ពលរដ្ឋប្រមាណជិត ១០០នាក់ នាំគ្នារារាំងមេដឹកនាំគណបក្សសង្គ្រោះជាតិ មិនអោយជួបអ្នកគាំទ្រក្នុងក្រុងខេមរភូមិន្ទ ខេត្តកោះកុង នៅព្រឹកថ្ងៃទី១១ ខែមិថុនា ដោយសំអាងហេតុផលថា ពលរដ្ឋនៅក្នុងខេត្តនេះមិនត្រូវការវត្តមានអ្នកដឹកនាំបក្សប្រឆាំង នៅក្នុងតំបន់រស់នៅរបស់គេឡើយ។
មន្ត្រីគណបក្សសង្គ្រោះជាតិ សង្ស័យថា ការរារាំងនោះថាជាការរៀបចំទុកជាមុនរបស់គណបក្សនយោបាយ ដែលមានបំណងរំខានដល់សកម្មភាពគណបក្សប្រឆាំង។ ចំណែកមន្ត្រីអង្គការមិនមែនរដ្ឋាភិបាល ស្នើពលរដ្ឋគាំទ្រគណបក្សកាន់អំណាច ផ្ដល់សិទ្ធិក្នុងការធ្វើនយោបាយក្នុងសង្គមប្រជាធិបតេយ្យ។
ក្រុមអ្នកតវ៉ាប្រមាណ ១០០នាក់ រាយបណ្ដាក់គ្នាតាមច្រកផ្លូវចូលទៅកាន់ក្រុងខេមរភូមិន្ទ ដើម្បីរារាំងដំណើររបស់មេដឹកនាំបក្សប្រឆាំង គឺលោក សម រង្ស៊ី និងលោក កឹម សុខា មិនអោយចូលក្នុងក្រុងជួបអ្នកគាំទ្រនៅទីនោះឡើយ។
ប្រធានគណបក្សសង្គ្រោះជាតិ ប្រចាំនៅខេត្តកោះកុង លោក ទេព ហៃ មានប្រសាសន៍ថា ដោយសារការរារាំងនោះ មេដឹកនាំគណបក្សសង្គ្រោះជាតិ ត្រូវគេចបង្វែងដានទៅតាមផ្លូវផ្សេងទៀត ដើម្បីបានទៅជួបអ្នកគាំទ្រ ដែលមានចំនួនប្រមាណ ២០០នាក់ នៅទីស្នាក់ការបក្សរបស់លោក។
លោក ទេព ហៃ បន្តថា មេបក្សសង្គ្រោះជាតិ បានជួបអ្នកគាំទ្រក្នុងរយៈពេលប្រហែលមួយម៉ោង។ លោក ទេព ហៃ សង្ស័យថា ការរារាំងនោះទំនងជាមានការរៀបចំទុកជាមុន៖ «និយាយឲ្យចំមក វាដូចជាមានហ៎ា ដូចជាមានហ៎ា គេហៅថាមានការណែនាំពីបក្សណាមួយ ឬក្នុងការដឹកនាំហ៎ ពីគណបក្សណាមួយ ដែលគេមានបំណងចង់រំខានដល់មេបក្សសង្គ្រោះជាតិ មកជួបជុំសួរសុខទុក្ខដល់សកម្មជន និងប្រជាពលរដ្ឋនៅខេត្តកោះកុង»។
វិទ្យុអាស៊ីសេរី មិនអាចសុំការពន្យល់លើបញ្ហានេះពីអាជ្ញាធរពាក់ព័ន្ធក្នុងខេត្តនេះបាននៅឡើយទេ នៅរសៀលថ្ងៃទី១១ ខែមិថុនា។
ក្នុងហេតុការណ៍នោះ ក្រុមអ្នកតវ៉ាបានលើកបដាជាច្រើន ដែលមានន័យសេចក្តីថា ពួកគេមិនត្រូវការ លោក សម រង្ស៊ី និងលោក កឹម សុខា អោយចូលទៅក្នុងភូមិស្រុករបស់គេទេ និងបញ្ជាក់ថា អ្នកទាំងពីររំខានដល់ការមមាញឹកប្រកបរបរចិញ្ចឹមជីវិតរបស់អ្នកស្រុក។ លើសពីនេះ ពួកគេបានជិះម៉ូតូជាច្រើនគ្រឿង ស្រែកប្រាប់អ្នកគាំទ្រគណបក្សសង្គ្រោះជាតិ អោយបោះបង់ការគាំទ្ររបស់ពួកគេ ដ្បិតមេបក្សសង្គ្រោះជាតិ ជាមនុស្សបោកប្រាស់ ជាដើម។
ទាក់ទងបញ្ហានេះ អ្នកសម្របសម្រួលនៃសមាគមការពារសិទ្ធិមនុស្សលីកាដូ (Licadho) ឲ្យដឹងថា ពលរដ្ឋគួរស្វែងយល់មនោគមវិជ្ជាប្រជាធិបតេយ្យ ដើម្បីផ្ដល់ឱកាសគ្រប់បក្សក្នុងប្រទេស ធ្វើសកម្មភាពនយោបាយជាមួយអ្នកគាំទ្ររបស់ពួកគេ៖ «វាមានអារឿងអ៊ីចឹងៗ ហើយដល់ពេលធ្វើអ៊ីចឹង បានវាបញ្ចៀសនូវការចោទថា វាការប្រកួតប្រជែងថា វាមិនស្មើភាពហ៎ា»។
នេះជាករណីថ្មីមួយទៀត បន្ទាប់ពីការរារាំងមួយដែលត្រូវគេធ្វើឡើងនៅក្នុងស្រុកអន្លង់វែង កាលពីចុងសប្ដាហ៍កន្លងទៅ។ ក្រុមមនុស្សពេញកម្លាំងសុទ្ធតែប្រុសៗជាអ្នកគាំទ្រគណបក្សកាន់អំណាច ច្រើនរយនាក់ រួមទាំងប៉ូលិស និងកងរាជអាវុធហត្ថផង បានរាយបណ្ដាក់តាមដងផ្លូវសំខាន់ៗ ដើម្បីរារាំងមន្ត្រី និងសកម្មជនគណបក្សសង្គ្រោះជាតិ មិនឱ្យចូលទៅកាន់ស្រុកអន្លង់វែង ដែលជាតំបន់អតីតខ្មែរក្រហមផ្ដាច់ខ្លួនបានទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។