ក្រុមការងារគណបក្សសង្គ្រោះជាតិ និងគណបក្សប្រជាជនកម្ពុជា ម្ខាង ៣នាក់ នឹងជួបគ្នាជាផ្លូវការ នៅវិមានព្រឹទ្ធសភា នៅថ្ងៃទី១២ មិថុនា វេលាម៉ោង ៩ព្រឹក។
មន្ត្រីជាន់ខ្ពស់គណបក្សសង្គ្រោះជាតិ លោក គួយ ប៊ុនរឿន និងជាអ្នកដឹកនាំការចរចា មានប្រសាសន៍ថា ក្រុមការងារគណបក្សទាំងពីរបានកំណត់ពេលជួបគ្នា ដើម្បីជជែកលើក្របខ័ណ្ឌនៃការចរចាបន្ត ពិសេសទៅលើប្រសាសន៍របស់លោកនាយករដ្ឋមន្ត្រី ហ៊ុន សែន កាលពីថ្ងៃទី១០ មិថុថា ដែលថាគណបក្សប្រជាជនកម្ពុជា យល់ព្រមឲ្យធ្វើវិសោធនកម្មរដ្ឋធម្មនុញ្ញ ដាក់ស្ថាប័នគណៈកម្មាធិការជាតិរៀបចំការបោះឆ្នោត ជាស្ថាប័នធម្មនុញ្ញ និងអនុញ្ញាតឲ្យគណបក្សសង្គ្រោះជាតិ បង្កើតទូរទស្សន៍តាមរយៈក្រុមហ៊ុនឯកជន។
លោក គួយ ប៊ុនរឿន បញ្ជាក់ថា គណបក្សសង្គ្រោះជាតិ នឹងចូលសភាដរាបណាមានដំណោះស្រាយនយោបាយច្បាស់លាស់ជាមួយគណបក្សប្រជាជនកម្ពុជា។
លោកនាយករដ្ឋមន្រ្តី ហ៊ុន សែន បានប្រកាសបន្ទន់ឥរិយាបទនយោបាយ នៅក្នុងឱកាសលោកចុះសួរសុខទុក្ខជនពិការ នៅតំបន់កោះស្លា ស្រុកឈូក ខេត្តកំពត កាលពីថ្ងៃទី១០ខែមិថុនា។
ក្រៅពីបន្ទន់ឥរិយាបថនេះ លោក ហ៊ុន សែន ហាក់ដូចជាបង្ខំឲ្យគណបក្សសង្គ្រោះជាតិ ចូលសភាដែរ ដោយលោកព្រមានថា បើសិនជាគណបក្សសង្គ្រោះជាតិ មិនព្រមចូលសភាទេ លោកនៅតែដឹកនាំប្រទេសដោយឯកបក្ស ហើយព្រមានចាប់ខ្លួនមេដឹកនាំគណបក្សប្រឆាំង បើសិនជាធ្វើឲ្យមានបញ្ហាចលាចលក្នុងប្រទេសនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។