សហព័ន្ធនិស្សិតបញ្ញវន្តកម្ពុជានៅថ្ងៃទី១៨ ខែ តុលា រិះគន់តំណាងរាស្ត្រទាំង១២៣រូបថា មិនបានយកចិត្តទុកដាក់បម្រើប្រជាពលរដ្ឋអោយបានពេញលេញ។ ការរិះគន់នេះគឺបន្ទាប់ពីសហព័ន្ធនិស្សិតបញ្ញវន្តកម្ពុជា បានដាក់ញត្តិដល់មន្ទីររដ្ឋសភា ប្រឆាំងការបញ្ជូនជនភៀសខ្លួនអូស្ត្រាលី មករស់នៅកម្ពុជា កាលពីថ្ងៃទី១៧ តុលា តែពុំមានអ្នកតំណាងរាស្ត្រណាម្នាក់ចេញមកទទួល។
ក្នុងសេចក្ដីថ្លែងការណ៍ចេញដោយលោក ម៉ៅ ពិសេស ប្រធានសហព័ន្ធបញ្ញវន្តកម្ពុជារិះគន់ថា តំណាងរាស្ត្រទាំង ១២៣ រូបគឺទាំងអ្នកតំណាងរាស្រ្តគណបក្សប្រជាជនកម្ពុជា និងគណបក្សសង្រ្គោះជាតិ បានអង្គុយនៅបន្ទប់នៃវិមានរដ្ឋសភា មានផាសុកភាព មានម៉ាស៊ីនត្រជាក់ ភ្លេចពីទុក្ខវេទនារបស់ប្រជាពលរដ្ឋ ដែលឈរតវ៉ានៅខាងមុខវិមានរដ្ឋសភាទាំងកណ្តាលថ្ងៃក្តៅហែង។
លោក ម៉ៅ វិសេស ថ្លែងបន្ថែមថា ក្រុមរបស់លោកមានបំណងស្វែងរកជំនួយពីអ្នកតំណាងរាស្ត្រ ប៉ុន្តែបានទទួលមកវិញនូវភាពខកចិត្ត។ លោកអំពាវនាវអោយអ្នកតំណាងរាស្ត្រគួរយកចិត្តទុកដាក់បម្រើពលរដ្ឋ និងកែតម្រូវទម្លាប់មិនល្អ៖ «ចំពោះយើងជាប្រជាពលរដ្ឋយើងមានការសោកស្តាយ មែនទែន ដែលតំណាងរាស្រ្តត្រូវបានបោះឆ្នោតដោយប្រជាពលរដ្ឋ ហាក់បីដូចជាមិនអោយ តម្លៃដល់ការទាមទារ ដល់ញត្តិរបស់យើង ដែលយើងចង់លើកពីកង្វល់របស់យើងទៅពួកគាត់ ដែលយើងបានបោះឆ្នោត ឲ្យ»។
កាលពីថ្ងៃទី១៧ ខែ តុលា ក្រុមបាតុករដែលមានចំនួនប្រមាណ៥០០នាក់បានហែក្បួនទៅដល់មុខរដ្ឋសភាទាមទារអោយអ្នកតំណាងរាស្ត្រអន្តរាគមន៍បញ្ឈប់ផែនការរបស់រដ្ឋាភិបាលនាំជនភៀសខ្លួនដែលសុំសិទ្ធិជ្រកកោននៅប្រទេសអូស្ត្រាលីមកកម្ពុជា។ ប៉ុន្តែពេលនោះពុំមានអ្នកតំណាងរាស្ត្រចេញមកទទួលឡើយ។
សេចក្ដីថ្លែងការណ៍ដដែល ចាត់ទុកតំណាងរាស្ត្រខ្មែរ ដែលមិនបានចេញមកទទួលញត្តិរបស់បាតុករ ថាអន់ជាងព្រឹទ្ធសមាជិករបស់ប្រទេសអូស្ត្រាលី ដែលបានសុំណាត់ជួបបាតុករ នៅខែវិច្ឆិកាខាងមុខ ដើម្បីស្ដាប់ពីការធ្វើបាតុកម្មប្រឆាំងនឹងកិច្ចព្រមព្រៀងបញ្ជូន និងទទួលយកជនភៀសខ្លួន ដែលសុំសិទ្ធិជ្រកកោននៅប្រទេសអូស្ត្រាលី មកកាន់ប្រទេសកម្ពុជា។
ឆ្លើយតបបញ្ហានេះប្រធានក្រុមអ្នកតំណាងរាស្ត្រនៃគណបក្សសង្គ្រោះជាតិ លោក សុន ឆ័យ មានប្រសាសន៍ថា លោកនឹងពិនិត្យមើលថាមានមូលហេតុអ្វីទើបមិនមានអ្នកតំណាងរាស្រ្តចេញទៅទទួលញត្តិ៖ «បើខ្ញុំនៅទីនោះ ខ្ញុំតែងតែឈប់សួរនាំ ដើម្បីអោយគេទទួល។ ខ្ញុំមិនដឹងថាថ្ងៃម្សិលមិញដោយសារមានប្រធានគណៈកម្មការមួយចំនួនជាប់ធ្វើបុណ្យកឋិនបុណ្យ អ៊ីចឹងប្រហែលជាមិនបានចេញមកទទួល។ ប៉ុន្តែខ្ញុំជឿ ថាបើទោះ ជាមិនបានចេញទទួលក៏ដោយក៏អ្នកធ្វើបាតុកម្មហ្នឹងអាចដាក់នៅមន្រ្តីដែលនៅសភាហ្នឹងគឺឯកសារហ្នឹង អា ចទៅដល់គណៈកម្មការ បាន ដូចគ្នា។ ប៉ុន្តែខ្ញុំសោកស្តាយធម្មតាតំណាងរាស្ត្រគណបក្សសង្រ្គោះជាតិតែងតែចេញទៅទទួល ។ ប៉ុន្តែខ្ញុំនឹង សួរនាំទៀត ថាហេតុអីបាន ជា អត់មានអ្នកចេញទៅម្សិលមិ ញ » ។
វិទ្យុអាស៊ីសេរីមិនអាចសុំការឆ្លើយតបពីអ្នកតំណាងរាស្ត្រនៃគណបក្សប្រជាជនកម្ពុជាបាននៅឡើយទេនៅរសៀលថ្ងៃ១៨ ខែ តុលា ដោយអ្នកតំណាងរាស្ត្រខ្លះទៅក្រៅប្រទេស ខ្លះមិនលើកទូរស័ព្ទ និងខ្លះទៀតមានជំងឺមិនអាចឆ្លើយបាន។ឮយ៉ាងណាកន្លងទៅក៏មានអ្នកតំណាងរាស្ត្រគណបក្សនេះមួយចំនួនធ្លាប់ចេញទទួលញត្តិពលរដ្ឋ ដែលមានជម្លោះដីធ្លី និងក្រុមកម្មករដែលតវ៉ាដែរ។
ទោះជាយ៉ាងណាលោក ម៉ៅ ពិសេស ប្រធានសហព័ន្ធបញ្ញវន្ត មើលឃើញថារាល់ការទទួលញត្តិរបស់អ្នកតំណាងរាស្រ្តទាំង២គណបក្សនាពេលកន្លងទៅនោះ គឺហាក់ធ្វើអោយតែរួចពីដៃ ដោយពុំបានយកចិត្តទុកដាក់ដល់សុខទុក្ខពលរដ្ឋអោយបានពិតប្រាកដឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។