ក្រុមប្រឹក្សាឃុំមកពីគណបក្សប្រឆាំងចំនួនពីរ ចោទប្រកាន់មេឃុំបុស្បខ្នុរ ស្រុកចម្ការលើ ខេត្តកំពង់ចាម ដែលមកពីគណបក្សប្រជាជនកម្ពុជា ថាបានបំពេញការងារដោយរើសអើងគណបក្ស។
ការលើកឡើងដូចនេះ ដោយសារការងារនៅក្នុងឃុំ ខាងភាគីគណបក្សប្រឆាំងហាក់មិនបានទទួលព័ត៌មានគ្រប់គ្រាន់នោះឡើយ។ ចំណែកឯមេឃុំបដិសេធថា មិនដូចអ្វីដែលក្រុមប្រឹក្សាគណបក្សប្រឆាំងលើកឡើងនោះទេ ប៉ុន្តែការងារខ្លះបន្ទាន់ ដូចនេះខាងឃុំមិនអាចប្រាប់ពួកគាត់ទាន់នោះទេ។
ក្រុមប្រឹក្សាឃុំបុស្បខ្នុរ នៃគណបក្សសិទ្ធិមនុស្ស និងគណបក្ស សម រង្ស៊ី លើកឡើងថា ពួកគាត់ពុំសូវបានទទួលព័ត៌មានពីការសម្រេចនានា នៅក្នុងកិច្ចការក្នុងឃុំឡើយ ហើយប្រការនេះអាចកើតចេញពីការរើសអើងនិន្នាការគណបក្ស។ ការរើសអើងទាំងនោះ រួមមាន ការប្រជុំដោះដូរស្មៀន ការមិនបានប្រាប់ឱ្យសមាជិកបក្សប្រឆាំងចូលរួមប្រជុំក្នុងការប្រកាសសមាសភាពក្រុមប្រឹក្សាស្រុក កាលពីថ្ងៃទី៦ មិថុនា ជាដើម។
សមាជិកក្រុមប្រឹក្សាគណបក្សសិទ្ធិមនុស្ស លោក ហ៊ុន សុគង់ ឱ្យដឹងថា តាំងពីទទួលតំណែងជាក្រុមប្រឹក្សានៅក្នុងឃុំមក ពួកគាត់ ៦រូប ដែលមកពីគណបក្សប្រឆាំងទាំងពីរ កាលនោះ គឺគណបក្ស សម រង្ស៊ី និងគណបក្សសិទ្ធិមនុស្ស ហាក់មិនសូវបានដឹងការងារនៅក្នុងឃុំច្រើននោះទេ។ លោកបន្តថា លោកមិនដឹងពីមូលហេតុពិតប្រាកដ តែលោកសង្ស័យថា អាចជាការរើសអើងគណបក្ស។ ម្យ៉ាងទៀត ការលាក់លៀមព័ត៌មានអាចជាមធ្យោបាយបិទបាំងអំពើមិនស្របច្បាប់ណាមួយ។
លោក ហ៊ុន សុគង់៖ «កាលពីមុនមក មិនអីទេ ប៉ុន្តែនៅពេល ឯកឧត្តម កឹម សុខា គាត់មក គាត់លែងចង់ហៅពួកខ្ញុំប្រជុំយ៉ាងម៉េចទេ។ អ៊ីចឹងបានន័យថា ពួកគាត់រើសអើងផ្នែកនយោបាយ ហើយគាត់មិនចង់ឱ្យពួកយើងដឹងការងារផ្ទៃក្នុង គាត់ប្រជុំអីមិនដែលប្រាប់ពួកយើងទេ។ ទោះនៅសាលាឃុំក៏ដោយ មានតែប៉ុន្មាននាក់គ្នាគាត់ហ្នឹង។ គាត់ស៊ុមគ្រលុំស៊ីលុយតែប៉ុន្មានគ្នាគាត់ទៅ តែពួកប្រឆាំងគាត់មិនដែលរាប់អានអីទេ»។
លោកបន្ថែមទៀតថា ក្រៅពីការលាក់បាំងការងារនៅក្នុងឃុំខ្លះហើយនោះ ពេលខ្លះនៅគ្រាដែលមេឃុំអវត្តមានពីការងារ ជំទប់ទី១ ដែលមកពីបក្សប្រឆាំងនោះ កម្របានទទួលការផ្ទេរសិទ្ធិ ដើម្បីកាន់ត្រាណាស់។ លោកបញ្ជាក់ថា បញ្ហានេះហើយដែលធ្វើឱ្យប្រជាពលរដ្ឋមួយចំនួននៅក្នុងឃុំ តែងតែសម្ដែងការមិនពេញចិត្ត ចំពោះសកម្មភាពរបស់មេឃុំនោះឡើយ។
ឆ្លើយតបទៅនឹងបញ្ហានេះ មេឃុំបុស្បខ្នុរ លោក គឹម ឃួន មានប្រសាសន៍ថា អ្វីដែលខាងសមាជិកក្រុមប្រឹក្សាគណបក្សប្រឆាំងលើកឡើងនោះ គឺជារឿងមិនពិតនោះទេ។ លោកបញ្ជាក់ថា ការផ្លាស់ប្ដូរស្មៀននោះ គឺធ្វើឡើងដោយថ្នាក់ខេត្តជាបន្ទាន់ ដូចនេះលោកមិនអាចជម្រាបប្រាប់ពួកគាត់បានឡើយ។ លោកបន្តថា ចំណែករឿងដែលគេប្រកាសឱ្យក្រុមប្រឹក្សាឃុំទាំងអស់ ឱ្យទៅចូលរួមការប្រកាសតែងតាំងក្រុមប្រឹក្សាស្រុកនោះ លោកបានប្រាប់ក្រុមប្រឹក្សាទាំងនោះតាមទូរស័ព្ទរួចហើយដែរ ប៉ុន្តែក្រុមប្រឹក្សាទាំងនោះរវល់ទៅចម្ការវិញនោះទេ។
លោក គឹម ឃុន៖ «អើ! ឥឡូវវាប្រាប់! ឥឡូវៗម៉ោងមួយ ខ្ញុំប្រជុំនៅវេទិកាថ្នាក់ជាតិនៅសាលាស្រុកស្វាយទាប។ ដល់បកមកវិញដល់ណាដល់ណីហើយ ទើបចុចទូរស័ព្ទមកពីណាដើរទៅប្រាប់ទាន់ទាំងអស់គ្នា។ ជិះម៉ូតូដើរប្រាប់ទាំងអស់គ្នាទេ កុំអីបានទៅប្រជុំទាំងអស់គ្នានោះទេ។ ទន្ទឹមនឹងនោះ ខ្ញុំក៏បានទូរស័ព្ទដែរ ប៉ុន្តែអាខ្លះថាអត់បានដឹងព័ត៌មានទេ គេមកចម្ការអស់ទៅ»។
លោកបន្ថែមទៀតថា រាល់សកម្មភាពនៅក្នុងឃុំ លោកតែងតែបញ្ជូនសមាជិកឃុំគ្រប់គ្នា ដើម្បីទៅចូលរួម និងបំពេញការងារ មិនថាគណបក្សណានោះឡើយ។
មិនខុសគ្នាពីបញ្ហានៅឃុំបុស្បខ្មុរ នេះ ទស្សនៈរបស់សមាជិកគណបក្សនយោបាយដែលបម្រើការងារសាធារណៈរបស់រដ្ឋតាំងពីថ្នាក់ឃុំ រហូតដល់ថ្នាក់ជាតិ គេកម្រនឹងឃើញមានភាពចុះសម្រុងគ្នាណាស់។ យ៉ាងណាក៏ដោយ សមាជិកក្រុមប្រឹក្សាឃុំបុស្បខ្នុរ ក៏បានស្នើសុំឱ្យមានការចែករំលែកព័ត៌មាន និងការងារពីសំណាក់មេឃុំទាំងអស់ ទៅដល់សមាជិករបស់ខ្លួន កុំបីមានការរើសអើងគណបក្សនយោបាយនោះឡើយ ពីព្រោះពួកគាត់បានទទួលប្រាក់ខែពីប្រជាពលរដ្ឋ គប្បីមានការបម្រើការងារជូនប្រជាពលរដ្ឋឱ្យបានប្រសើរដូចៗគ្នា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។