ទាក់ទងនឹងបញ្ហានេះ អ្នកឃ្លាំមើលការបោះឆ្នោត បានពន្យល់ថា គណបក្សនយោបាយទាំងពីរមិនមានឆន្ទៈពិតប្រាកដក្នុងការចរចាទេ ព្រោះថា គណបក្សជាប់ឆ្នោតប្រកាន់ជំហរឈ្នះចាញ់រៀងៗខ្លួន។
មន្ត្រីជាន់ខ្ពស់គណបក្សប្រជាជនកម្ពុជា បានឲ្យដឹងនៅថ្ងៃទី៦ ធ្នូ ថា គណបក្សប្រជាជនកម្ពុជា ចង់ឲ្យមានការចរចារកដំណោះស្រាយនយោបាយវិញ ប្រសើរជាងគណបក្សប្រឆាំងយកជម្រើសធ្វើបាតុកម្ម។
តំណាងក្រុមដឹកនាំចរចាគណបក្សប្រជាជនកម្ពុជា លោក ព្រំ សុខា និងជារដ្ឋលេខាធិការក្រសួងមហាផ្ទៃ មានប្រសាសន៍ថា គណបក្សប្រជាជនកម្ពុជា នៅតែបើកផ្លូវចរចាជាមួយគណបក្សសង្គ្រោះជាតិ ហើយការយកជម្រើសធ្វើបាតុកម្មរបស់គណបក្សសង្គ្រោះជាតិ នេះ មិនមែនជាជម្រើសល្អដែលនាំឲ្យមានដំណោះស្រាយនយោបាយនោះទេ។
«សំឡេង»
ការលើកឡើងរបស់មន្ត្រីជាន់ខ្ពស់គណបក្សប្រជាជនកម្ពុជា នេះ នៅខណៈដែលក្រុមមន្ត្រីសិទ្ធិមនុស្ស ព្រះសង្ឃ និងប្រជាពលរដ្ឋ កំពុងធ្វើធម្មយាត្រា និងសិទ្ធិយាត្រា អបអរទិវាសិទ្ធិមនុស្សអន្តរជាតិ។ ហើយនៅថ្ងៃទី១០ ធ្នូ នេះ គណបក្សប្រឆាំងនឹងប្រារព្ធទិវាសិទ្ធិមនុស្សអន្តរជាតិ នេះដែរ។ ក្រៅពីនេះទៀត គណបក្សសង្រ្គោះជាតិ នឹងធ្វើបាតុកម្ម ១សប្ដាហ៍ម្ដងៗ ចាប់ពីថ្ងៃទី១៥ ធ្នូ ទៅ។
មន្ត្រីនាំពាក្យគណបក្សសង្គ្រោះជាតិ លោក យ៉ែម បុញ្ញឫទ្ធិ បានលើកឡើងថា គណបក្សសង្គ្រោះជាតិ ក៏បើកចំហក្នុងការចរចានេះដែរ ប៉ុន្តែបញ្ហាសំខាន់នៅត្រង់ថា គណបក្សប្រជាជនកម្ពុជា មិនព្រមយករបៀបវារៈបីចំណុច ដែលគណបក្សសង្គ្រោះជាតិ ទាមទារដាក់ចូលក្នុងការចរចា រួមមាន ទី១ ការស្វែងរកការពិតលទ្ធផលបោះឆ្នោត ទី២ សុំឲ្យមេដឹកនាំកំពូលគណៈកម្មាធិការជាតិរៀបចំការបោះឆ្នោត លាលែងពីតួនាទី និងទី៣ កែទម្រង់ការបោះឆ្នោត។
«សំឡេង»
នៅក្នុងបរិបទស្ថានភាពនយោបាយកំពុងប្រទាញប្រទង់នេះ អ្នកវិភាគនយោបាយបានលើកឡើងថា អ្នកនយោបាយបានប្រើនយោបាយឈ្នះចាញ់ ឬនយោបាយឈ្នះឈ្នះ។ ការប្រើយុទ្ធសាស្ត្រនយោបាយបែបនេះ គឺធ្វើឲ្យប៉ះពាល់ដល់ប្រជាពលរដ្ឋជាម្ចាស់ឆ្នោត។
ប្រធានគណៈកម្មាធិការអព្យាក្រឹត្យ និងយុត្តិធម៌ ដើម្បីការបោះឆ្នោតដោយសេរី និងត្រឹមត្រូវនៅកម្ពុជា លោកបណ្ឌិត ហង្ស ពុទ្ធា មានប្រសាសន៍ថា នៅក្នុងស្ថានភាពបែបនេះ គណបក្សទាំងពីរត្រូវយកបញ្ហារៀងៗខ្លួនមកដាក់លើតុចរចា ប្រសិនបើគណបក្សទាំងពីរមានឆន្ទៈជួយដល់ប្រជាពលរដ្ឋ និងប្រទេសជាតិ។
«សំឡេង»
ការជាប់គាំងនយោបាយនេះ ក៏ជាកត្តារាំងស្ទះ ធ្វើឲ្យកម្ពុជា នឹងប្រឈមវិបត្តិសេដ្ឋកិច្ចកាន់តែធ្ងន់ធ្ងរនៅពេលខាងមុខ។ អ្នកជំនាញសេដ្ឋកិច្ចពន្យល់ថា បញ្ហាជាប់គាំងនយោបាយនេះ ធ្វើឲ្យអ្នកវិនិយោគដកថយ និងងាកទៅរកប្រទេសជិតខាងវិញជាដើម។
អ្នកឃ្លាំមើលការបោះឆ្នោតលើកឡើងថា ប្រសិនគណបក្សទាំងពីរមិនរកចំណុចឯកភាពគ្នាឃើញទេ គណបក្សទាំងពីរនឹងមានវិបត្តិដូចគ្នា គឺគណបក្សសង្គ្រោះជាតិ នឹងត្រូវចំណាយថវិកាកាន់តែច្រើន ក្នុងការដឹកនាំប្រជាពលរដ្ឋធ្វើបាតុកម្ម ហើយប្រជាពលរដ្ឋខ្លួនឯងផ្ទាល់ក៏ត្រូវខាតពេលវេលារកស៊ី នៅគ្រាដែលទំនិញគ្រប់មុខកាន់តែឡើងថ្លៃ។
ចំពោះគណបក្សប្រជាជនកម្ពុជា វិញ ប្រឈមនឹងការដាក់ទណ្ឌកម្មសេដ្ឋកិច្ចពីសហគមន៍អន្តរជាតិ តាមរយៈការផ្ដល់កម្ចី និងជំនួយជាដើម ដោយសារតែការដឹកនាំសភា និងរដ្ឋាភិបាលដោយឯកបក្សនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។