ជំទប់ទីពីររបស់គណបក្សប្រឆាំង ប្រចាំខេត្តកំពត ចោទប្រកាន់ចៅសង្កាត់មកពីគណបក្សប្រជាជនកម្ពុជា ថាបានគំរាមកំហែងប្រជាពលរដ្ឋ និងអ្នកគាំទ្រដទៃទៀត មិនឲ្យរាប់រកអ្នកដែលមាននិន្នាការទៅរកបក្សប្រឆាំង ដោយចាត់ទុកថា គឺជាផ្នែកមួយដែលមានគោលនយោបាយ មិនអាចធ្វើឲ្យជីវភាពរបស់ពលរដ្ឋមានការប្រែប្រួលជាជាងកម្មវិធីនយោបាយរបស់គណបក្សគ្រប់គ្រងអំណាចនេះឡើយ។
ជំទប់ទីពីរមកពីគណបក្សសង្គ្រោះជាតិ នៅសង្កាត់កំពង់កណ្ដោល អ្នកស្រី សំ ចរិយា មានប្រសាសន៍ថា ចៅសង្កាត់មកពីខាងគណបក្សប្រជាជនកម្ពុជា ដើរគំរាមពលរដ្ឋមិនឲ្យចូលទិញសម្ភារៈប្រើប្រាស់ពីហាងរបស់អ្នកស្រីទេ។
ជាងនេះទៀត គម្រោងកែលម្អ និងជួសជុលផ្ទះសំណាក់មួយចំនួនដែលអ្នកស្រីបានស្នើសុំ ក៏ត្រូវបានមន្ត្រីជាន់ខ្ពស់ក្នុងខេត្តកំពត បញ្ជាឲ្យមន្ត្រីជំនាញព្យាយាមផ្អាករាល់សំណើរបស់អ្នកស្រីថែមទៀតផង។
ជំទប់ទីពីររបស់បក្សប្រឆាំងរូបនេះ បានហៅសកម្មភាពរបស់អាជ្ញាធរមូលដ្ឋាននៅពេលនេះថា គឺជាការប្រកាន់ និងរើសអើងនយោបាយ៖ «សូម្បីតែខ្ញុំធ្វើការនៅឃុំសង្កាត់ ចូលជាលើកដំបូងក៏គេមានការហាមឃាត់ មិនឲ្យជិតដិតជាមួយយើង មិនឲ្យនិយាយរកយើង។ រហូតដល់ថ្មីៗនេះ មេឃុំឈ្មោះ ទី វុទ្ធី គឺគាត់បានគំរាមសមាជិកភូមិ មិនឲ្យចេញចូលផ្ទះខ្ញុំទេ ហើយគាត់បានទៅគាបសង្កត់គ្នាដល់ផ្ទះ និយាយថា ចុះខ្វះណាស់អីកន្លែងទិញថ្នាំ ហើយដល់ហើយទៅ ឃុំគេគាបសង្កត់ថា ខ្វះអីកន្លែងទិញថ្នាំ ចាំបាច់ចូលកន្លែងហ្នឹង។ យើងដឹងថា កន្លែងហ្នឹងជាកន្លែងម៉េចហើយ»។
អ្នកស្រី សំ ចរិយា ថ្លែងថា ការរើសអើងផ្នែកនយោបាយនេះ កើតមានឡើងចាប់តាំងពីក្រុមគ្រួសាររបស់អ្នកស្រីសម្រេចចិត្តគាំទ្រកម្មវិធីនយោបាយរបស់គណបក្សប្រឆាំងមក។
បដិសេធនឹងការចោទប្រកាន់នេះ ចៅសង្កាត់កំពង់កណ្ដាល លោក ទី វុទ្ធី អះអាងថា មន្ត្រីមូលដ្ឋានពុំដែលបិទសិទ្ធិសេរីភាពរបស់ប្រជាពលរដ្ឋម្ដងណានោះទេ។ ផ្ទុយទៅវិញលោកតែងសម្រួលកិច្ចការនានាដល់ប្រជាពលរដ្ឋ ក្នុងន័យជំរុញឲ្យមានប្រជាធិបតេយ្យជានិច្ចនៅក្នុងតំបន់។
លោកបន្តថា៖ «អត់ដឹងផងបង ការទិញដូរជាសិទ្ធិរបស់គេទេបង។ អត់មានទេ តិចនិកទីផ្សារជារឿងរបស់គេ។ គេកាលណាមានលទ្ធផល មានគុណភាពល្អ សេវាអាចនេះបាន អាហ្នឹងរឿងរបស់គេបង»។
បើទោះជាបែបណា មន្ត្រីអង្គការលីកាដូ (Licadho) ប្រចាំតំបន់ ទទួលបន្ទុកការស្រាវជ្រាវ លោក យន់ ផល្លី ចាត់ទុកថា ផ្អែកលើគោលការណ៍ច្បាប់ ពលរដ្ឋមានសិទ្ធិជ្រើសរើសគណបក្សនយោបាយដែលខ្លួនពេញចិត្ត។ លោកបន្តថា ការរឹតបន្តឹងសកម្មភាពនៃការចូលរួមក្នុងវិស័យនយោបាយណាមួយនោះ គឺជាការអនុវត្តផ្ទុយពីក្របខ័ណ្ឌច្បាប់។ លើសពីនេះ អ្វីដែលមិនទាស់ខុសទៀតនោះ គឺហាងលក់សម្ភារៈជាចំណុចប្រមូលផ្ដុំ និងជាទីតាំងសាធារណៈរបស់មជ្ឈដ្ឋាននានាទៀតផង។
លោកគិតថា ហេតុនេះអាជ្ញាធរគួរសិក្សាពីប្រព័ន្ធច្បាប់ឲ្យបានទូលាយជាងនេះ៖ «ទាក់ទិនក្នុងករណីនេះ រឿង សំ ចរិយា នេះឃើញថា គាត់គឺជាអាជីវករមួយដែលមានការលក់ដូរ មុខទំនិញរបស់គាត់។ អ៊ីចឹងបើមានការហាមឃាត់អតិថិជនណាមួយពីអាជ្ញាធរ បានន័យថា នេះគឺជាការរើសអើងទាក់ទិនគណបក្សនយោបាយ»។
មន្ត្រីរបស់គណបក្សសង្គ្រោះជាតិ ឲ្យដឹងថា គិតមកដល់ពេលនេះ មានមន្ត្រីមួយចំនួន ក្នុងស្ថាប័ននគរបាលយុត្តិធម៌ និងមន្ទីរក្នុងខេត្តកំពត ត្រូវគេព្យួរពីតួនាទី និងផ្អាកការងារ។ហេតុផលដែលត្រូវបានគេបញ្ឈប់នេះ ក្រោយពីរកឃើញថា មន្ត្រីទាំងនោះស្និតនឹងគណបក្សប្រឆាំង ហើយឧស្សាហ៍ចេញចូលទិញសម្ភារៈម្ចាស់ផ្ទះសំណាក់ភ្នំខៀវ ដែលមានម្ចាស់អាជីវកម្មរបស់បក្សជំទាស់ផងនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។