គណៈកម្មការព្រំដែនកម្ពុជា-វៀតណាម សំណូមពរអោយប្រជាពលរដ្ឋរៀងខ្លួនមានការអត់ធ្មត់ដើម្បីរកដំណោះស្រាយ។ សំណូមពរនេះត្រូវលើកឡើងអំឡុងពេលភាគីទាំងពីរចុះពិនិត្យមើលតំបន់ប៉ះទង្គិចគ្នារវាងប្រជាពលរដ្ឋខ្មែរ និងពលរដ្ឋវៀតណាម កាលពីចុងខែមិថុនា កន្លងទៅ ដែលស្ថិតនៅភូមិធ្លកថ្មី ឃុំត្នោត ស្រុកកំពង់រោទិ៍ ខេត្តស្វាយរៀង កាលពីថ្ងៃទី១៦ ខែកក្កដា។ យ៉ាងណាក្នុងដំណើរទៅពិនិត្យព្រំដែននោះពុំអនុញ្ញាតអោយអ្នកសារព័ត៌មានបានតាមដាន និងយកព័ត៌មានឡើយ។
កម្លាំងអាជ្ញាធររដ្ឋាភិបាលត្រូវគេរៀបចំបណ្ដាក់គ្នាតាមផ្លូវទៅកាន់ព្រំដែន រារាំងមិនអោយអ្នកសារព័ត៌មានអាចទទួលបានព័ត៌មានពីការចុះពិនិត្យព្រំដែននោះឡើយ។
ប្រភពជាមន្ត្រីប៉ូលិសសុំមិនបញ្ចេញឈ្មោះម្នាក់ដែលដឹងហេតុការណ៍នោះ អោយដឹងថា ជំនួបពិភាក្សាគ្នារវាងគណៈប្រតិភូកម្ពុជា ដែលដឹកនាំដោយរដ្ឋលេខាធិការក្រសួងការបរទេស លោក ឡុង វិសាលោ និងភាគីវៀតណាម ដឹកនាំដោយអនុប្រធានគណៈកម្មការព្រំដែនជាតិវៀតណាម លោក វៀង អាញ យ៉ុង នៅថ្ងៃទី១៦ ខែកក្កដា បានសួរដេញដោលបញ្ជាក់បន្ថែមអំពីហេតុការណ៍ប៉ះប្រយុទ្ធគ្នាចន្លោះបង្គោលព្រំដែនលេខ២០២ និង២០៣ ស្ថិតនៅភូមិធ្លកថ្មី ឃុំត្នោត ស្រុកកំពង់រោទិ៍ ខេត្តស្វាយរៀង កាលពីថ្ងៃទី២៨ ខែមិថុនា។
ប្រភពដដែលបញ្ជាក់ថា ប្រធានប៉ុស្តិ៍វៀតណាម ឆ្លើយបំភ្លឺប្រាប់គណៈប្រតិភូកម្ពុជា ដែលចុះពិនិត្យតំបន់នោះថា ប្រជាពលរដ្ឋខ្មែរជាអ្នកបើកការវាយប្រហារជាមុនដោយប្រើដងទង់ជាតិ ខណៈដែលប្រជាពលរដ្ឋវៀតណាម គ្មានអាវុធក្នុងដៃ ហើយព្យាយាមពន្យល់ពលរដ្ឋខ្មែរ ឲ្យដឹងថា ដីនៅទីនោះគឺជាកម្មសិទ្ធិរបស់វៀតណាម។
ដោយឡែកអាជ្ញាធរកម្ពុជា ដែលជាសាក្សីឃើញហេតុការណ៍ផ្ទាល់ភ្នែកបញ្ជាក់ថា ប្រជាពលរដ្ឋវៀតណាម ប្រដាប់ដោយដំបងគ្រប់ដៃ បានចូលមកវាយប្រជាពលរដ្ឋខ្មែរនៅលើទឹកដីខ្មែរ។
យ៉ាងណាក៏ដោយ ភាគីទាំងពីរក៏សម្រុះសម្រួលគ្នា ហើយសំណូមពរអោយណែនាំប្រជាពលរដ្ឋទាំងសងខាងអោយយល់ដឹងអំពីកិច្ចព្រមព្រៀងឆ្នាំ១៩៩៥ ដែលអោយរក្សាស្ថានភាពដើមដដែល មិនអោយមានការសាងសង់អ្វីឡើយរហូតដល់មានដំណោះស្រាយត្រឹមត្រូវ។
វិទ្យុអាស៊ីសេរី បានព្យាយាមទាក់ទងតាមទូរស័ព្ទសុំការបញ្ជាក់ពីមន្ត្រីក្រសួងការបរទេសកម្ពុជា លោក ឡុង វិសាលោ និងមន្ត្រីជំនាញព្រំដែនដែលចុះទៅពិនិត្យព្រំដែននោះ ប៉ុន្តែមិនបានការឆ្លើយតបឡើយ។
តំណាងរាស្ត្របក្សសង្គ្រោះជាតិ លោក អ៊ុំ សំអាន ដែលបានដឹកនាំប្រជាពលរដ្ឋទៅមើលព្រំដែននោះ បញ្ជាក់ឡើងវិញថា ប្រជាពលរដ្ឋវៀតណាម ទេ ដែលចូលមកវាយខ្មែរនៅលើទឹកដីខ្មែរ។
លោកចោទថា វៀតណាមបានរំកិលព្រំដែនចូលដីខ្មែរប្រមាណកន្លះគីឡូម៉ែត្រ និងបានសាងសង់ផ្លូវចូលតំបន់ស ដែលរំលោភកិច្ចព្រមព្រៀងឆ្នាំ១៩៩៥ ទៀតផង៖ «ខ្មែរយើងគ្មានអាវុធក្នុងដៃទេ ហើយទាហានខ្មែរយើងនៅទីនោះមិនដល់ ១០នាក់ផង ប៉ុន្តែប្រជាពលរដ្ឋមានសុទ្ធតែដំបង ហើយដំដែកគោលជាប់ទៀតផង ហើយទាហានគេជាច្រើនដែរ មានសុទ្ធតែអាវុធ បានចូលមកវាយខ្មែរលើដីខ្មែរ គឺខុសធ្ងន់ណាស់»។
កាលពីថ្ងៃទី២៨ ខែមិថុនា លោក ថាច់ សេដ្ឋា នាយកប្រតិបត្តិសហគមន៍ខ្មែរកម្ពុជាក្រោម សហការជាមួយសម្ព័ន្ធយុវជនខ្មែរដើម្បីលទ្ធិប្រជាធិបតេយ្យ និងតំណាងរាស្ត្របក្សប្រឆាំង បានដឹកនាំយុវជន ព្រះសង្ឃ និងពលរដ្ឋប្រមាណ ២០០អង្គ និងនាក់ ទៅពិនិត្យបង្គោលព្រំដែនលេខ២០៣ ត្រង់ចំណុចភូមិធ្លក ឃុំត្នោត ស្រុកកំពង់រោទិ៍ ក្នុងខេត្តស្វាយរៀង ដែលគេសង្ស័យថា វៀតណាម រំកិលចូលដីខ្មែរប្រមាណ កន្លះគីឡូម៉ែត្រពីបង្គោលចាស់។ ចំណុចព្រំដែននេះ គឺនៅទល់មុខនឹងស្រុកម៉ុកហ័រ ខេត្តឡុងអាន (Moc Hoa district, Long An province) ប្រទេសវៀតណាម។
កាលណោះ គឺពេលដែលពលរដ្ឋ និងកងទ័ពវៀតណាម រារាំងពលរដ្ឋខ្មែរមិនឲ្យទៅមើលទីនោះ ទើបបណ្ដាលអោយមានការប៉ះទង្គិចដោយវាយគ្នាទៅវិញទៅមក មានពលរដ្ឋខ្មែររងរបួសជាង ១០នាក់ និងវៀតណាម របួស ៨នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។