ក្នុងលិខិតដដែលនោះបានបញ្ជាក់ថា មុនសមាជមហាជនកាលពីថ្ងៃទី៦ តុលា ប្រធានគណបក្សសង្គ្រោះជាតិ លោក សម រង្ស៊ី បានប្រាប់តាមទូរស័ព្ទទៅលោក ស ខេង ថា គណបក្សសង្គ្រោះជាតិ ឈប់ទាមទារតំណែងប្រធានរដ្ឋសភាទៀត ប្រសិនបើគណបក្សប្រជាជនបែងចែកតំណែងសមាជិកគណៈកម្មាធិការអចិន្ត្រៃយ៍ទាំង ១២ នៅក្នុងរដ្ឋសភាឲ្យស្មើគ្នា។
លិខិតបន្តទៀតថា ផ្ទុយទៅវិញ អនុប្រធានបក្សសង្គ្រោះជាតិ លោក កឹម សុខា និងអ្នកនាំពាក្យគណបក្សលោក យឹម សុវណ្ណ បានបញ្ជាក់ថា គណបក្សសង្គ្រោះជាតិ នៅតែរក្សាជំហរទាមទារតំណែងប្រធានរដ្ឋសភាដដែល។
សូមស្ដាប់ការបកស្រាយរបស់លោក យឹម សុវណ្ណ ជុំវិញប្រការនេះ តាមការសាកសួររបស់អ្នកស្រី ម៉ៅ សុធានី៖
ទោះជាសំណើណាមួយក៏ដោយ ទាំងប្រធានរដ្ឋសភា ឬសមាជិកគណៈកម្មាធិការអចិន្ត្រៃយ៍នៃរដ្ឋសភាឲ្យស្មើគ្នា ក៏គណបក្សប្រជាជនមិនយល់ព្រមដែររហូតមកដល់ពេលនេះ។ លិខិតរបស់ខុទ្ទកាល័យឯកឧត្ដម ស ខេង បញ្ជាក់ថា ការទាមទារបែងចែកសមាជិកគណៈកម្មាធិការអចិន្ត្រៃយ៍នៃរដ្ឋសភាទាំង ១២រូបឲ្យស្មើគ្នានោះ គណបក្សប្រជាជនកម្ពុជា នៅតែមិនយល់ព្រម ពីព្រោះថា ការទាមទារចំនួនសមាជិកគណៈកម្មាធិការអចិន្ត្រៃយ៍នៃរដ្ឋសភា ៦រូបស្មើគ្នា គឺជាការធ្វើឲ្យជាប់គាំងទាំងដំណើរការរដ្ឋសភានិងរាជរដ្ឋាភិបាល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។