សង្គមស៊ីវិលសង្ស័យថា ការរៀបចំរំលឹកខួបថ្ងៃ ៧ មករា របស់គណបក្សប្រជាជនកម្ពុជា ដែលជាបក្សកាន់អំណាច គឺអាចមានការជាប់ពាក់ព័ន្ធនឹងការចំណាយថវិកាជាតិមួយចំនួនតូច។ ទោះជាយ៉ាងនេះក្ដី មន្ត្រីជាន់ខ្ពស់គណបក្សប្រជាជនកម្ពុជា បញ្ជាក់ថា ថវិការៀបចំពិធីអបអរថ្ងៃ ៧ មករា ខាងមុខ គឺជាការទទួលខុសត្រូវចំណាយទាំងស្រុងរបស់គណបក្សប្រជាជនកម្ពុជា។
មន្ត្រីជាន់ខ្ពស់គណបក្សប្រជាជនកម្ពុជា បញ្ជាក់ថា ការអបអរសាទរខួបលើកទី៣៨ នៃថ្ងៃ៧ មករា ឆ្នាំ២០១៧ នេះ គឺក្នុងគោលបំណងដើម្បីរំលឹកថ្ងៃទទួលបានជ័យជំនះ និងរំដោះពលរដ្ឋឱ្យរួចផុតពីការកាប់សម្លាប់របស់ក្រុម ប៉ុល ពត ព្រមទាំងដើម្បីបញ្ជាក់ថា ថ្ងៃ៧ មករា គឺជាថ្ងៃមួយដែលអាចធ្វើឱ្យកម្ពុជា ទទួលបានសន្តិភាពពេញលេញ និងការអភិវឌ្ឍរីកចម្រើនដូចសព្វថ្ងៃនេះ។
ថ្វីត្បិតយ៉ាងនេះក្ដី អ្នកវិភាគយល់ថា គណបក្សប្រជាជនកម្ពុជា នឹងប្រើប្រាស់ថវិការដ្ឋមួយចំនួនតូច គួបផ្សំនឹងថវិកាបក្សខ្លួនមួយចំនួនធំ ដើម្បីចាយវាយលើការរៀបចំកម្មវិធីប្រារព្ធខួបនៃថ្ងៃចងចាំ (៧ មករា) មួយនេះ។ អ្នកឃ្លាំមើលផ្នែកអភិវឌ្ឍន៍សង្គម លោកបណ្ឌិត មាស នី អះអាងថា ការប្រើប្រាស់ថវិកាជាតិដើម្បីប្រយោជន៍បក្ស និងមិនមែនជាប្រយោជន៍រួមរបស់ជាតិ គឺជារឿងខុសច្បាប់៖ «»។
បណ្ឌិត មាស នី អះអាងបន្ថែមថា មូលហេតុនាំឱ្យមានការសង្ស័យបែបនេះ ព្រោះដោយសារកន្លងមក គណបក្សប្រជាជនកម្ពុជា ដែលកំពុងដឹកនាំរដ្ឋាភិបាលយូរឆ្នាំទៅហើយនោះ តែងតែពង្រឹងគោលនយោបាយបម្រើគណបក្សរបស់ខ្លួនឱ្យបានរឹងមាំ តាមរយៈការសាងសង់ហេដ្ឋារចនាសម្ព័ន្ធសន្ធឹកសន្ធប់ភាគច្រើន ដូចជាស្ពាន ថ្នល់ និងសាលារៀនជាដើម ហើយដែលជាការចំណាយថវិកាជាតិ តែបែរជាដាក់ឈ្មោះរបស់គណបក្ស ឬថ្នាក់ដឹកនាំគណបក្សនេះទៅវិញ៖ «»។
ឆ្លើយតបការលើកឡើងនេះ មន្ត្រីនាំពាក្យគណបក្សប្រជាជនកម្ពុជា លោក សុខ ឥសាន បញ្ជាក់ថា កន្លងមកគណបក្សមិនដែលធ្វើខុសច្បាប់ម្ដងណាឡើយ រីឯការរៀបចំរំលឹកខួបថ្ងៃ៧ មករា ខាងមុខនេះ ក៏មិនប៉ះពាល់ថវិកាជាតិបន្តិចនោះដែរ។ មន្ត្រីបក្សកាន់អំណាចរូបនេះបន្តថា សមាជិកគណបក្សគឺបានរ៉ៃអង្គាសគ្នាដើម្បីយកថវិកាមករៀបចំកម្មវិធីរំលឹកខួបនេះ ម្យ៉ាងវិញទៀត គណបក្សមិនដែលខ្វះលុយក្នុងការធ្វើបុណ្យទាននោះដែរ៖ «»។
ថ្វីត្បិតយ៉ាងនេះក្ដី លោកបណ្ឌិត មាស នី បញ្ជាក់ថា រយៈពេលកន្លងមក ការចេញមុខនឹងការដាក់ឈ្មោះខ្លួនជាឯកជន ឬឈ្មោះគណបក្សជាអ្នកសាងសង់ស្ពាន ផ្លូវថ្នល់ និងមន្ទីរពេទ្យជាដើមគេមិនដែលដឹងថា អ្នកទាំងនោះដែលអាចមានលុយរាប់លានដុល្លារ បានលុយពីណាដើម្បីយកមកសាងសង់ហេដ្ឋារចនាសម្ព័ន្ធទាំងនេះទេ។
ថវិកាជាតិសម្រាប់ឆ្នាំ២០១៧ ដែលមានទំហំទឹកប្រាក់កើនឡើងជិត ៥ពាន់លានដុល្លារអាមេរិក ថវិកាជាតិទាំងនេះ ក្រៅពីចំណាយលើវិស័យសំខាន់ៗនានា គឺសល់ជាង ៨៥០លានដុល្លារ ដែលរដ្ឋាភិបាលបានត្រៀមទុកសម្រាប់ចំណាយផ្សេងៗដែលគ្មានមុខសញ្ញា។ កញ្ចប់ថវិកាបម្រុងទុកនេះ សង្គមស៊ីវិល និងមន្ត្រីគណបក្សប្រឆាំងធ្លាប់បារម្ភថា អាចធ្លាក់នៅក្នុងអំពើពុករលួយ។
ពាក់ព័ន្ធការប្រារព្ធរំលឹកខួបថ្ងៃ៧ មករា លោក សុខ ឥសាន បញ្ជាក់ថា គឺរៀបចំឡើងនៅទីស្នាក់ការកណ្ដាលគណបក្ស នៅទល់មុខស្ថានទូតប្រទេសថៃ និងជប៉ុន ហើយនឹងមានអ្នកចូលរួមជាងមួយម៉ឺននាក់។ លោកថ្លែងថា បន្ទាប់ពីថ្នាក់ដឹកនាំជាន់ខ្ពស់គណបក្សថ្លែងសារនយោបាយរំលឹកអំពីថ្ងៃ៧ មករា រួចមក សមាជិក សមាជិកា ឬអ្នកតំណាងគណបក្សនឹងលើកថ្លែងអំពីការប្ដេជ្ញាចិត្តបម្រើកិច្ចការជូនគណបក្សនៅពេលខាងមុន។ ក្រៅនេះ គឺនៅតាមបណ្ដាខេត្ត ក៏មានការរៀបចំកម្មវិធីដូចគ្នាដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។