គណៈកម្មការខេត្តរៀបចំការបោះឆ្នោតខេត្តកំពង់ឆ្នាំង នៅថ្ងៃទី៧ កក្កដា ឆ្នាំ២០១៣ បានពិនិត្យ និងចុះអង្កេតផ្ទាល់ទៅលើអង្គហេតុក្នុងសំណុំរឿងប្រើអំពើហិង្សាដោយចេតនា និងរើសអើងគណបក្សនយោបាយ ប្រឆាំងទៅនឹងជំទប់ទី២ គណបក្សសង្គ្រោះជាតិ ទៅលើសកម្មជនគណបក្សប្រជាជនកម្ពុជា។
ប្រធានគណៈកម្មការខេត្តរៀបចំការបោះឆ្នោតខេត្តកំពង់ឆ្នាំង អ្នកស្រី នួន ចន្នី មានប្រសាសន៍ថា ជំហានដំបូងគណៈកម្មការត្រូវដំណើរការនីតិវិធីមួយចំនួន បន្ទាប់មកនឹងធ្វើការសម្របសម្រួល ក្នុងករណីមិនត្រូវរ៉ូវគ្នាគណៈកម្មការសម្រេចបើកសវនាការតែម្ដង៖ «ឥឡូវហ្នឹង PEC បានចុះទៅធ្វើការស៊ើបអង្កេតស្រាវជ្រាវទៀត អ៊ីចឹងសំណុំរឿងទាំងអស់ហ្នឹង បានន័យថា នៅក្នុងដៃ PEC ហើយ ប៉ុន្ដែដោយសារថា PEC រវល់មានភារៈច្រើន»។
អនុប្រធានសហភាពសម្ព័ន្ធយុវជនរបស់គណបក្សប្រជាជនកម្ពុជា កញ្ញា ងឹម ពុទ្ធា បានរៀបរាប់ថា នៅល្ងាចថ្ងៃទី២៨ ខែមិថុនា ឆ្នាំ២០១៣ នៅចំណុចភូមិស្វាយគយ ឃុំពន្លៃ ជំទប់ទី២ លោក ហេង ប៊ុនហៀង បានគំរាមពាក្យសម្ដី និងទះក្បាលនាងមួយដៃ ព្រមទាំងបានចាប់មួលដៃស្ដាំរបស់នាងឲ្យថ្លោះទៀតផង។ បច្ចុប្បន្នរបួសដៃរបស់នាងបានធូរស្រាលវិញហើយ បន្ទាប់ពីបានព្យាបាលពីរបីថ្ងៃរួចមក។
កញ្ញា ងឹម ពុទ្ធា មានប្រសាសន៍ថា កញ្ញាព្យាយាមគេចចេញពីកន្លែងកើតហេតុ ប៉ុន្តែលោក ហេង ប៊ុនហៀង នៅតែតាមមករករឿង៖ «ចំណុចទី៤ទៀត គាត់ចាប់កដៃខ្ញុំមួលបម្រុងនឹងបោក តែបោកមិនបាន គាត់ក៏យាដៃមួយខាងទៀតមកទះកំផ្លៀងខ្ញុំ តែទះមិនបាន ខ្ញុំក៏គេចចេញ»។
ជំទប់ទី២ របស់គណបក្សសង្គ្រោះជាតិ លោក ហេង ប៊ុនហៀង បានថ្លែងបដិសេធថា ឈ្មោះ ងឹម ពុទ្ធា មកពីគណបក្សប្រជាជនកម្ពុជា ទេ ដែលបានឆក់យកប្រដាប់កិបពីអនុប្រធានភូមិដែលកំពុងតែដើរកិបស្លាកជាមួយគ្នានោះ ស្ទុះមកវាយលោកមុន៖ «សូមជម្រាបប្អូន នេះគឺជាការចោទប្រកាន់សុទ្ធសាធ ឥឡូវគេប្ដឹងខ្ញុំទៅដល់ PEC តែចុងក្រោយហ្នឹង គឺសាក្សីខ្ញុំមាន គឺប្រពន្ធរបស់ខ្ញុំៗអត់បានវាយទេ គាត់ហ្នឹងទេ ចុងក្រោយយកកិបមកគប់ មកវាយ ខ្ញុំចាប់ដៃជាប់ ខ្ញុំចាប់ទេ ខ្ញុំអត់កាច់ឲ្យបាក់ទេ អាហ្នឹងគឺសាក្សីច្បាស់លាស់»។
សង្គមស៊ីវិលលើកឡើងថា គេកម្រឃើញករណីសកម្មជនគាំទ្រគណបក្សសង្គ្រោះជាតិ ទៅប្រើអំពើហិង្សា និងរារាំងសកម្មភាពឃោសនាបោះឆ្នោតរបស់គណបក្សប្រជាជនកម្ពុជា នោះទេ។ នេះជាករណីទីមួយដែលកើតឡើងនៅខេត្តកំពង់ឆ្នាំង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។