកដីថៃ មកកម្ពុជា តាមច្រកព្រំដែនប៉ាយប៉ែត។
ការចាប់ខ្លួននេះ បន្ទាប់ពីជនសង្ស័យបង្ហោះរូបកាំភ្លើង និងសរសេរគំរាមសម្លាប់ លោក សុខ ទូច ដោយចោទប្រកាន់ថា លោកលក់ក្បាលឲ្យវៀតណាម ក្នុងរឿងព្រំដែន។
រឿងស្រដៀងគ្នានេះដែរ កាលពីឆ្នាំ២០១៣ អនុប្រធានគណបក្សសង្គ្រោះជាតិ លោក កឹម សុខា ត្រូវបុរសម្នាក់ពាក់ស័ក្ដិជាប៉ូលិស មានឈ្មោះថា ផែង វណ្ណៈ បានបង្ហោះរូបកាំភ្លើងខ្លី មានគ្រាប់កាំភ្លើងចំនួន ៧គ្រាប់ និងសរសេរថា ទុក ៧គ្រាប់ឲ្យលោក កឹម សុខា គ្រាប់ទី១ បាញ់ដៃឆ្វេង គ្រាប់ទី២ បាញ់ដៃស្តាំ គ្រាប់ទី៣ បាញ់ជើងឆ្វេង គ្រាប់ទី៤ បាញ់ជើងស្តាំ គ្រាប់ទី៥ បាញ់ចំពោះ គ្រាប់ទី៦ បាញ់បេះដូង និងគ្រាប់ទី៧ បាញ់ឲ្យចំក្បាល លោក កឹម សុខា។
ទោះជានៅពេលនោះ លោក កឹម សុខា ស្វះស្វែងសុំអន្តរាគមន៍ពីសមត្ថកិច្ចក្តី ប៉ុន្តែគ្រាន់តែបុរសអះអាងថា គណនេយ្យហ្វេសប៊ុកនោះ មិនមែនជារបស់ខ្លួន សមត្ថកិច្ចក៏ពុំបានបង្ហាញចំណាត់ការអ្វីបន្ថែមលើរូបលោក ផែង វណ្ណៈ ទោះជាគេដឹងថា លោក ផែង វណ្ណៈ ជាមន្ត្រីនគរបាលនៅក្រសួងមហាផ្ទៃ ក្ដី។
ក្រមព្រហ្មទណ្ឌឆ្នាំ២០០៩ មាត្រា២៣៣ ចែងថា ជនណាគំរាមសម្លាប់អ្នកដទៃប្រឈមជាប់ពន្ធនាគារពី ៦ខែ ទៅ ២ឆ្នាំ និងពិន័យជាប្រាក់ពី ១លានរៀល ទៅ ៤លានរៀល។
ទាក់ទងរឿងនេះដែរ ប្រធានក្រុមអ្នកច្បាប់អមរិន្ទ្រ លោកមេធាវី សុក សំអឿន មានប្រសាសន៍ថា បុរសដែលព្រមានសម្លាប់លោកបណ្ឌិត សុខ ទូច ប្រសិនបើតុលាការរកឃើញថា បុរសនោះគ្មានកាំភ្លើង ដោយគ្រាន់តែបង្ហោះរូបកាំភ្លើង តុលាការអាចបន្ធូរបន្ថយទោស។ ផ្ទុយទៅវិញ លោកមេធាវីថា ការសម្រេចយ៉ាងណានោះ គឺស្រ័យលើឆន្ទៈរបស់ចៅក្រម៖ «ក្នុងច្បាប់យើងប្រសិនទោសជាប់ពន្ធនាគារក្រោម ៣ឆ្នាំ គេអាចឲ្យធ្វើការងារសហគមន៍ ឬព្រមានអីបាន ប៉ុន្តែគេមិនសម្រាលទោសឲ្យជាប់ពន្ធនាគារ»។
វិទ្យុអាស៊ីសេរី មិនអាចសុំឆ្លើយតបពីអ្នកនាំពាក្យអគ្គស្នងការដ្ឋាននគរបាលជាតិ និងអ្នកនាំពាក្យក្រសួងមហាផ្ទៃ បានទេ នៅថ្ងៃទី៦ ខែកញ្ញា។ ទោះបែបនេះក្តី រដ្ឋលេខាធិការ និងជាអ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន ថ្លែងអះអាងថា សមត្ថកិច្ចនៅតាមដានរាល់សកម្មភាពបុគ្គលដែលគំរាមសម្លាប់លោក កឹម សុខា ដដែល។
លោកបន្តថា សមត្ថកិច្ចមិនធ្វើការប្រកាន់និន្នាការនយោបាយ ឬបុគ្គលណានោះទេ៖ «មិនមែនសមត្ថកិច្ចមិនបើកការស៊ើបអង្កេតទេ នេះជាការងារសម្ងាត់របស់សមត្ថកិច្ច»។
ប៉ុន្តែ អ្នកនាំពាក្យគណបក្សសង្គ្រោះជាតិ លោក យឹម សុវណ្ណ និយាយថា យុត្តិធម៌មិនអាចផ្តល់ឲ្យបានទៅបុគ្គលគ្រប់រូបឡើយ។ លោកបន្ថែមថា ប្រសិនករណីឃាតកម្មនយោបាយកើតឡើងលើសកម្មជន ឬអ្នកនយោបាយគណបក្សប្រឆាំង សមត្ថកិច្ចរកមុខឃាតកមិនដែលឃើញទេ៖ «ចំណាត់ការរបស់សមត្ថកិច្ច បង្ហាញអសមត្ថភាពផង បង្ហាញការរើសអើងផង សូម្បីតែបទល្មើសឧក្រិដ្ឋសម្លាប់អ្នកនយោបាយបក្សប្រឆាំង សមត្ថកិច្ចរកមិនឃើញឃាតកផង»។
ខណៈបញ្ហាព្រំដែនរវាងកម្ពុជា-វៀតណាម ឡើងកម្ដៅជាថ្មី មន្ត្រីរដ្ឋាភិបាលដែលគេគំរាមសម្លាប់តាមហ្វេសប៊ុក ក្រៅពីលោកបណ្ឌិត សុខ ទូច ក៏មានអនុប្រធានលេខាធិការដ្ឋានអចិន្ត្រៃយ៍នៃអាជ្ញាធរជាតិទទួលបន្ទុកកិច្ចការព្រំដែន អ្នកស្រី កុយ ពិសី។ ប៉ុន្តែ សមត្ថកិច្ចមិនទាន់វែកមុខជនដែលគំរាមសម្លាប់អ្នកស្រី កុយ ពិសី ឃើញនៅឡើយទេ។
នៅរយៈពេលចុងក្រោយនេះ សមត្ថកិច្ចបានចាប់ខ្លួនយុវជនពីរនាក់ហើយ ក្រោយបង្ហោះសារតាមហ្វេសប៊ុក ម្នាក់ឈ្មោះ គង់ រ៉ាយា ឈ្មោះក្រៅហៅ សុរិយា កូកូ ត្រូវចាប់ខ្លួនបន្ទាប់ពីយុវជនរូបនេះបង្ហោះសារប៉ុនប៉ងបង្កើតបដិវត្តពណ៌ និងយុវជន ផង់ សីហា ដែលគំរាមសម្លាប់លោកបណ្ឌិត សុខ ទូច។
ដោយឡែកចំពោះអ្នកសារព័ត៌មានមនសិការខ្មែរ លោក ឃឹម សំបូរ ដែលគេដឹងថា កាសែតនេះគាំទ្របក្សប្រឆាំង និងសកម្មជនការពារសិទ្ធិមនុស្ស សកម្មជនព្រៃឈើដទៃទៀត មកទល់ពេលនេះសមត្ថកិច្ចមិនទាន់ចាប់ឃាតកបាននៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។