រថយន្ត ឡេនគ្រឹសឺរ (Land Cruiser) សេរីទំនើបមួយគ្រឿង ពណ៌ទឹកប្រាក់ ពាក់ស្លាកលេខភ្នំពេញ 2N-1827 មានបិទស្លាកសញ្ញាគណបក្សប្រជាជនកម្ពុជា និងរូបថ្នាក់ដឹកនាំគណបក្សប្រជាជនកម្ពុជា បីនាក់។ រថយន្តនេះបានទៅឈប់សំចតនៅសណ្ឋាគារ ឃីង ហ្វី (King Fy Hotel) ក្នុងក្រុងបាត់ដំបង មិនព្រមបកស្លាក និងរូបថ្នាក់ដឹកនាំគណបក្សប្រជាជនកម្ពុជា ចេញពីរថយន្តនោះទេ។
អ្នកស្រី មូរ សុខហួរ បេក្ខជនតំណាងរាស្ត្រលំដាប់លេខរៀងទី១ របស់គណបក្សសង្គ្រោះជាតិ នៅខេត្តបាត់ដំបង ប្រតិកម្មថា គណបក្សប្រជាជនកម្ពុជា ជាបក្សកាន់អំណាចត្រូវតែបង្ហាញជាគំរូនៅក្នុងការធានាឲ្យការគោរពច្បាប់ និងអនុវត្តច្បាប់៖ «នេះគឺជាការអាម៉ាស់មួយដ៏ធំណាស់ នៃគណបក្សប្រជាជនកម្ពុជា នៅខេត្តបាត់ដំបង ដែលយកច្បាប់មកឈ្លីជាន់នឹងជើង ហើយខ្ញុំមិនគិតថានេះជារឿងបុគ្គលទេ ពីព្រោះខ្ញុំបានទៅនិយាយជាមួយតំណាងគណបក្សប្រជាជនកម្ពុជា នៅខេត្តបាត់ដំបង ព្រឹកមិញ តាំងពីថ្ងៃត្រង់ទៅហើយ ខ្ញុំសុខចិត្តសម្របសម្រួលទៅហើយ តែគណបក្សប្រជាជនកម្ពុជា តែងតែមិនគោរពច្បាប់ ហើយអ្វីដែលខ្ញុំសោកស្ដាយ ខ្ញុំសោកស្ដាយដែលថា គណៈកម្មការរៀបចំការបោះឆ្នោតទាំងសង្កាត់ ទាំងខេត្តទាំងមូលមិនហ៊ានចាត់វិធានការ ពេលណាដែលមានការគោរពច្បាប់បោះឆ្នោតដែលខ្ញុំធ្វើរបៀបនេះ គណៈកម្មការ តួនាទីគណៈកម្មការ ជាពិសេសគណៈកម្មការខេត្ត មិនមែនជាអ្នកសម្របសម្រួលទេ ជាអ្នក ត្រូវតែជាតុលាការចាត់វិធានការហើយ។ ដូច្នេះយើងខ្ញុំមិនសុខចិត្តទេ។ ខ្ញុំចង់ឲ្យមើលឃើញថាការបោះឆ្នោតមួយសេរី និងយុត្តិធម៌។ អ្វីដែលគណបក្សសង្គ្រោះជាតិ បានតែងតែនិយាយហើយ និយាយទៀត តវ៉ាហើយ តវ៉ាទៀតនូវភាពអយុត្តិធម៌មិនប្រក្រតី នេះគឺជាភស្តុតាងមួយដ៏ច្បាស់ណាស់»។
អ្នកសម្របសម្រួលសមាគមអាដហុក (Adhoc) ប្រចាំខេត្តបាត់ដំបង លោក យិន ម៉េងលី ដែលចុះដល់កន្លែងកើតហេតុនោះ ចាត់ទុកថា រថយន្តនោះបានធ្វើសកម្មភាពឃោសនានៅថ្ងៃហាមឃាត់៖ «ចំណុចមួយទៀតគឺខ្ញុំគិតថាគេមើលងាយហ្មង គេមើលងាយច្បាប់បោះឆ្នោត គេអាចមើលងាយរចនាសម្ព័ន្ធស្ថាប័ន គ.ជ.ប ទាំងមូល ពីព្រោះ ស៊ិក (CEC) មកមិនចេះតិច សូម្បីតែ ប៉ិច (PEC) ក៏មកទៀត ហើយគេអត់ខ្លាច គេនៅតែប្រព្រឹត្ត អ៊ីចឹងបានន័យថា គេមើលងាយស្ថាប័នហ្នឹង ដោយស្ថាប័នហ្នឹងមិនអាចធ្វើអ្វីទៅលើគេបាន ខ្ញុំកត់សម្គាល់ឃើញអ៊ីចឹង។ ក្នុងផ្លូវច្បាប់ គឺចង់និយាយថា ថ្ងៃនេះជាថ្ងៃស អ៊ីចឹងគឺអត់មានសកម្មភាពអ្វីទាំងអស់ អ៊ីចឹងបានន័យថា ទោះបីឡានដែលបិទហ្នឹងមិនធ្វើសកម្មភាពស្រែកឡូឡា តែសញ្ញាហ្នឹងវាទាក់ទិនសញ្ញាដើម្បីឲ្យប្រជាពលរដ្ឋចងចាំ ឲ្យប្រជាពលរដ្ឋយល់នូវអត្តសញ្ញាណរបស់គណបក្សហ្នឹងតែម្ដង»។
គណបក្សសង្គ្រោះជាតិ អះអាងថា នឹងប្ដឹងករណីរំលោភបំពាននេះទៅគណៈកម្មការខេត្តរៀបចំការបោះឆ្នោត។
នៅសណ្ឋាគារដែលរថយន្តនោះចត គេសង្កេតឃើញមន្ត្រីរៀបចំការបោះឆ្នោតសង្កាត់រតនៈ ពី ៤ ទៅ ៥នាក់ សុំឲ្យម្ចាស់រថយន្តគណបក្សប្រជាជនកម្ពុជា បកស្លាកសញ្ញា និងរូបថ្នាក់ដឹកនាំគណបក្សប្រជាជនកម្ពុជា នោះចេញពីរថយន្តដែរ ប៉ុន្តែម្ចាស់រថយន្តនោះពុំធ្វើតាមឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។