មន្ត្រីនាំពាក្យគណបក្សសង្គ្រោះជាតិ ប្រកាសរក្សាជំហររបស់ខ្លួនក្នុងការជួបពិភាក្សាបន្តជាមួយគណបក្សប្រជាជនកម្ពុជា ដូចការគ្រោងទុក ហើយក៏ពុំមានរបៀបវារៈថ្មីណាមួយដើម្បីដាក់បន្ថែមសម្រាប់កិច្ចពិគ្រោះយោបល់បន្ទាប់នេះដែរ។
លោក យ៉ែម បុញ្ញឫទ្ធិ អ្នកនាំពាក្យគណបក្សសង្គ្រោះជាតិ បញ្ជាក់ឲ្យដឹងមុនមួយថ្ងៃនៃកិច្ចពិភាក្សាដែលគ្រោងធ្វើនៅវិមានព្រឹទ្ធសភា នៅថ្ងៃទី១០ មីនា ថា គណៈកម្មការចម្រុះរបស់គណបក្សនយោបាយទាំងពីរ នឹងជួបជជែកបន្តទៅលើកិច្ចការមួយចំនួនដែលនៅសេសសល់កាលពីដើមសប្ដាហ៍កន្លងទៅនេះ ជាពិសេសផ្ដោតលើការកែទម្រង់នៃការបោះឆ្នោត។
លោកបន្តថា គណបក្សសង្គ្រោះជាតិ ពុំមានប្រធានបទអ្វីថ្មីសម្រាប់ដាក់បន្ថែមក្នុងកិច្ចពិភាក្សានៅព្រឹកថ្ងៃទី១០ មីនា ស្អែកទេ៖ «គម្រោងគឺនៅជួបគ្នាដដែលបាទ! ស្អែកម៉ោង ៩ព្រឹក នៅវិមានព្រឹទ្ធសភា។ ការជួបគ្នារបស់គណៈកម្មការចម្រុះហ្នឹង។ ហើយការពិគ្រោះយោបល់ និងជជែកគ្នានៅថ្ងៃស្អែកនេះ គឺបន្តពីថ្ងៃទី៣ មក។ នៅក្នុងហ្នឹង នឹងជជែកគ្នាកំណែទម្រង់កិច្ចការបោះឆ្នោតទៅមុខទៀត ពាក់ព័ន្ធ គ.ជ.ប ប្រព័ន្ធផ្សព្វផ្សាយ និងរឿងយន្តការដើម្បីដោះស្រាយវិវាទ ហើយនិងអាចនឹងជជែកគ្នាពីនីតិវិធីនៃដំណើរការមួយចំនួនទៀត»។
ក្នុងកិច្ចពិភាក្សាកាលពីថ្ងៃទី៣ ខែមីនា គណៈកម្មាធិការចម្រុះមកពីគណបក្សសង្គ្រោះជាតិ និងគណបក្សប្រជាជនកម្ពុជា បានឯកភាពគ្នាលើចំណុចមួយចំនួន ជាអាទិ៍ ការរៀបចំបញ្ជីឈ្មោះ និងចុះឈ្មោះអ្នកបោះឆ្នោតថ្មី ការបង្កើតច្បាប់ស្ដីពីហិរញ្ញវត្ថុគណបក្សនយោបាយ ការកែទម្រង់ស្ថាប័នរៀបចំការបោះឆ្នោត។ ប៉ុន្តែចំណុចលម្អិតក្នុងការកែទម្រង់ស្ថាប័នរៀបចំការបោះឆ្នោតមិនទាន់ជជែកគ្នា និងឯកភាពគ្នានៅឡើយទេ។ ចំណុចលម្អិតទាំងនោះ មានដូចជា យន្តការនៃការដោះស្រាយវិវាទពេលបោះឆ្នោត បញ្ហាប្រព័ន្ធផ្សព្វផ្សាយសម្រាប់គណបក្សនយោបាយ រួមទាំងការទាមទារឲ្យមានការបោះឆ្នោតឡើងវិញជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។