អង្គភាពប្រឆាំងអំពើពុករលួយទម្លាយជាសាធារណៈនូវករណីសង្ស័យកើតមានអំពើពុករលួយចំនួនពីរ ក្នុងរយៈពេល១ខែចុងក្រោយនេះ។ ករណីទី១ ជាបណ្ដឹងរបស់និស្សិតផ្នែកកសិកម្មដែលប្ដឹងមន្ត្រីរៀបចំការប្រឡងចូលក្របខ័ណ្ឌមេព្រៃពីបទស៊ីសំណូក។ ករណីទី២ ជាបណ្ដឹងរបស់ពលរដ្ឋដែលប្ដឹងថា មន្ត្រីនាយកដ្ឋានប្រឆាំងការជួញដូរមនុស្សនៃអគ្គស្នងការនគរបាលជាតិ ពីបទបង្កើតការិយាធិបតេយ្យ និងជំរិតទារប្រាក់ពីពលរដ្ឋដែលទៅរកសេវាធ្វើលិខិតស្នាមរៀបការជាមួយជនបរទេស។
អង្គភាពប្រឆាំងអំពើពុករលួយនៅដើមខែមេសា នេះ ប្រកាសស្នើឲ្យមន្ត្រីក្រសួងកសិកម្ម ឈ្មោះ ថៃ វុទ្ធី ចូលមកបំភ្លឺក្នុងរឿងប្រព្រឹត្តអំពើពុករលួយ ដើម្បីឆ្លើយតបនឹងបណ្ដឹងរបស់ក្រុមនិស្សិតសកលវិទ្យាល័យភូមិន្ទកសិកម្មចំការដូង និងសាលាជាតិកសិកម្មព្រែកលៀប។
ក្រុមនិស្សិតប្ដឹងចូលទៅកាន់អង្គភាពប្រឆាំងអំពើពុករលួយ កាលពីពាក់កណ្ដាលឆ្នាំ២០១២ និងចុងខែមីនា ឆ្នាំ២០១៣ ដោយលើកឡើងថា ការប្រឡងចូលក្របខ័ណ្ឌក្រសួងកសិកម្ម មានភាពមិនប្រក្រតីមួយចំនួន ដូចជា ការទទួលសំណូកចំនួន ៤ពាន់ ទៅ ៥ពាន់ដុល្លារ ពីនិស្សិតម្នាក់ៗជាថ្នូរនឹងប្រឡងជាប់ចូលក្របខ័ណ្ឌផ្នែករដ្ឋបាលព្រៃឈើ។ និស្សិតដែលមានសមត្ថភាពធ្វើវិញ្ញាសាបានពី ៨០ ទៅ ៩០% ប្រឡងមិនជាប់ជាដើម។
លិខិតមួយទៀតរបស់អង្គភាពប្រឆាំងអំពើពុករលួយ ក៏សុំការបំភ្លឺពីប្រធាននាយកដ្ឋានប្រឆាំងការជួញដូរមនុស្ស និងការពារអនីតិជននៃអគ្គស្នងការនគរបាលជាតិ ពាក់ព័ន្ធនឹងភាពមិនប្រក្រតីក្នុងការរៀបចំឯកសារសុំរៀបការជាមួយជនបរទេស។ អង្គភាពប្រឆាំងអំពើពុករលួយស្រង់ខ្លឹមសារបណ្ដឹងរបស់ប្រជាពលរដ្ឋដែលលើកឡើងថា មន្ត្រីធ្វើការនៅក្នុងនាយកដ្ឋានប្រឆាំងការជួញដូរមនុស្ស និងការពារអនីតិជន បានទារលុយក្រៅផ្លូវការពីប្រជាពលរដ្ឋដែលដាក់ពាក្យស្នើសុំរៀបការជាមួយជនបរទេស ឬអាណិកជនខ្មែរនៅបរទេស ពី ១០ ទៅ ២០ដុល្លារក្នុងមួយកន្លែងៗ ដែលគិតជារួម ប្រជាពលរដ្ឋម្នាក់ៗត្រូវចំណាយប្រាក់អស់ជាង ១០០ដុល្លារ និងអូសបន្លាយរយៈពេលបំពេញបែបបទថែមទៀត។
ប្រធានបណ្ដាញរួបរួមគណនេយ្យភាពសង្គមអាស៊ីបូព៌ា និងអាស៊ីប៉ាស៊ីហ្វិក ប្រចាំនៅកម្ពុជា លោក សន ជ័យ មានប្រសាសន៍ថា បណ្ដឹងពីរករណីនេះជាសញ្ញាវិជ្ជមានថ្មីមួយនៃការចូលរួមប្រឆាំងអំពើពុករលួយរបស់ប្រជាពលរដ្ឋ។ លោកបន្តថា អង្គភាពប្រឆាំងអំពើពុករលួយត្រូវតែឆ្លើយតបឲ្យបានឆាប់រហ័ស និងប្រកបដោយតម្លាភាព ដើម្បីលើកទឹកចិត្តពលរដ្ឋឲ្យចូលរួមប្ដឹងពីករណីពុករលួយតទៅទៀត។
លោកបញ្ជាក់ថា កន្លងមកការចាត់វិធានការរបស់អង្គភាពប្រឆាំងអំពើពុករលួយ ហាក់នៅមានកម្រិត ដោយមិនទាន់គួរឲ្យសាទរទេ៖ «ទន្ទឹមនឹងបញ្ហាហ្នឹង យើងចង់ឃើញអង្គភាពប្រឆាំងអំពើពុករលួយហ្នឹងចាត់ការស៊ើបអង្កេតករណីហ្នឹងតាមច្បាប់។ យើងឃើញថា ចំណាត់ការរបស់អង្គភាពហ្នឹងនៅមានកម្រិតបើធៀបនឹងបណ្ដឹងរបស់ប្រជាពលរដ្ឋយើងមើលឃើញថា មានអំពើពុករលួយមានច្រើនណាស់។ ក្រៅពីរឿងនិស្សិតកសិកម្មប្ដឹងហ្នឹង ក៏មានតម្រុយខ្លះនៃការប្រព្រឹត្តអំពើពុករលួយដែរ ដូចជាផ្លូវជាតិធំៗហ្នឹង ដូចជាផ្លូវជាតិឆាប់ខូច តើកិច្ចសន្យាផ្លូវហ្នឹងប៉ុន្មានឆ្នាំ? ហើយការខូចខាតហ្នឹងបណ្ដាលមកពីអី? អង្គភាពនេះមិនទាន់ចាត់វិធានការនៅឡើយទេ»។
លោកបញ្ជាក់ថា ប្រជាពលរដ្ឋក៏ត្រូវតែចូលរួមបន្តទៀត និងតាមដានឃ្លាំមើលការអនុវត្តរបស់ក្រុមមន្ត្រីរដ្ឋាភិបាល និងជំរុញឲ្យអង្គភាពប្រឆាំងអំពើពុករលួយចាត់វិធានការតាមច្បាប់ចំពោះជនពុករលួយ ដើម្បីឲ្យមានយុត្តិធម៌សង្គម និងការអភិវឌ្ឍ។
ទាក់ទងនឹងសំណុំរឿងពុករលួយនេះ ក្រុមនិយោជិតទូរគមនាគមន៍កម្ពុជា កាលពីដើមឆ្នាំនេះ ក៏បានស្នើសុំឲ្យអង្គភាពប្រឆាំងអំពើពុករលួយចុះស៊ើបអង្កេតករណីពុករលួយរបស់ថ្នាក់ដឹកនាំដែរ។
ក្រុមនិយោជិកប្រមាណ ២០០នាក់ នៅទូរគមនាគមន៍កម្ពុជា (Telecom Cambodia) បានធ្វើពហិការមិនចូលធ្វើការ និងឈរលើកបដាទាមទារនៅខាងមុខសហគ្រាសដើម្បីស្នើសុំឲ្យអគ្គនាយកឈ្មោះ ឡៅ សារឿន ចុះចេញពីតំណែង ដោយហេតុផលថា អគ្គនាយករូបនោះដឹកនាំមិនមានការរីកចំរើន មានបក្សពួកនិយម និងប្រព្រឹត្តអំពើពុករលួយ។ អង្គភាពប្រឆាំងអំពើពុករលួយក៏បានទទួលសំណើស៊ើបអង្កេតលើករណីនេះ តែមិនទាន់ប្រកាសពីលទ្ធផលស៊ើបអង្កេតនៅឡើយ។ ប៉ុន្តែមួយខែក្រោយមក លោក ឡៅ សារឿន ត្រូវបានដំឡើងតំណែងជាអនុរដ្ឋលេខាធិការក្រសួងប្រៃសណីយ៍ និងទូរគមនាគមន៍ទៅវិញ។ សង្គមស៊ីវិលក៏ធ្លាប់ចេញសេចក្ដីថ្លែងការណ៍រិះគន់ការដោះដូរតំណែងនេះ ថាជារឿងមិនសមហេតុផល និងជំរុញឲ្យមានការពិនិត្យមើលឡើងវិញទៀតផង។
ទោះជាយ៉ាងណាក្តី ប្រធានអង្គភាពប្រឆាំងអំពើពុករលួយ លោក ឱម យ៉ិនទៀង ធ្លាប់មានប្រសាសន៍ប្រាប់វិទ្យុអាស៊ីសេរីថា មានបណ្ដឹងរាប់រយដែលប្ដឹងចូលអង្គភាពនេះ។ ហើយអង្គភាពនេះបានចាត់ចែងការងារតាមដំណាក់កាល ដើម្បីឆ្លើយតបទៅពលរដ្ឋវិញ។ លោកបន្តថា អង្គភាពប្រឆាំងអំពើពុករលួយជាអង្គភាពវិជ្ជាជីវៈ ដែលមានភារកិច្ចអនុវត្តច្បាប់ ដូចនេះមន្ត្រីពុករលួយត្រូវតែមានទោស។
កាលពីព្រឹកថ្ងៃទី៤ ខែមេសា អង្គភាពប្រឆាំងអំពើពុករលួយបានឃាត់ខ្លួនមន្ត្រីនៃមន្ទីរសង្គមកិច្ចខេត្តពោធិ៍សាត់ ២រូប ហើយមួយថ្ងៃបន្ទាប់បានឃាត់ខ្លួនបន្ថែម ១រូបទៀត សរុបទាំងអស់ ៣រូប។ ជនសង្ស័យចំនួន ២រូប ត្រូវបានបញ្ជូនមកឲ្យតុលាការធ្វើការស៊ើបសួរ រួចតុលាការក៏សម្រេចធ្វើការឃុំខ្លួនពីបទប្រព្រឹត្តខុសវិតិក្រមមាត្រា ៥៩២ និង ៥៩៣។ ចំពោះករណីសង្ស័យមានអំពើពុករលួយក្នុងការប្រឡងចូលក្របខ័ណ្ឌរដ្ឋបាលព្រៃឈើ និងករណីពុករលួយនៅអង្គភាពនគរបាលប្រឆាំងការជួញដូរមនុស្សនេះវិញ មិនទាន់មានការឆ្លើយតបយ៉ាងណាពីស្ថាប័នដែលរងការប្ដឹងនៅឡើយទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។