អង្គការសង្គមស៊ីវិលមាននិន្នាការគាំទ្រគណបក្សកាន់អំណាច គ្រោងធ្វើយុទ្ធនាការគាំទ្រចំណាត់ការរបស់អង្គភាពប្រឆាំងអំពើពុករលួយ ដែលបានឃាត់ខ្លួនសកម្មជនសិទ្ធិមនុស្សក្នុងស្រុក និងចោទប្រកាន់មន្ត្រីអង្គការសហប្រជាជាតិ។
នាយកប្រតិបត្តិសម្ព័ន្ធយុវជនស្រឡាញ់សន្តិភាព ដែលជាអតីតសម្ព័ន្ធសេនានាគ លោក ប៉ាន់ខែម ប៊ុនថន ប្រកាសថា លោកបានស្នើសុំការអនុញ្ញាតពីសាលារាជធានីភ្នំពេញ ដើម្បីដឹកនាំប្រជាពលរដ្ឋ យុវជន និស្សិតចំនួន ៥.០០០នាក់ ហែញត្តិគាំទ្រសកម្មភាពរបស់អង្គភាពប្រឆាំងអំពើពុករលួយ (ACU)។
លោក ប៉ាន់ខែម ប៊ុនថន បញ្ជាក់ប្រាប់វិទ្យុអាស៊ីសេរី ថា លោកពុំទាន់កំណត់ពេលវេលាច្បាស់លាស់ដើម្បីហែញត្តិទេ ដោយរង់ចាំចម្លើយពីសាលារាជធានីជាមុនសិន៖ «ក្រុមរបស់ខ្ញុំគឺសម្ព័ន្ធយុវជនស្រឡាញ់សន្តិភាព ដែលបច្ចុប្បន្នធ្វើការងារមនុស្សធម៌ដោយមិនប្រកាន់និន្នាការនយោបាយ។ យើងតែទុកខ្មែរទាំងអស់ជាខ្មែរតែមួយ អ៊ីចឹងយើងគាំទ្រនូវអ្វីដែលគេកំពុងធ្វើ ជាពិសេសអ្វីដែលរដ្ឋាភិបាលកំពុងធ្វើគឺខ្ញុំគាំទ្រ។ ដូច្នេះខាងណោះគេធ្វើ គឺជារឿងរបស់គាត់ ពីព្រោះប្រជាពលរដ្ឋទាំងអស់នៅកម្ពុជា គឺមានសិទ្ធិ បើគាត់មិនច្បាប់ឲ្យធ្វើគាត់ធ្វើទៅ ហើយខ្ញុំអត់ចាប់អារម្មណ៍ទេ»។
វិទ្យុអាស៊ីសេរី នៅមិនទាន់អាចសុំការបញ្ជាក់ពីសាលារាជធានីភ្នំពេញ ថាតើអនុញ្ញាតឲ្យសម្ព័ន្ធយុវជនស្រឡាញ់សន្តិភាពប្រមាណ ៥ពាន់នាក់ ដើរហែញត្តិគាំទ្រចំណាត់ការ ACU បាននៅឡើយទេ កាលពីថ្ងៃទី៥ ឧសភា។ ក៏ប៉ុន្តែសាលារាជធានីភ្នំពេញ បានបដិសេធសំណើរបស់ក្រុមពលរដ្ឋប្រមាណ ២.០០០នាក់ មកពីសហគមន៍ផ្សេងៗ ដើម្បីហែញត្តិទៅអង្គភាពប្រឆាំងអំពើពុករលួយនៅថ្ងៃទី៧ ខែឧសភា ទាមទារឲ្យបញ្ឈប់ការចោទប្រកាន់ និងដោះលែងមន្ត្រីសិទ្ធិមនុស្សដែលកំពុងជាប់ពន្ធនាគារ។
នាយករដ្ឋបាលសាលារាជធានីភ្នំពេញ លោក មាស ចាន់យ៉ាដា ប្រាប់វិទ្យុអាស៊ីសេរី កាលពីល្ងាចថ្ងៃព្រហស្បតិ៍ ថា ការសម្រេចរបស់សាលារាជធានី គឺដោយផ្អែកលើមូលហេតុថា ក្រុមពលរដ្ឋទាំងនោះមិនមានស្នាមមេដៃគាំទ្រពីពលរដ្ឋតាមចំនួនដែលបញ្ជាក់ក្នុងលិខិតរបស់ខ្លួន ហើយពលរដ្ឋទាំងនោះមិនបានជូនដំណឹងឲ្យបាន ៥ថ្ងៃ មុនថ្ងៃហែញត្តិ និងមូលហេតុមួយចំនួនទៀត។
ទោះជាយ៉ាងណាក៏ដោយ តំណាងក្រុមពលរដ្ឋប្រមាណ ២ពាន់នាក់នោះ អ្នកស្រី មាស លក្ខិណា អះអាងថា ពួកគេនឹងនៅតែប្រមូលផ្ដុំគ្នាហែញត្តិតាមការគ្រោងទុក ទោះក្នុងករណីមានការបង្ក្រាបពីសមត្ថកិច្ចក៏ដោយ៖ «សហភាពអឺរ៉ុបជិះកង់បាន យើងជាពលរដ្ឋខ្លួនឯងសោះ សុំតែហែដាក់ញត្តិសោះ តើវាមានអីត្រូវខុស? ប្រាប់ទៅ ពួកយើងសុទ្ធតែជាខ្មែរដូចគ្នា យើងអាចនិយាយគ្នាបានតើអូន។ អ៊ីចឹងយើងអត់មានទៅបង្កទៅជាលក្ខណៈហិង្សា ឬអីទេ។ យើងគ្រាន់តែសុំដើរទៅដាក់ញត្តិជាធម្មតាតែប៉ុណ្ណឹងទេ»។
តំណាងពលរដ្ឋដែលបានផ្ដិតស្នាមមេដៃលើលិខិតដាក់ទៅសាលារាជធានីភ្នំពេញ ចុះថ្ងៃទី៤ ឧសភា សុំហែញត្តិ គឺជាពលរដ្ឋដែលមកពីសហគមន៍រងគ្រោះដោយសារទំនាស់ដីធ្លីក្នុងរាជធានីភ្នំពេញ និងតាមបណ្ដាខេត្តមួយចំនួន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។