ថ្វីបើពិធីឆ្លងឆ្នាំចាស់ផ្លាស់ចូលឆ្នាំថ្មីបានកន្លងផុតទៅហើយក្តី តែសម្រាប់ជំនួបចរចាគ្នារវាងគណបក្សកាន់អំណាច និងគណបក្សប្រឆាំង នៅតែមិនទាន់លេចចេញជារូបរាងតាមការសន្យានៅឡើយ។ រដ្ឋមន្ត្រីក្រសួងមហាផ្ទៃ លើកហេតុផលថា ការយឺតយ៉ាវជួបគ្នារវាងគណបក្សទាំងពីរ ដោយសាររវល់ពេក រកពេលជួបមិនទាន់បាន រីឯមេបក្សប្រឆាំងនៅក្រៅប្រទេសវិញថា ការលើកឡើងរបស់គណបក្សកាន់អំណាច គឺជាលេស និងតែងតែមានភាពមិនស្មោះត្រង់ក្នុងរឿងចរចា។
គម្រោងជួបចរចាគ្នារវាងគណបក្សប្រជាជនកម្ពុជា និងគណបក្សប្រឆាំង ជុំវិញការសន្យានិយាយរឿងដោះលែងមន្ត្រីសិទ្ធិមនុស្ស និងអគ្គលេខាធិការរង គ.ជ.ប នៅចុងឆ្នាំ២០១៦ នេះ ត្រូវបានខកខានទៅវិញ បណ្ដាលឲ្យមជ្ឈដ្ឋានទូទៅងឿងឆ្ងល់ និងបន្តតាមអ៊ុតមើលអំពីគម្រោងជួបជុំគ្នាឡើងវិញក្នុងឆ្នាំថ្មីនេះ។
ថ្លែងប្រាប់អ្នកសារព័ត៌មានដែលប្រដេញសួរ បន្ទាប់ពីបញ្ចប់កិច្ចប្រជុំបូកសរុបលទ្ធផលត្រួតពិនិត្យការអនុវត្តច្បាប់ស្ដីពីចរាចរណ៍ផ្លូវគោកឆ្នាំ២០១៦ និងទិសដៅការងារឆ្នាំ២០១៧ នៅថ្ងៃទី២ ខែមករា នេះ ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានក្រុមតំណាងរាស្ត្រភាគច្រើននៃរដ្ឋសភា លោក ស ខេង លើកឡើងថា ទោះបីជាផុតឆ្នាំចាស់ផ្លាស់ចូលឆ្នាំថ្មីក្តី តែលោកមិនទាន់មានពេលជួបជាមួយបក្សប្រឆាំងនៅឡើយតាមការសន្យាថា នឹងជួបនៅចុងខែធ្នូ នៅឡើយទេ ដោយសារជាប់រវល់ការងារច្រើនពេក។ ទោះបីជាយ៉ាងណា លោកបញ្ជាក់ថា គម្រោងជួបចរចាជាមួយគណបក្សប្រឆាំង នៅតែមានដដែល តែមិនទាន់ហ៊ានកំណត់ពេលជាក់លាក់៖ « យើងនៅតែមានគម្រោងដើម្បីជួបអ៊ីចឹង តែមិនទាន់ដឹងថាពេលណា ព្រោះការងារដើមឆ្នាំនេះវាច្រើន » ។
ចំពោះសំណួររឿងដោះលែងមន្ត្រីសិទ្ធិមនុស្សអាដហុក (ADHOC) ៤រូប និងមន្ត្រី គ.ជ.ប ម្នាក់នោះ លោក ស ខេង បង្វែរឲ្យទៅសួរតុលាការ ក្រោមហេតុផលថា លោកមិនអាចដោះស្រាយបានឡើយ ប្រសិនបើតុលាការមិនទាន់បញ្ចប់នីតិវិធីនោះ។ ការឆ្លើយប្រាប់អ្នកសារព័ត៌មាននៅពេលនេះរបស់លោក ស ខេង គឺខុសពីកាលពីថ្ងៃទី៧ ធ្នូ ក្រោយពីកិច្ចប្រជុំសភាដែលលោកថា មន្ត្រីសិទ្ធិមនុស្សអាដហុក និងអគ្គលេខាធិការរង គ.ជ.ប អាចនឹងត្រូវដោះលែងនៅចុងខែធ្នូ ឆ្នាំ២០១៦ នោះ។
ចំពោះការខកខានជួបចរចាគ្នា និងបន្តលើកពេលគ្មានការកំណត់ជាក់លាក់នេះ ត្រូវបានប្រធានគណបក្សសង្គ្រោះជាតិ លោក សម រង្ស៊ី ឆ្លើយតបថា គឺជាលេសរបស់គណបក្សកាន់អំណាច និងចង់រក្សាអ្នកកំពុងជាប់ឃុំនោះ ឲ្យបន្តស្ថិតនៅក្នុងពន្ធនាគារដដែល ដើម្បីជាគំរូកុំឲ្យអ្នកដទៃទៀតហ៊ានរិះគន់រដ្ឋាភិបាលលោក ហ៊ុន សែន៖ « គេចង់រក្សាអ្នកដែលនៅជាប់គុកឲ្យនៅតែជាប់គុកតទៅទៀត ដើម្បីជាគំរូ កុំឲ្យអ្នកដទៃទៀតហ៊ានតវ៉ាទិតៀនរដ្ឋាភិបាល។ អ៊ីចឹងហើយបានជាប្រជាពលរដ្ឋខ្មែរយល់ច្បាស់ថា អ្វីៗដែលគេធ្វើនោះ គ្រាន់តែជាលេសទេ អ្វីដែលគេចង់បាន គឺការបំភិតបំភ័យប្រជាពលរដ្ឋជាប្រចាំរហូតទៅដល់ថ្ងៃបោះឆ្នោត » ។
លើសពីនេះទៀត លោក សម រង្ស៊ី ដែលត្រូវរដ្ឋាភិបាលហាមមិនឲ្យចូលស្រុកនោះ បន្តថា ការខកខានជួបគ្នានេះ ដោយសារលោក កឹម សុខា មិនព្រមធ្វើតាមការបង្គាប់បញ្ជារបស់គណបក្សប្រជាជនកម្ពុជា ដែលមានន័យចង់បំបែកថ្នាក់ដឹកនាំគណបក្សសង្គ្រោះជាតិ។ លោកបន្តទៀតថា លោក ហ៊ុន សែន មិនចង់ចរចាដើម្បីស្ថាបនាទេ គឺចង់ចរចាដើម្បីចាក់រុក និងឆ្កឹះឆ្កៀលឲ្យលោក កឹម សុខា បែកបាក់ជាមួយរូបលោក៖ « គាត់ចង់ឲ្យគណបក្សសង្គ្រោះជាតិ តាមរយៈឯកឧត្តម កឹម សុខា សរសេរសំបុត្រតាមអ្វីដែលគាត់ចង់បាន បើមិនធ្វើតាមអ្វីដែលគាត់ចង់បានទេ ការប្រើពាក្យពេចន៍វាមិនសមរម្យ វាមិនសម្ដែងការពិតឲ្យលោក កឹម សុខា ចេះតែសរសេរទៅ ហើយថ្ងៃណាមួយគាត់នឹងយកលិខិតនោះមកប្រើប្រាស់ ដើម្បីឲ្យគណបក្សសង្គ្រោះជាតិ ឲ្យលោក កឹម សុខា ខ្លួនឯងផ្ទាល់មករករឿងខ្ញុំវិញ ថាខ្ញុំនេះហើយបាននិយាយអីមួយណា ឬមួលបង្កាច់អី។ រួចហើយទៅគាត់មានគ្នាគាត់ប៉ុន្មាននាក់ ដែលបានបង្កប់នៅក្នុងគណបក្សសង្គ្រោះជាតិ ពេលនោះនឹងឲ្យចេញមុខ ហើយឲ្យមួលបង្កាច់ខ្ញុំ » ។
លោក សម រង្ស៊ី បញ្ជាក់ថា គណបក្សសង្គ្រោះជាតិ នៅតែមានជំហរចង់ចរចាដោះស្រាយបញ្ហាជាតិ និងបញ្ហាប្រជាជនដដែល ប៉ុន្តែស្នើឲ្យបក្សកាន់អំណាចមានភាពស្មោះត្រង់។
រីឯអ្នកជំនាញផ្នែកវិទ្យាសាស្ត្រនយោបាយ លោក សូ ចន្ថា មានប្រសាសន៍ថា ស្ថានភាពនយោបាយនៅតែមិនទាន់មានភាពនឹងននៅឡើយទេ។ លោកបន្តថា វប្បធម៌សន្ទនាដែលហាក់កំពុងក្រៀមស្វិតទៅវិញនេះ ដោយសារតែគណបក្សកាន់អំណាចនៅតែប្រើយុទ្ធសាស្ត្រចាស់ ដើម្បីធ្វើឲ្យថ្នាក់ដឹកនាំបក្សប្រឆាំងលែងទុកចិត្តគ្នា។
អ្នកជំនាញផ្នែកវិទ្យាសាស្ត្រនយោបាយរូបនេះជឿជាក់ថា ប្រសិនបើគណបក្សប្រជាជនកម្ពុជា ពិតជាមានឆន្ទៈចង់ឲ្យមានឯកភាពជាតិ និងគិតអំពីផលប្រយោជន៍ជាតិនោះ ជំនួបចរចារវាងបក្សទាំងពីរ ពិតជានឹងកើតឡើងក្នុងពេលឆាប់ៗខាងមុខនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។